ജയിംസ് അഗസ്റ്റിൻ
ചരിത്രത്തിന്റെ മന്ത്രധ്വനികൾ നിറഞ്ഞു നിൽക്കുന്ന ഫ്രഞ്ച് ഗ്രാമവീഥികളിലൊന്നിൽ തല ഉയർത്തി നിൽക്കുന്ന ഒരു മാന്ത്രിക സംഗീത ഗോപുരമുണ്ട്. പൂയ് ഡു ഫൗവിലെ Le Grand Carillon (ല ഗ്രാൻഡ് കാരിയോൺ). ആകാശത്തിന്റെ നീലിമയിൽ ഉയർന്നുനിൽക്കുന്ന മരഗോപുരം ഒരു സംഗീതോപകരണം എന്നതിലുപരി, വെങ്കല ശിൽപകലയും എഞ്ചിനീയറിംഗും ഭാവനയും ഒന്നുചേർന്ന ഒരു അത്ഭുത നിർമിതിയാണ്. 16 മീറ്റർ (ഏകദേശം 52 അടി) ഉയരമുള്ള ഭീമാകാരമായ ഒരു മ്യൂസിക്കൽ ക്ലോക്ക് ടവറിനുള്ളിലുള്ള സംഗീതോപകരണമാണ് ല ഗ്രാൻഡ് കാരിയോൺ.ഈ തടി ഗോപുരത്തിൽ പല വലിപ്പത്തിലുള്ള 70 വെങ്കല മണികൾ ഘടിപ്പിച്ചിട്ടുണ്ട്. ഇവയിൽ മനോഹരമായ സംഗീത ശകലങ്ങൾ വായിക്കാൻ സാധിക്കും.കായികാഭ്യാസികളായ കലാകാരന്മാർ ഈ ഗോപുരത്തിന് മുകളിലേക്ക് കയറി, കയറുകളിലും മെക്കാനിക്കൽ ലിവറുകളിലും തൂങ്ങി ആടിയാണ് ഈ മണികൾ കൃത്യമായ താളത്തിൽ മുഴക്കുന്നത്. ഗോപുരത്തിന്റെ മധ്യഭാഗത്തായി ക്രമീകരിച്ചിട്ടുള്ള പ്രത്യേക കീബോർഡിൽ (Baton Keyboard) ഒരു പ്രധാന സംഗീതജ്ഞൻ വിരലമർത്തുമ്പോൾ പെൻഡുലങ്ങൾ ചെറിയ മണികളിൽ തട്ടി സ്വരമുണ്ടാകുന്നു.ഇതിനൊപ്പം അതീവ നൈപുണ്യമുള്ള നാല് കലാകാരന്മാർ വായുവിൽ തൂങ്ങിക്കിടന്ന്, ഉയരത്തിൽ അക്രോബാറ്റിക് സംഗീതത്തിന്റെ താളത്തിനൊത്ത് വലിയ മണികളിൽ മാറിമാറി അടിച്ച് ശബ്ദം പുറപ്പെടുവിക്കുന്നു.
