ബിജോ സില്വേരി
ലോകത്തിലെ ഏറ്റവും പഴക്കമേറിയ നാഗരികതകളില് ഒന്നായിരുന്നു ഈജിപ്തിലേത്. ബി.സി 3100-ഓടെയാണ് ഇതിന്റെ ഉദയം എന്ന് കരുതപ്പെടുന്നു. നൈല് നദിയായിരുന്നു ഈ നാഗരികതയുടെ ജീവരക്തം. ലിപികള്, ജ്യോതിശാസ്ത്രം, വൈദ്യശാസ്ത്രം എന്നീ മേഖലകളില് പുരാതന ഈജിപ്ത്തുകാര് കൈവരിച്ച നേട്ടങ്ങള് ഇന്നും ലോകത്തിന് മാതൃകയാണ്. ഈ സംസ്കാരം മനുഷ്യചരിത്രത്തിലെ തന്നെ ഏറ്റവും വലിയ അദ്ഭുതമായി നിലനില്ക്കുന്നു.
പുരാതന ഈജിപ്ഷ്യന് ചരിത്രത്തെ പ്രധാനമായും മൂന്ന് ഘട്ടങ്ങളായി തിരിക്കാം: ഓള്ഡ് കിംഗ്ഡം: പിരമിഡുകളുടെ നിര്മ്മാണകാലം. മിഡില് കിംഗ്ഡം: സാഹിത്യത്തിന്റെയും കലയുടെയും സുവര്ണ്ണകാലം. ന്യൂ കിംഗ്ഡം: ഈജിപ്ത് ഒരു സാമ്രാജ്യമായി വളര്ന്ന കാലം. ഫറവോമാരായ തൂത്തന്ഖാമന്, റാംസെസ് രണ്ടാമന് എന്നിവര് ഈ കാലഘട്ടത്തിലുള്ളവരാണ്.
ബൈബിളിലെ പഴയനിയമത്തിലെ പ്രധാന സംഭവങ്ങള് ഈജിപ്തിലെ വിവിധ കാലഘട്ടങ്ങളിലായാണ് നടക്കുന്നത്. ബൈബിള് ചരിത്രകാരന്മാരുടെയും പുരാവസ്തു ഗവേഷകരുടെയും അഭിപ്രായത്തില് ബൈബിളിലെ പഴയനിയമ കഥകള് ഈജിപ്തിലെ സുവര്ണ്ണകാലമായ മിഡില് കിംഗ്ഡം, ന്യൂ കിംഗ്ഡം എന്നീ കാലഘട്ടങ്ങളിലായാണ് വ്യാപിച്ചുകിടക്കുന്നത്. ഈ കാലഘട്ടങ്ങളിലാണ് ഈജിപ്ത് അതിന്റെ സൈനികവും സാംസ്കാരികവുമായ ഉന്നതിയില് നിന്നിരുന്നത്.
അവ പ്രധാനമായും താഴെ പറയുന്ന കാലഘട്ടങ്ങളിലായി വരുന്നു:
അബ്രാഹാമിന്റെയും ജോസഫിന്റെയും കാലം (മിഡില് കിംഗ്ഡം – ബി.സി. 2000 – 1600): അബ്രാഹാം ഈജിപ്ത് സന്ദര്ശിക്കുന്നതും പിന്നീട് ജോസഫ് (യൗസേപ്പ്) ഈജിപ്തിലെ ഭരണാധികാരിയാകുന്നതും മിഡില് കിംഗ്ഡം കാലഘട്ടത്തിലോ അല്ലെങ്കില് അതിനു തൊട്ടുപിന്നാലെ വന്ന ‘ഹിക്സോസ്’ ഭരണകാലത്തോ ആകാം എന്ന് കരുതപ്പെടുന്നു. വിദേശികളായ ഹിക്സോസ് രാജാക്കന്മാര് ഭരിച്ചിരുന്നതിനാലാണ് ഹെബ്രായനായ ജോസഫിന് ഉയര്ന്ന സ്ഥാനം ലഭിച്ചതെന്ന് ചില ചരിത്രകാരന്മാര് നിരീക്ഷിക്കുന്നു.
