ലിയോ പതിനാലാമൻ പാപ്പായുടെ തുർക്കി സന്ദർശന വിവരണം

വത്തിക്കാൻ : പാപ്പയുടെ തുർക്കി സന്ദർശനത്തിന്റെ യാത്രാ വിവരണം (കടപ്പാട് വത്തിക്കാൻ മീഡിയ)

നവംബർ 27 വ്യാഴാഴ്ച രാവിലെ 7.00-ന്, വത്തിക്കാനിൽനിന്ന് പുറപ്പെട്ട പാപ്പാ, റോം ഫ്യുമിച്ചീനോയിലുള്ള ലെയൊനാർദോ ദാവിഞ്ചി അന്താരാഷ്ട്രവിമാനത്താവളത്തിൽനിന്ന് യാത്ര പുറപ്പെട്ട്, പ്രാദേശികസമയം പന്ത്രണ്ടരയോടെ തുർക്കിയിലെ അങ്കാറയിലുള്ള എസെൻബോഗ (Esenboğa) അന്താരാഷ്ട്ര വിമാനത്താവളത്തിലെത്തി.

ഇന്ത്യൻ സമയമത്തെ അപേക്ഷിച്ച് തുർക്കി രണ്ടര മണിക്കൂറും, ഇറ്റാലി നാലര മണിക്കൂറും പിന്നിലാണ്. അങ്കാറയിലെത്തിയ പാപ്പാ, ആദ്യം, തുർക്കിയുടെ രാഷ്ട്രനിർമ്മാതാവും പ്രഥമ പ്രസിഡന്റുമായിരുന്ന മുസ്തഫ കെമാൽ അതാത്യുർക്കിന്റെ (Mustafa Kemal “Atatürk”) ഖബറിടം സന്ദർശിക്കുകയും, പിന്നീട് രാജ്യത്തെ നിലവിലെ പ്രസിഡന്റ് റെജപ് തയ്യിപ്‌ എർദൊഗാന്റെ (Recep Tayyip Erdoğan) കൊട്ടാരത്തിലെത്തി അദ്ദേഹവുമായി സ്വകാര്യ കൂടിക്കാഴ്ച നടത്തുകയും ചെയ്തു.

തുടർന്ന്, പ്രസിഡന്റിനൊപ്പം രാജ്യത്തെ ഔദ്യോഗിക നേതൃത്വവും, പൊതുസമൂഹവും, തുർക്കിയിലേക്കുള്ള നയതന്ത്രജ്ഞരും ഉൾക്കൊള്ളുന്ന സമൂഹവുമായി പരിശുദ്ധ പിതാവ് കൂടിക്കാഴ്ച നടത്തുകയും തുർക്കിയിലെ തന്റെ പ്രഥമ പ്രഭാഷണം നടത്തുകയും ചെയ്തു. ഈ സമ്മേളനത്തിന് ശേഷം പാപ്പാ, ദിയനെറ്റ് (Diyanet) എന്ന “മത കാര്യങ്ങൾക്കായുള്ള” കേന്ദ്രത്തിലെത്തുകയും അതിന്റെ പ്രസിഡന്റ് സാഫി അർപാഗൂഷുമായി (Safi Arpaguş) സ്വകാര്യ കൂടിക്കാഴ്ച നടത്തുകയും ചെയ്തു.

തുടർന്ന് പാപ്പാ അപ്പസ്തോലിക നൂൺഷിയേച്ചർ സന്ദർശിച്ചു.അങ്കാറയിലെ ഔദ്യോഗിക ചടങ്ങുകൾ അവസാനിച്ചതിന് ശേഷം, വിമാനമാർഗ്ഗം പാപ്പാ, 435 കിലോമീറ്ററുകൾ അകലെയുള്ള ഇസ്താൻബുൾ അതാത്യുർക്ക് (Istanbul-Atatürk) വിമാനത്താവളത്തിലേക്ക് യാത്ര തിരിച്ചു. അതിനടുത്തുള്ള അപ്പസ്തോലിക പ്രതിനിധി മന്ദിരത്തിലാണ് പാപ്പാ ഇരുപത്തിയേഴാം തീയതി വൈകിട്ട് വിശ്രമിച്ചത്.

നവംബർ 28 വെള്ളിയാഴ്ച രാവിലെ വിശുദ്ധ ബലിയർപ്പിച്ച പാപ്പാ, തുടർന്ന്, മെത്രാന്മാരും, വൈദികരും, ഡീക്കന്മാരും, സമർപ്പിതരും, അജപാലനമേഖലയിൽ സേവനമനുഷ്ഠിക്കുന്നവരുമൊത്തുള്ള സംഗമത്തിനായി, അതിനടുത്തുള്ള പരിശുദ്ധാത്മാവിന്റെ നാമധേയത്തിലുള്ള കത്തീഡ്രൽ ദേവാലയത്തിലെത്തുകയും, അവർക്കൊപ്പം പ്രാർത്ഥന നടത്തുകയും സന്ദേശം നൽകുകയും ചെയ്തു.

ഈ സമ്മേളനത്തെത്തുടർന്ന് പാപ്പാ, അവിടെനിന്ന് രണ്ടര കിലോമീറ്ററുകൾ അകലെ വയോധികർക്കുവേണ്ടി, “പാവപ്പെട്ടവരുടെ ചെറുസഹോദരിമാർ” എന്ന സന്ന്യസ്തസമൂഹം നടത്തുന്ന കേന്ദ്രം സന്ദർശിക്കുകയും, അവിടെ ഒരുമിച്ച് കൂടിയ ഇരുനൂറോളം ആളുകളെ അഭിസംബോധന ചെയ്ത് സംസാരിക്കുകയും പ്രാർത്ഥിക്കുകയും ചെയ്‌തു.