വെങ്കല മണികളിൽ കാലം കാത്തുവെച്ച ഈണങ്ങൾ കാറ്റിന്റെ ചിറകിലേറി ഒഴുകിയെത്തുമ്പോൾ, കേൾവിക്കാരൻ കേവലം ഒരു ആസ്വാദകൻ മാത്രമല്ല, മറിച്ച് നൂറ്റാണ്ടുകൾക്ക് പിന്നിലെ ഒരു ഫ്രഞ്ച് ഗ്രാമചത്വരത്തിലെ നിശ്ശബ്ദ സാക്ഷിയായി മാറുകയാണ്. കാരണം അവർ വായിക്കുന്നത് പതിനെട്ടാം നൂറ്റാണ്ടിന്റെ ഗൃഹാതുരത്വം ഉണർത്തുന്ന ഫ്രഞ്ച് നാടോടി സംഗീതമാണ്. വായുവിൽ പറന്നുയരുന്ന കായികാഭ്യാസി കൂടിയായ കലാകാരന്റെ താളാത്മകമായ ചലനങ്ങളിലൂടെയാണ് ഇവിടെ സംഗീതം ജനിക്കുന്നത്. അക്രോബാറ്റിക് നർത്തകരുടെ ചടുലമായ ചുവടുകളും, ഭാരമേറിയ വെങ്കല മണികളിൽ അവർ പതിപ്പിക്കുന്ന താളബദ്ധമായ പ്രഹരങ്ങളും ഒരു ദൃശ്യ-ശ്രാവ്യ വിസ്മയം തീർക്കുന്നു. ഫ്രാൻസിലെ പ്രശസ്തമായ Le Grand Carillon എന്ന അത്ഭുത നിർമിതി ലെ എപെസെസ് (Les Epesses) എന്ന സ്ഥലത്തുള്ള Puy du Fou (പ്യൂ ഡു ഫൗ) ഹിസ്റ്റോറിക്കൽ തീം പാർക്കിലാണ് സ്ഥിതി ചെയ്യുന്നത്. ചരിത്രപരമായ സംഭവങ്ങളെ ആസ്പദമാക്കിയുള്ള വമ്പൻ ദൃശ്യവിരുന്നുകൾക്കും പ്രകടനങ്ങൾക്കും പേരുകേട്ടതാണ് ഈ തീം പാർക്ക്.വെങ്കലമണികൾ നിർമിക്കുന്നതിനു പ്രശസ്തരായ ഫ്രാൻസിലെ പാക്കാർഡ് ഫൗണ്ട്രിയിലെ (Paccard Foundry) പരമ്പരാഗത നിർമ്മിതികേന്ദ്രങ്ങളിൽ പ്രത്യേക ഈയ-വെങ്കല അനുപാതത്തിലാണ് ഇവ വാർത്തെടുത്തിരിക്കുന്നത്. എല്ലാ മണികളും ഒരേ നിർമ്മാണശാലയിൽ നിന്നും ഒരേ കാലയളവിൽ പിറവിയെടുത്തതിനാൽഅവ പുറപ്പെടുവിക്കുന്ന ശബ്ദത്തിന് ലോകത്ത് മറ്റെങ്ങുമില്ലാത്ത തനതായ ശുദ്ധിയും ഗാംഭീര്യവുമുണ്ട്. 10 മുതൽ 12 മിനിറ്റ് വരെ നീണ്ടുനിൽക്കുന്ന ഈ സംഗീതവിരുന്ന് ദിവസത്തിൽ പലതവണ അരങ്ങേറാറുണ്ട്. 18-ാം നൂറ്റാണ്ടിലെ പ്രശസ്തമായ പരമ്പരാഗത ഫ്രഞ്ച് ജനപ്രിയ ഈണങ്ങളെയും ഫോക്ക് ഗീതങ്ങളെയും ആധുനിക രീതിയിൽ പുനഃക്രമീകരിച്ചാണ് ഈ മണിനാദ സംഗീതക്കച്ചേരി (Open-air Bell Concerto) ഒരുക്കിയിരിക്കുന്നത്.ക്രിസ്മസ് കാലയളവിൽ (ഡിസംബർ മധ്യത്തോടെ ആരംഭിച്ച് ജനുവരി ആദ്യവാരം വരെ) ഷോയിൽ പ്രത്യേക മാറ്റങ്ങൾ വരുത്താറുണ്ട്. ഈ സമയത്ത് ലോകപ്രശസ്തമായ ക്രിസ്മസ് കരോൾ ഈണങ്ങൾ മണികളിലൂടെ മുഴങ്ങും. ഗായകരും ഒപ്പം ചേരും.കണ്ണഞ്ചിപ്പിക്കുന്ന കായികാഭ്യാസ പ്രകടനങ്ങളും മണികളിൽ നിന്നുള്ള മനോഹരമായ സംഗീതവും ചേരുന്ന ഈ പ്രദര്‍ശനം കാണാൻ ലോകമെമ്പാടുമുള്ള സഞ്ചാരികൾ ഇവിടെയെത്താറുണ്ട്.