മോശയുടെയും പുറപ്പാടിന്റെയും കാലം (ന്യൂ കിംഗ്ഡം – ബി.സി. 1550 – 1070): ഈജിപ്തിന്റെ അടിമത്തത്തില് നിന്ന് മോടനം ലഭിച്ച ഇസ്രായേല് ജനത മോശയുടെ കീഴില് ഈ ജിപ്തില് നിന്ന് യാത്രയാരംഭിക്കുന്നത് ബൈബിള് ചരിത്രത്തിലെ ഏറ്റവും പ്രധാനപ്പെട്ട സംഭവങ്ങളിലൊന്നാണ്. ‘പുറപ്പാട്’ സംഭവിക്കുന്നത് ന്യൂ കിംഗ്ഡം കാലഘട്ടത്തിലാണ്.
ഭൂരിഭാഗം പണ്ഡിതന്മാരും കരുതുന്നത് ഇസ്രായേല് ജനത ഈജിപ്ത് വിട്ടുപോയത് ഫറവോയായ റാംസെസ് രണ്ടാമന്റെ ഭരണകാലത്താണെന്നാണ് (ഏകദേശം ബി.സി. 1250). എന്നാല് ചിലര് ഇത് അമെന്ഹോട്ടെപ് രണ്ടാമന്റെ കാലത്താണെന്നും വാദിക്കുന്നുണ്ട്.
മമ്മിഫിക്കേഷന്
മരണാനന്തര ജീവിതത്തില് വിശ്വസിച്ചിരുന്നവരായിരുന്നു പുരാതന ഈജിപ്ത്തുകാര്. ആത്മാവിന് തിരിച്ചുവരാന് ശരീരം കേടുകൂടാതെ സൂക്ഷിക്കണമെന്ന് അവര് വിശ്വസിച്ചു. ഇതിനായി അവര് രൂപപ്പെടുത്തിയ വിദ്യയാണ് മമ്മിഫിക്കേഷന്.
ശരീരത്തിലെ ആന്തരിക അവയവങ്ങള് നീക്കം ചെയ്ത് പ്രത്യേക തരം ഉപ്പും (Natron) എണ്ണകളും ഉപയോഗിച്ച് ശരീരം ഉണക്കിയെടുക്കുന്നു. ശേഷം പ്രത്യേകതരം തുണികൊണ്ട് ശരീരം പൊതിഞ്ഞ് പേടകത്തിലാക്കി സൂക്ഷിക്കുന്നു. ഇതാണ് ‘മമ്മികള്’.
പിരമിഡുകള്
ഫറവോമാരുടെ (രാജാക്കന്മാര്) ശവകുടീരങ്ങളായാണ് പിരമിഡുകള് നിര്മ്മിക്കപ്പെട്ടത്. ലോകാത്ഭുതങ്ങളില് ഒന്നായ ഗിസയിലെ മഹാ പിരമിഡ് ഖുഫു രാജാവിന് വേണ്ടിയാണ് നിര്മ്മിച്ചത്. ലക്ഷക്കണക്കിന് ഭാരമേറിയ കല്ലുകള് ഇത്രയും കൃത്യതയോടെ എങ്ങനെ അടുക്കിവെച്ചു എന്നത് ഇന്നും ശാസ്ത്രലോകത്തിന് പിടികിട്ടാത്ത വിസ്മയമാണ്.
സ്ഫിങ്ക്സ്
ഗിസയിലെ പിരമിഡുകള്ക്ക് കാവല് നില്ക്കുന്ന രൂപമാണ് സ്ഫിങ്ക്സ്. സിംഹത്തിന്റെ ഉടലും മനുഷ്യന്റെ തലയുമാണ് ഇതിനുള്ളത്. ഇത് ശക്തിയെയും ബുദ്ധിയെയും സൂചിപ്പിക്കുന്നു. ഒറ്റക്കല്ലില് കൊത്തിയെടുത്ത ലോകത്തിലെ ഏറ്റവും വലിയ പ്രതിമകളില് ഒന്നാണിത്. ഖഫ്രേ രാജാവിന്റെ മുഖമാണ് ഇതിനുള്ളതെന്ന് പല ചരിത്രകാരന്മാരും വിശ്വസിക്കുന്നു.