ഈ സമ്മേളനത്തിന് ശേഷം തിരികെ അപ്പസ്തോലിക പ്രതിനിധി മന്ദിരത്തിലെത്തിയ പാപ്പാ, അവിടെയെത്തിയ, തുർക്കിയിലെ റബ്ബികളുടെ തലവനുമായി സ്വകാര്യ കൂടിക്കാഴ്ച്ച നടത്തുകയും ചെയ്തു.

പാപ്പാ നിഖ്യയിലേക്ക്

നവംബർ 28 വെള്ളിയാഴ്ച ഉച്ചയ്ക്ക് അപ്പസ്തോലിക പ്രതിനിധി മന്ദിരത്തിൽനിന്ന് ഭക്ഷണം കഴിച്ച ശേഷം, രണ്ടേകാലോടെ, മുൻപ് നിഖ്യ എന്ന പേരിൽ അറിയപ്പെട്ടിരുന്നതും, സഭാചരിത്രത്തിന് ഏറെ പ്രധാനപ്പെട്ടതും, ഇന്ന് ഇസ്‌നിക് (İznik) എന്ന പേരിൽ അറിയപ്പെടുന്നതുമായ നഗരത്തിൽ എക്യൂമെനിക്കൽ പ്രാർത്ഥനാസമ്മേളനത്തിൽ സംബന്ധിക്കാനായി പാപ്പാ പുറപ്പെട്ടു.

ഇതിനായി ഇരുപത്തിയൊന്ന് കിലോമീറ്ററുകൾ അകലെയുള്ള ഇസ്താൻബുളിലെ അതാത്യുക്ക് വിമാനത്താവളത്തിലെത്തിയ പാപ്പാ, രണ്ടേമുക്കാലോടെ അവിടെനിന്ന് ഹെലികോപ്റ്ററിൽ ഇസ്‌നിക് വരെയുള്ള 150 കിലോമീറ്ററുകൾ താണ്ടി. ഇസ്‌നികിലെ ഹേലിപാഡിലെത്തിയ പാപ്പായെ കോൺസ്റ്റാന്റിനോപോളിയിലെ എക്യൂമെനിക്കൽ പാത്രിയർക്കീസ് പരിശുദ്ധ ബർത്തലോമിയോ ഒന്നാമൻ (Bartolomeo I) സാഗതം ചെയ്യാനെത്തിയിരുന്നു. ഇസ്താൻബൂളിന്റെ തെക്കു കിഴക്ക് 130 കിലോമീറ്ററുകൾ അകലെയുള്ള ബുർസ (Bursa) പ്രവിശ്യയിലെ ഇസ്‌നിക് ജില്ലയുടെ തലസ്ഥാനമാണ് ഇസ്‌നിക് നഗരം.

325-ൽ കോൺസ്റ്റന്റൈൻ ചക്രവർത്തിയും, 787-ൽ ഐറിൻ ചക്രവർത്തിനിയും വിളിച്ചുകൂട്ടിയ എക്യൂമെനിക്കൽ സൂനഹദോസുകളാൽ പ്രശസ്തമാണ് നിഖ്യ.വിശുദ്ധ നിയോഫിത്തോയുടെ പേരിലുണ്ടായിരുന്ന ബസലിക്കഡയക്‌ളീഷ്യൻ ചക്രവർത്തിയുടെ കീഴിൽ, 303-ൽ കൊല്ലപ്പെട്ട വിശുദ്ധ നിയോഫിത്തോയുടെ പേരിൽ ഏതാണ്ട് 1600 വർഷങ്ങൾക്ക് മുൻപ് നിഖ്യായിൽ ഒരു ദേവാലയം പണിയപ്പെട്ടിരുന്നു.

എന്നാൽ 740-ൽ ഉണ്ടായ ഒരു ഭൂമികുലുക്കത്തിൽ തകർന്ന ഈ ദേവാലയം പിന്നീട് അവിടെയുണ്ടായിരുന്ന തടാകത്തിലെ ജലം കൊണ്ട് മൂടപ്പെടുകയായിരുന്നു. 2014-ൽ കണ്ടുപിടിക്കപ്പെട്ട ഈ ദേവാലയത്തിന്റെ അവശേഷിച്ച ഭാഗങ്ങൾ ഇന്ന് കരയിൽനിന്ന് കാണാവുന്നവയാണ്. എക്യൂമെനിക്കൽ പ്രാർത്ഥനാസമ്മേളനം ഇസ്‌നികിലെ ഹെലിപാഡിൽനിന്നും 6 കിലോമീറ്ററുകൾ അകലെ, വിശുദ്ധ നിയോഫിത്തോയുടെ പേരിലുണ്ടായിരുന്ന ബസലിക്കയുടെ അവശിഷ്ടങ്ങൾക്കടുത്തുള്ള പുരാവസ്തു ഗവേഷണയിടത്തോട് ചേർന്ന് നടക്കുന്ന എക്യൂമെനിക്കൽ പ്രാർത്ഥനാസമ്മേളനത്തിൽ പങ്കെടുക്കാനായി പാപ്പാ കാറിൽ യാത്രയായി.