കേവലം യാന്ത്രികമായ ഒരു മണിനാദത്തിനപ്പുറം ഈ പ്രകടനത്തെ ഒരു മാന്ത്രികാനുഭവമാക്കുന്നത് വായുവിൽ തൂങ്ങിയാടി വീരനൃത്തം ചെയ്യുന്ന അക്രോബാറ്റിക് കലാകാരന്മാരാണ്. തൂങ്ങിക്കിടന്ന് ഭാരമേറിയ ഈ മണികളിൽ അവർ താളബദ്ധമായി അടിക്കുമ്പോൾ അതൊരു ദൃശ്യകാവ്യമായി മാറുന്നു. മാസങ്ങളോളം നീളുന്ന കഠിനമായ ശാരീരിക പരിശീലനത്തിനു ശേഷമാണ് ഇവർക്ക് ഈ സംഗീതോപകരണത്തിൽ പ്രവേശനം നൽകുന്നത്. മണികളിലേക്ക് പറന്നിറങ്ങി അവർ തീർക്കുന്ന താളം കാണികളിൽ ഒരേസമയം ആകാംക്ഷയും ആനന്ദവും നിറയ്ക്കുന്നു. സംഗീതജ്ഞന്റെ വിരലുകളും ആകാശ നർത്തകരുടെ ശരീര ചലനങ്ങളും ഒരേ തന്ത്രിയിൽ കോർത്തതുപോലെ ഒത്തുചേരുമ്പോൾ മാത്രമാണ് ‘ല ഗ്രാൻഡ് കാരിയോൺ’ എന്ന ഈ വിസ്മയം പൂർണ്ണതയിലെത്തുന്നത്കാലം എത്ര വേഗത്തിൽ മുന്നോട്ട് പാഞ്ഞാലും ചില സംഗീതങ്ങൾ നമ്മെ ഭൂതകാലത്തിന്റെ സുരഭിലമായ ഓർമകളിലേക്ക് തിരികെ നടത്തും. പൂയ് ഡു ഫൗവിലെ ‘ല ഗ്രാൻഡ് കാരിയോൺ’ കേവലം ഒരു ചരിത്ര പ്രദർശനമല്ല; അത് മനുഷ്യന്റെ സർഗാത്മകതയും വിട്ടുവീഴ്ചയില്ലാത്ത എഞ്ചിനീയറിംഗ് മികവും ഒത്തുചേർന്ന കലയുടെ പ്രതീകമാണ്. സാങ്കേതികവിദ്യയുടെ അതിപ്രസരമുള്ള ഈ ആധുനിക യുഗത്തിലും, നൂറ്റാണ്ടുകൾ പഴക്കമുള്ള വെങ്കല മണികളുടെ നാദം മനുഷ്യ ഹൃദയങ്ങളെ എത്രത്തോളം ആഴത്തിൽ സ്വാധീനിക്കുന്നു എന്നതിന്റെ തെളിവാണ് ഈ മ്യൂസിക്കൽ ടവർ സന്ദർശിക്കാനെത്തുന്ന ജനസഞ്ചയം.ആ മരഗോപുരത്തിൽ നിന്നും അവസാനത്തെ മണിനാദവും അന്തരീക്ഷത്തിൽ അലിഞ്ഞുതീരുമ്പോൾ, പ്രേക്ഷകന്റെയുള്ളിൽ ആ ഈണവും വായുവിൽ കലാകാരന്മാർ തീർത്ത ദൃശ്യവിസ്മയവും ഏറെക്കാലം മായാതെ കിടക്കും.