ഫറവോ
പുരാതന ഈജിപ്ഷ്യന് ഭരണാധികാരികളെ വിശേഷിപ്പിക്കാന് ഉപയോഗിക്കുന്ന ‘ഫറവോ’ എന്ന പദത്തിന് ഒരു ചരിത്രപശ്ചാത്തലമുണ്ട്. യഥാര്ത്ഥത്തില് ‘ഫറവോ’ എന്നത് രാജാവിനെ സൂചിപ്പിക്കുന്ന പദമായിരുന്നില്ല. ഇതിന്റെ ഉത്ഭവം ‘പെര്-ഓ’ എന്ന ഈജിപ്ഷ്യന് വാക്കില് നിന്നാണ്. ഇതിനര്ത്ഥം ‘വലിയ കൊട്ടാരം’ എന്നാണ്. തുടക്കത്തില് രാജാവ് താമസിക്കുന്ന കൊട്ടാരത്തെയായിരുന്നു ഈ പേര് കൊണ്ട് അര്ത്ഥമാക്കിയിരുന്നത്. എന്നാല് കാലക്രമേണ, കൊട്ടാരത്തെ സൂചിപ്പിക്കുന്ന വാക്ക് അവിടെ താമസിക്കുന്ന ഭരണാധികാരിയെ സൂചിപ്പിക്കാനായി ഉപയോഗിച്ചു തുടങ്ങി.
ഏകദേശം ബി.സി. 1400-കളില് (ന്യൂ കിംഗ്ഡം കാലഘട്ടത്തില്) തൂത്ത്മോസ് മൂന്നാമന്റെ ഭരണകാലം മുതലാണ് രാജാക്കന്മാരെ അഭിസംബോധന ചെയ്യാന് ‘ഫറവോ’ എന്ന പദം ഔദ്യോഗികമായി ഉപയോഗിച്ചു തുടങ്ങിയത്.
ഈജിപ്തിലെ രാജഭരണം ഏകദേശം 3,000 വര്ഷത്തോളം നീണ്ടുനിന്നു. ഏകദേശം ബി.സി. 3100-ല് ഈജിപ്തിനെ ഒന്നായി ഏകീകരിച്ച ‘നര്മര്’ (മെനസ്) രാജാവ് മുതല് ബി.സി. 30-ല് ക്ലിയോപാട്രയുടെ മരണം വരെയാണ് ഫറവോമാരുടെ കാലഘട്ടമായി കണക്കാക്കുന്നത്.
ഈജിപ്ഷ്യന് ജനതയ്ക്ക് ഫറവോ വെറുമൊരു രാജാവായിരുന്നില്ല. ഭൂമിയിലെ ദൈവത്തിന്റെ പ്രതിരൂപമായാണ് അവര് ഫറവോയെ കണ്ടിരുന്നത്. നീതിയും ക്രമവും നിലനിര്ത്തുക, ദൈവങ്ങള്ക്കും മനുഷ്യര്ക്കും ഇടയിലുള്ള മധ്യസ്ഥനായി പ്രവര്ത്തിക്കുക എന്നതൊക്കെയായിരുന്നു ഫറവോയുടെ പ്രധാന ചുമതലകള്. ഫറവോയെ മതപരമായ കാര്യങ്ങളില് സഹായിക്കാന് മായാജാലമറിയുന്ന മന്ത്രവാദികള് ഉണ്ടായിരുന്നതായി ബൈബിളില് പറയുണ്ട്. ഫറവോമാരുടെ അധികാരത്തിന്റെ അടയാളങ്ങളായിരുന്നു പ്രത്യേക തരം കിരീടങ്ങളും കയ്യിലേന്തുന്ന ചെങ്കോലും.