അവിടെയെത്തിയ പാപ്പായെയും എക്യൂമെനിക്കൽ പാത്രിയർക്കീസിനെയും രണ്ട് മെത്രാപ്പോലീത്തമാർ, സന്ദർശനകേന്ദ്രത്തിന്റെ വാതിൽക്കൽ എത്തി സ്വീകരിച്ചു. പരിശുദ്ധ പിതാവിനും പാത്രിയർക്കീസിനുമൊപ്പം മറ്റു സഭാ നേതൃത്വങ്ങളും ഗവേഷണയിടത്തിന് അടുത്തുള്ള സ്റ്റേജിലെ ക്രിസ്തുവിന്റെയും സൂനഹദോസിന്റെയും ഐക്കണുകൾക്കടുത്ത് നിലയുറപ്പിച്ചു.

വൈകുന്നേരം മൂന്നരയോടെയാരംഭിച്ച സമ്മേളനത്തിന്റെ ആരംഭത്തിൽ ഒരു പ്രാർത്ഥനാഗാനമായിരുന്നു. തുടർന്ന് എക്യൂമെനിക്കൽ പാത്രിയർക്കീസ് പരിശുദ്ധ ബർത്തലോമിയോ ഒന്നാമൻ സഹോദരങ്ങൾ ഒരുമിച്ചായിരിക്കുന്നതിന്റെ സന്തോഷം പരാമർശിച്ചും, നിഖ്യ സൂനഹദോസിന്റെ പ്രാധാന്യം എടുത്തുപറഞ്ഞും സംസാരിക്കുകയും പാപ്പായ്ക്കും മറ്റേവർക്കും സ്വാഗതമേകുകയും ചെയ്തു.

“പരിശുദ്ധ പിതാവേ, ബഹുമാന്യരേ, ലോകമെമ്പാടുമുള്ള ക്രിസ്തീയ സഭകളുടെ പ്രതിനിധികളേ, ക്രിസ്തുവിൽ സഹോദരീസഹോദരന്മാരേ,”ഇതാ, സഹോദരങ്ങള് ഒരുമിച്ചു ജീവിക്കുന്നത് എത്ര നല്ലതും ആനന്ദകരവുമാണ് !” (സങ്കീർത്തനം 132[133]:1). ആയിരത്തി എഴുനൂറ് വർഷങ്ങൾക്ക് മുമ്പ് ഇവിടെ നിഖ്യയിൽ നടന്ന ഒന്നാം എക്യൂമെനിക്കൽ കൗൺസിലിന്റെ സ്മരണയെയും പാരമ്പര്യത്തെയും ഈ സംയുക്ത തീർത്ഥാടനത്തിലൂടെ ആദരിക്കാനുള്ള ഞങ്ങളുടെ എളിയ ക്ഷണത്തോട് നിങ്ങളെല്ലാവരും ക്രിയാത്മകമായി പ്രതികരിച്ചതിൽ ഞങ്ങൾ ഏറെ കൃതാർത്ഥരാണ്.

ഇത്രയധികം നൂറ്റാണ്ടുകളിലായി, കടന്നുവന്ന പ്രക്ഷോഭങ്ങളും, ബുദ്ധിമുട്ടുകളും, ഭിന്നതകളും എല്ലാം ഉണ്ടായിരുന്നിട്ടും, ഈ വിശുദ്ധമായ അനുസ്മരണത്തെ നാം ബഹുമാനത്തോടെയും പ്രത്യാശയുടെ പൊതുവായ വികാരത്തോടെയും പരസ്പരം പങ്കുവയ്ക്കുന്നു. കാരണം കഴിഞ്ഞകാലത്തെപറ്റി അനുസ്മരിക്കുവാനോ, ചരിത്രത്തെക്കുറിച്ച് മാത്രം ചിന്തിക്കാനോ വേണ്ടിയല്ല നാം ഇവിടെ ഒത്തുകൂടിയിരിക്കുന്നത്, മറിച്ച്, നിഖ്യയിലെ പിതാക്കന്മാർ പ്രകടിപ്പിച്ച അതേ വിശ്വാസത്തിന്, ജീവിക്കുന്ന സാക്ഷ്യം വഹിക്കാനാണ്.

മുന്നോട്ട് പോകുന്നതിനായി നാം ക്രിസ്തീയ വിശ്വാസത്തിന്റെ ഈ ഉറവിടത്തിലേക്ക് മടങ്ങിവരുന്നു. മുന്നിലുള്ള നമ്മുടെ ദൗത്യങ്ങൾക്ക് വേണ്ടി ശക്തരാകുന്നതിന് ഈ നിശ്വസ്ത വിശ്രമ ജലത്തിൽ നാം നവോന്മേഷം നേടുന്നു. ഈ സ്ഥലത്തിന്റെ ശക്തി കടന്നുപോകുന്നതിലല്ല, മറിച്ച് എന്നെന്നേക്കുമായി നിലനിൽക്കുന്നതിലാണ് വസിക്കുന്നത്. നമ്മുടെ കർത്താവും, രക്ഷകനുമായ യേശുക്രിസ്തു യഥാർത്ഥ ദൈവത്തിന്റെ യഥാർത്ഥ ദൈവമാണെന്നും, പിതാവുമായി ഒരേ സത്തയിൽ ആണെന്നതിനും (ὁμοούσιος τῷ Πατρί) ഈ നിഖ്യാചരിത്രം നിത്യതയ്ക്ക് സാക്ഷ്യം വഹിച്ചു.

ഈ വിശ്വാസപ്രമാണത്തിലെ പദ പ്രയോഗങ്ങൾ അപ്പസ്തോലന്മാരുടെ വിശ്വാസം എല്ലാവരിലും ഊട്ടിയുറപ്പിക്കുന്നു.ക്രിസ്തുവിൽ പ്രിയ സഹോദരീ സഹോദരന്മാരേ, വിജയം (νίκη) എന്ന ഗ്രീക്ക് പദത്തിൽ നിന്നാണ് നിഖ്യ എന്ന പേര് ഉരുത്തിരിഞ്ഞത്. വീണുപോയ ലോകം വിജയത്തെക്കുറിച്ച് ചിന്തിക്കുമ്പോൾ, അത് ബലത്തെക്കുറിച്ചും ആധിപത്യത്തെക്കുറിച്ചും ചിന്തിക്കുന്നു.

എന്നാൽ ക്രിസ്ത്യാനികളെന്ന നിലയിൽ വ്യത്യസ്തമായി ചിന്തിക്കാൻ നാം കടപ്പെട്ടിരിക്കുന്നു. നമ്മുടെ വിജയത്തിന്റെ വൈരുദ്ധ്യാത്മക അടയാളം കുരിശെന്ന അജയ്യമായ പ്രതീകമാണ്. ഇത് ജനതകൾക്ക് ‘വിഡ്ഢിത്തം’ ആണ്, പരാജയത്തിന്റെ അടയാളമാണ്, എന്നാൽ നമ്മെ സംബന്ധിച്ചിടത്തോളം ഇത് ദൈവത്തിന്റെ ജ്ഞാനത്തിന്റെയും ശക്തിയുടെയും പരമോന്നത പ്രകടനമാണ്. ഈ സ്ഥലത്ത് നാം തീർച്ചയായും വിജയം ആഘോഷിക്കുന്നു, പക്ഷേ അത് ഈ ലോകത്തിന്റേതല്ല, ‘ലോകം നൽകുന്നതുപോലെയുമല്ല”. (യോഹന്നാൻ 14:27). സഭയ്ക്ക് സ്വർഗ്ഗീയവും ആത്മീയവുമായ വിജയം നൽകാൻ പരിശുദ്ധാത്മാവ് ഉചിതമായി ഈ സ്ഥലം തിരഞ്ഞെടുത്തു. യോഹന്നാൻ അപ്പസ്തോലൻ പറയുന്നു, ”

ലോകത്തിന്‍മേലുള്ള വിജയം ഇതാണ്‌ – നമ്മുടെ വിശ്വാസം.” (1 യോഹന്നാൻ 5:4). . ക്രിസ്ത്യാനികളെന്ന നിലയിൽ, നിഖ്യയിൽ പ്രകടിപ്പിച്ച അപ്പസ്തോലിക വിശ്വാസം നമ്മുടെ വിജയമാണ്. ഈ വിശ്വാസത്താൽ പാപത്തിന്റെ സ്വേച്ഛാധിപത്യം നമ്മുടെ ജീവിതത്തിൽ ഇല്ലാതാക്കപ്പെടുന്നു, അസാന്മാർഗ്ഗികതയുടെ അടിമത്തം അഴിച്ചുവിടപ്പെടുന്നു, ഭൂമി സ്വർഗ്ഗത്തിലേക്ക് ഉയർത്തപ്പെടുന്നു.

നിഖ്യ വിശ്വാസ പ്രമാണം,

നമ്മുടെ മുഴുവൻ ക്രിസ്തീയ അസ്തിത്വത്തിനും ഒരു വിത്ത് പോലെ പ്രവർത്തിക്കുന്നു. ഇത് സമഗ്രതയുടെ ഒരു പ്രതീകമാണ്. നമ്മുടെ ഹൃദയത്തിൽ ജ്വലിക്കുന്ന നിഖ്യയുടെ വിശ്വാസ തീക്ഷ്ണതയാൽ, നമുക്ക് മുൻപിലുള്ള ക്രിസ്തീയ കൂട്ടായ്മയെന്ന ഓട്ടം ഓടാം. ‘യേശുക്രിസ്തുവിന്റെ വെളിപാടിൽ’ വാഗ്ദത്തം ചെയ്യപ്പെട്ടിരിക്കുന്ന കൃപയ്ക്കുവേണ്ടി നമുക്ക് ‘അവസാനം വരെ പ്രത്യാശിക്കാം’ (cf. 1 പത്രോസ് 1:13).

അവസാനമായി, ‘പിതാവും പുത്രനും പരിശുദ്ധാത്മാവും, ത്രിത്വവും അവിഭാജ്യവുമാണ്’ എന്ന ഏകമനസ്സോടെ ഏറ്റുപറയേണ്ടതിന് നമുക്ക് പരസ്പരം സ് നേഹിക്കാം. ആമേൻ!എക്യൂമെനിക്കൽ പാത്രിയർക്കീസിന്റെ സ്വാഗതപ്രസംഗത്തെത്തുടർന്ന് നടന്ന പ്രാർത്ഥനയ്ക്കും സുവിശേഷവായനയ്ക്കും ശേഷം, പാപ്പാ തന്റെ പ്രഭാഷണം നടത്തി.

“പ്രിയ സഹോദരീ സഹോദരങ്ങളെ,ആളുകളുടെ അന്തസ്സിന് തന്നെ എണ്ണമറ്റ ഭീഷണികൾ നേരിടുന്ന, നിരവധി ദാരുണമായ സംഭവങ്ങളാൽ അടയാളപ്പെടുത്തപ്പെട്ട ചരിത്ര കാലഘട്ടത്തിൽ, ഒന്നാമത് നിഖ്യ കൗൺസിലിന്റെ 1700 മത് വാർഷികം, നമ്മുടെ ജീവിതത്തിൽ, യേശുക്രിസ്തു ആരാണെന്നും, നമ്മിൽ ഓരോരുത്തർക്കും വ്യക്തിപരമായി അവൻ ആരാണെന്നും സ്വയം ചോദിക്കാനുള്ള വിലയേറിയ അവസരമാണ്. ആത്യന്തികമായി ദുഃഖത്തിലേക്കും ആശയക്കുഴപ്പത്തിലേക്കും നയിക്കുന്ന, യേശുക്രിസ്തുവിനെ ഒരുതരം കരിസ്മാറ്റിക് നേതാവോ സൂപ്പർമാനോ ആക്കി മാറ്റാനുള്ള പ്രവണതയുള്ള ക്രൈസ്തവർക്ക് ഈ ചോദ്യം വളരെ പ്രധാനപ്പെട്ടതാണ്.

ക്രിസ്തുവിന്റെ ദിവ്യത്വം നിഷേധിച്ചുകൊണ്ട്, ആരിയൂസ് അവനെ ദൈവത്തിനും മനുഷ്യവർഗത്തിനും ഇടയിലുള്ള കേവലമൊരു മദ്ധ്യസ്ഥനായി മാത്രം തരം താഴ്ത്തി. അങ്ങനെ മനുഷ്യാവതാരത്തിന്റെ യാഥാർഥ്യത്തെ അവഗണിക്കുകയും, ക്രിസ്തുവിന്റെ ദൈവീകതയെയും, മാനുഷികതയെയും ഒരിക്കലും തിരിച്ചുകൊണ്ടുവരുവാൻ ആവാത്തവിധം വേർപെടുത്തി. എന്നാൽ ദൈവം മനുഷ്യനായി മാറിയില്ലെങ്കിൽ, മർത്യജീവികൾക്ക് അവന്റെ അമർത്യജീവിതത്തിൽ എങ്ങനെ പങ്കുപറ്റുന്നതിനു കഴിയും?

നിഖ്യയിൽ ഉറപ്പിക്കപ്പെട്ടതും, ഇന്നു ഉറപ്പിക്കപ്പെടുന്നതും, ഒരേ കാര്യം തന്നെയാണ്: നമ്മെ ദൈവീക സ്വഭാവത്തിൽ പങ്കുകാരാക്കുന്നതിനു, യേശുക്രിസ്തുവിൽ, നമ്മെപ്പോലെയായിത്തീർന്ന ദൈവത്തിലുള്ള നമ്മുടെ വിശ്വാസം.പൂർണ്ണമായ കൂട്ടായ്മയിലേക്കുള്ള ക്രിസ്ത്യാനികളുടെ യാത്രയിൽ, വിശ്വാസത്തിന്റെ ഈ ക്രിസ്തുശാസ്ത്രപരമായ ഏറ്റുപറച്ചിലിന് അടിസ്ഥാന പ്രാധാന്യമുണ്ട്. കാരണം, ലോകമെമ്പാടുമുള്ള എല്ലാ ക്രിസ്ത്യൻ സഭകളും സമൂഹങ്ങളും, അവരുടെ ആരാധനാക്രമങ്ങളിൽ നിഖ്യ-കോൺസ്റ്റാന്റിനോപൊളിറ്റൻ വിശ്വാസപ്രമാണം ഉപയോഗിച്ചില്ലെങ്കിൽ പോലും ഈ സത്യം പങ്കുവയ്ക്കുന്നു.

“ഏകനാഥനും ദൈവത്തിൻ്റെ ഏകപുത്രനും എല്ലായുഗങ്ങൾക്കും മുമ്പ് പിതാവിൽ നിന്ന് ജനിച്ചവനും…പിതാവുമായി സത്തയിൽ ഏകനുമായ യേശുക്രിസ്തുവിലും ഞാൻ വിശ്വസിക്കുന്നു (നിഖ്യ വിശ്വാസപ്രമാണം) എന്നത് എല്ലാ ക്രിസ്ത്യാനികളെയും ഇതിനകം ഒന്നിപ്പിക്കുന്ന ഒരു അഗാധമായ ബന്ധമാണ്. ഈ അർത്ഥത്തിൽ, വിശുദ്ധ അഗസ്റ്റിനെ ഉദ്ധരിച്ച്, എക്യുമെനിക്കൽ സന്ദർഭത്തിൽ, “നമ്മൾ ക്രിസ്ത്യാനികൾ പലരാണെങ്കിലും, ഏക ക്രിസ്തുവിൽ നാം ഒന്നാണ്” ( സങ്കീർത്തനം 127-നെക്കുറിച്ചുള്ള വിശദീകരണം ) എന്നും നമുക്ക് പറയാൻ കഴിയും.

തൽഫലമായി, അത്തരമൊരു ആഴത്തിലുള്ള ബന്ധത്താൽ നാം ഇതിനകം ബന്ധപ്പെട്ടിരിക്കുന്നു എന്ന അവബോധത്തോടെ, പരിശുദ്ധാത്മാവിന്റെ മാർഗ്ഗനിർദ്ദേശത്തിൽ, പരസ്പര സ്നേഹത്തിലും സംഭാഷണത്തിലും യേശുക്രിസ്തുവിൽ വെളിപ്പെടുത്തിയിരിക്കുന്ന ദൈവവചനത്തോട് കൂടുതൽ ആഴത്തിൽ ചേർന്നുനിൽക്കുന്നതിനുള്ള നമ്മുടെ യാത്ര നമുക്ക് തുടരാം.

നിർഭാഗ്യവശാൽ ഇപ്പോഴും നിലനിൽക്കുന്ന ഭിന്നതകളുടെ അപവാദത്തെ മറികടക്കാനും, കർത്താവായ യേശു പ്രാർത്ഥിക്കുകയും ജീവൻ നൽകുകയും ചെയ്തുകൊണ്ട് നൽകിയ ഐക്യത്തിനായുള്ള ആഗ്രഹം പരിപോഷിപ്പിക്കാനും നാമെല്ലാവരും ക്ഷണിക്കപ്പെടുന്നു. നാം എത്രത്തോളം അനുരഞ്ജനത്തിലാകുന്നുവോ അത്രയധികം നാം ക്രിസ്ത്യാനികൾക്ക് യേശുക്രിസ്തുവിന്റെ സുവിശേഷത്തിന് വിശ്വസനീയമായ സാക്ഷ്യം വഹിക്കാൻ കഴിയും, അത് എല്ലാവർക്കും പ്രത്യാശയുടെ വിളംബരമായി മാറുകയും ചെയ്യും.

മാത്രമല്ല, നമ്മുടെ സമൂഹങ്ങളുടെയും രാഷ്ട്രങ്ങളുടെയും അതിരുകൾക്കപ്പുറത്തേക്ക് പോകുന്ന സമാധാനത്തിന്റെയും സാർവത്രിക സാഹോദര്യത്തിന്റെയും സന്ദേശമാണിത്. (

cf.ഫ്രാൻസിസ് പാപ്പാ, ക്രിസ്ത്യൻ ഐക്യം പ്രോത്സാഹിപ്പിക്കുന്നതിനുള്ള പൊന്തിഫിക്കൽ കൗൺസിലിന്റെ പ്ലീനറി സെഷനിൽ പങ്കെടുക്കുന്നവരെ അഭിസംബോധന ചെയ്തു നൽകിയ സന്ദേശം, 6 മെയ് 2022).

ഇന്ന്, അക്രമത്താലും സംഘർഷത്താലും വലയുന്ന മുഴുവൻ മനുഷ്യരാശിയും അനുരഞ്ജനത്തിനായി നിലവിളിക്കുന്നു. യേശുക്രിസ്തുവിലുള്ള എല്ലാ വിശ്വാസികളുടെയും ഇടയിൽ പൂർണ്ണമായ കൂട്ടായ്മയ്ക്കുള്ള ആഗ്രഹം, എല്ലാ മനുഷ്യരുടെയും ഇടയിൽ നിലനിനിൽക്കേണ്ടുന്ന സാഹോദര്യത്തിനുള്ള അന്വേഷണം അകമ്പടിസേവിക്കുന്നു. നിഖ്യ വിശ്വാസപ്രമാണത്തിൽ, “ഏക ദൈവത്തിൽ, പിതാവിൽ” നമ്മുടെ വിശ്വാസം നാം പ്രഖ്യാപിക്കുന്നു.

എന്നിരുന്നാലും, ദൈവത്തിന്റെ പ്രതിച്ഛായയിൽ സൃഷ്ടിക്കപ്പെട്ട മറ്റെല്ലാ പുരുഷന്മാരെയും സ്ത്രീകളെയും സഹോദരീസഹോദരന്മാരായി അംഗീകരിക്കാൻ നാം വിസമ്മതിച്ചാൽ ദൈവത്തെ പിതാവെന്ന് നമുക്ക് വിളിക്കാൻ കഴിയില്ല. (നോസ്ത്ര അയെത്താത്തെ, 5)വംശീയത, ദേശീയത, മതം അല്ലെങ്കിൽ വ്യക്തിപരമായ വീക്ഷണങ്ങൾ പരിഗണിക്കാതെ മനുഷ്യരുടെയിടയിൽ ഒരു സാർവത്രിക സാഹോദര്യം ഉണ്ട്.

മതങ്ങൾ, അവയുടെ സ്വഭാവത്താൽ, ഈ സത്യത്തിന്റെ കലവറകളാണ്, കൂടാതെ ഇത് തിരിച്ചറിഞ്ഞ് പ്രയോഗത്തിൽ വരുത്താൻ വ്യക്തികളെയും , കൂട്ടായ്മകളെയും, ജനങ്ങളെയും പ്രോത്സാഹിപ്പിക്കണം.

(cf. ലിയോ പതിനാലാമൻ, സമാധാനത്തിനായുള്ള പ്രാർത്ഥനാ യോഗത്തിന്റെ സമാപനപ്രസംഗം , 2025 ഒക്ടോബർ 28).

കൂടാതെ, യുദ്ധം, അക്രമം, അല്ലെങ്കിൽ ഏതെങ്കിലും തരത്തിലുള്ള മൗലികവാദം, മതഭ്രാന്ത് എന്നിവയെ ന്യായീകരിക്കുന്നതിന് മതത്തെ ഉപയോഗിക്കുന്നത് നാം ശക്തമായി എതിർക്കണം. പകരം, സാഹോദര്യപരമായ കൂടിക്കാഴ്ചയുടെയും, സംഭാഷണത്തിന്റെയും, സഹകരണത്തിന്റെയും പാതകളാണ് നാം പിന്തുടരേണ്ടത്.

പരിശുദ്ധ പിതാവ് ബർത്തലോമിയോയോട് ഞാൻ അഗാധമായ നന്ദിയുള്ളവനാണ്, കാരണം അദ്ദേഹം വളരെ ജ്ഞാനത്തോടെയും ദീർഘവീക്ഷണത്തോടെയും നിഖ്യാ കൗൺസിലിന്റെ 1700 -ാം വാർഷികം അത് നടന്ന സ്ഥലത്ത് തന്നെ ആഘോഷിക്കാൻ തീരുമാനിച്ചു. അതുപോലെ, ഈ പരിപാടിയിൽ പങ്കെടുക്കാനുള്ള ക്ഷണം സ്വീകരിച്ച സഭാ മേലധ്യക്ഷന്മാർക്കും, ആഗോള ക്രിസ്ത്യൻ കൂട്ടായ്മകളുടെ പ്രതിനിധികൾക്കും ഞാൻ ഊഷ്മളമായി നന്ദി പറയുന്നു.

സർവ്വശക്തനും കരുണാമയനുമായ പിതാവായ ദൈവത്തിനു ഇന്ന് നാം സമർപ്പിക്കുന്ന തീക്ഷ്ണമായ പ്രാർത്ഥനകൾ കേൾക്കട്ടെ, അതുപോലെ, ഈ പ്രധാനപ്പെട്ട വാർഷികം അനുരഞ്ജനത്തിന്റെയും ഐക്യത്തിന്റെയും സമാധാനത്തിന്റെയും സമൃദ്ധമായ ഫലങ്ങൾ പുറപ്പെടുവിക്കട്ടെ.പാപ്പായുടെ പ്രഭാഷണത്തിനും, തുടർന്ന് നടന്ന ഗാനാലാപനത്തിനും ശേഷം ഏവരും നിഖ്യ-കോൺസ്റ്റാന്റിനോപ്പിൾ വിശ്വാസപ്രമാണം ചൊല്ലുകയും ഗാനരൂപത്തിൽ ആലപിക്കപ്പെടുകയും ചെയ്തു.

ഇതേത്തുടർന്ന് ചില മധ്യസ്ഥ പ്രാർത്ഥനകൾ ഉണ്ടായിരുന്നു.പ്രാർത്ഥനകൾക്ക് ശേഷം സ്വർഗ്ഗസ്ഥനായ പിതാവേ എന്ന പ്രാർത്ഥന ഏവരും ഒരുമിച്ച് ചൊല്ലുകയും പാപ്പായും പാത്രിയർക്കീസും ചേർന്ന് ആശീർവാദം നൽകുകയും ചെയ്തു.

പാപ്പാ തിരികെ ഇസ്താൻബൂളിലേക്ക്

എക്യൂമെനിക്കൽ സമ്മേളനത്തിന് ശേഷം, കാറിൽ ഇസ്‌നിക്കിലെ ഹെലിപാഡിലേക്ക് എത്തിയ പാപ്പാ, അവിടെനിന്ന് 150 കിലോമീറ്ററുകൾ അകലെയുള്ള അതാത്യുക്ക് വിമാനത്താവളത്തിലേക്ക് വൈകുന്നേരം നാലരയോടെ ഹെലികോപ്റ്ററിൽ യാത്രയായി.

അവിടെനിന്ന് കാറിൽ വൈകുന്നേരം അഞ്ചരയോടെ അപ്പസ്തോലിക പ്രതിനിധി മന്ദിരത്തിലെത്തിയ പാപ്പാ, തുർക്കിയിലുള്ള മെത്രാന്മാരുമായി വൈകുന്നേരം ആറരയ്ക്ക് ഒരു സ്വകാര്യ കൂടിക്കാഴ്ച നടത്തുകയും, ഏഴുമണിയോടെ അവർക്കൊപ്പം അത്താഴം കഴിക്കുകയും ചെയ്തു.

ലത്തീൻ സഭയിലെ ഒരു അതിരൂപതയും രണ്ട് വികാരിയത്തുകളും കൽദായ, അർമേനിയൻ, സഭകളിൽനിന്നുള്ള രണ്ട് അതിരൂപതകളും, ഗ്രീക്ക് കത്തോലിക്കാ, സിറിയൻ സഭകളിൽനിന്നുള്ള രണ്ട് എസാർക്കാത്തുകളുമാണ് തുർക്കിയിലുള്ളത്.

പാപ്പാ നീല മോസ്കിൽ

നവംബർ 29 ശനിയാഴ്ച രാവിലെ എട്ടേമുക്കാലോടെ ഇസ്താൻബുളിൽ “നീല മോസ്‌ക്” (Blue Mosque) എന്ന പേരിൽ അറിയപ്പെടുന്ന സുൽത്താൻ അഹ്‌മദ്‌ മോസ്‌ക് (Mosque Sultan Ahmed) സന്ദർശിക്കാൻ പാപ്പാ കാറിൽ യാത്രയായി.

ഒൻപത് മണിയോടെ മോസ്കിലെത്തിയ പാപ്പായെ “മത കാര്യങ്ങൾക്കായുള്ള” കേന്ദ്രത്തിന്റെ പ്രസിഡന്റ് സാഫി അർപാഗൂഷ് സ്വാഗതം ചെയ്തു. തുടർന്ന് മോസ്കിൽ മറ്റുളളവർക്കൊപ്പം ആദരവും അവിടെ പ്രാർത്ഥനയ്ക്കായി ഒത്തുചേരുന്നവരുടെ വിശ്വാസത്തോടുള്ള ബഹുമാനവും പ്രകടിപ്പിച്ചുകൊണ്ട്, പാപ്പാ നിശ്ശബ്ദതയിൽ അല്പസമയം ചിലവഴിച്ചു.

അപ്പസ്തോലിക പ്രതിനിധി മന്ദിരത്തിൽനിന്ന് ഏതാണ്ട് ഒൻപത് കിലോമീറ്ററുകൾ അകലെയാണ്, 1609-നും 1617-നും ഇടയിൽ അഹ്‌മദ്‌ ഒന്നാമൻ സുൽത്താൻ പണി കഴിപ്പിച്ച ഈ മോസ്‌ക്. ഓട്ടോമൻ സാമ്രാജ്യത്തിലെ ആരാധനായിടങ്ങളിൽ ഏറെ പ്രധാനപ്പെട്ടതായിരുന്ന ഈ മോസ്‌ക്, കോൺസ്റ്റാന്റിനോപ്പിൾ കൊട്ടാരം നിലനിന്നിരുന്ന ഇടത്താണ് പണി കഴിപ്പിക്കപ്പെട്ടത്.

സാധാരണയായി നാല് മിനാരങ്ങളുള്ള മോസ്കുകളിൽനിന്ന് വ്യത്യസ്തമായി നീല മോസ്കിന് ആറ് മിനാരങ്ങളുണ്ട്. മെക്കയിലെ (Mecca) കഅബ (Ka’ba) മോസ്‌കിന് മാത്രമാണ് ഇതിൽ കൂടുതൽ, അതായത് ഏഴ്, മിനാരങ്ങളുള്ളത്. പാപ്പാ സിറിയൻ ഓർത്തഡോക്സ് സഭയുടെ ദേവാലയത്തിൽസുൽത്താൻ അഹ്‌മദ്‌ മോസ്‌കിലെ സന്ദർശനത്തിന് ശേഷം ഒൻപതരയോടെ പാപ്പാ അവിടെനിന്ന് ഏതാണ്ട് പതിനാറ് കിലോമീറ്ററുകൾ അകലെ, യെഷിൽകോയിൽ (Yeşilköy) 2023-ൽ പണിയപ്പെട്ട മാർ എഫ്രേം സിറിയൻ ഓർത്തഡോക്സ് ദേവാലയത്തിലേക്ക് യാത്രയായി.

തുർക്കി റിപ്പബ്ലിക്കിന്റെ മേൽനോട്ടത്തിൽ പണിയപ്പെട്ട ഏക ദേവാലയമണിത്. വിവിധ കാരണങ്ങളാൽ നീണ്ടുപോയ ഈ ദേവാലയത്തിന്റെ നിർമ്മിതിക്ക് ഏതാണ്ട് പത്തു വർഷങ്ങളോളമെടുത്തു. സിറിയയിൽ ആരംഭിച്ച സിറിയൻ ഓർത്തഡോക്സ് സഭയ്ക്ക് ലോകമെങ്ങും വിശ്വാസികളുണ്ട്. ഡമാസ്കസിലുള്ള അന്ത്യോക്യയിലെ സിറോ ഓർത്തഡോക്സ് പാത്രിയർക്കീസ് ഇഗ്‌നേഷ്യസ് എഫ്രേം രണ്ടാമനാണ് (Ignatius Aphrem II) ഈ സഭയുടെ തലവൻ.

ഏതാണ്ട് ഇരുപത് ലക്ഷത്തോളം വിശ്വാസികളാണ് ഈ സഭയിലുള്ളത്. സഭകളുടെ എക്യൂമെനിക്കൽ കൗൺസിലിൽ അംഗമായ ഇദ്ദേഹം, 2007-ൽ ആരംഭിച്ച “ക്രൈസ്തവ സഭകൾ ഒരുമിച്ച്” എന്ന എക്യൂമെനിക്കൽ പ്രസ്ഥാനത്തിന്റെ ജന്മത്തിന് പിന്നിൽ കാര്യമായി പ്രവർത്തിച്ചിട്ടുണ്ട്.

ദേവാലയത്തിലെത്തിയ പാപ്പായെ സിറോ ഓർത്തഡോക്സ് പാത്രിയർക്കീസും, അന്ത്യോക്യയിലെ സിറിയൻ ഓർത്തഡോക്സ് സഭയുടെ കീഴിൽ ഇസ്താൻബുളിലേക്കും, അങ്കാറയിലേക്കും ഇസ്മിറിലേക്കുമുള്ള മെത്രാപ്പോലീത്തയും ചേർന്ന് സ്വീകരിച്ചു. ദേവാലയത്തിലെത്തിയ മതനേതൃത്വങ്ങൾ, പരിശുദ്ധാത്മാവിനോടുള്ള ഒരു ഗാനം ആലപിക്കുകയും, ഒരു വട്ടമേശയ്ക്ക് ചുറ്റുമിരുന്ന് സംവാദത്തിലേർപ്പെടുകയും ചെയ്തു.

തുടർന്ന് പാപ്പാ ചെറിയൊരു പ്രഭാഷണവും നടത്തി. അടച്ച വാതിലുകൾക്ക് പിന്നിൽ നടന്ന ഈ സമ്മേളനം അവസാനിക്കുന്നതിന് മുൻപായി, അന്ത്യോക്യയിലെ സിറിയൻ ഓർത്തഡോക്സ് സഭയുടെ പാത്രിയർക്കീസിന്റെ വികാരി, സ്വർഗ്ഗസ്ഥനായ പിതാവേ എന്ന പ്രാർത്ഥന നയിച്ചു.

പാപ്പാ തിരികെ അപ്പസ്തോലിക പ്രതിനിധി മന്ദിരത്തിലേക്ക്പ്രാർത്ഥന അവസാനിച്ചതിനെത്തുടർന്ന്, പതിനൊന്നേമുക്കാലോടെ പാപ്പാ അപ്പസ്തോലിക പ്രതിനിധി മന്ദിരത്തിലേക്ക് കാറിൽ യാത്രയായി. ഉച്ചയ്ക്ക് പന്ത്രണ്ടേകാലോടെ അവിടെയെത്തിയ പാപ്പാ, ഉച്ചഭക്ഷണം കഴിച്ച ശേഷം വിശ്രമിച്ചു.