പശ്ചിമ ബംഗാളിൽ ക്രൈസ്തവർക്കു നേരെയുണ്ടായ ആക്രമണം: കർശന നടപടി സ്വീകരിക്കണമെന്ന് കൊടിക്കുന്നിൽ സുരേഷ്

ചാരുമൂട്: പശ്ചിമ ബംഗാളിലെ പശ്ചിമ മേദിനിപൂർ ജില്ലയിൽ ചന്ദ്രകോണയിൽ ക്രൈസ്തവ കൂട്ടായ്മകൾക്കു നേരെ മതവിശ്വാസത്തിന്റെ പേരിൽ നടന്നതായി റിപ്പോർട്ട് ചെയ്യപ്പെട്ട ആക്രമണവും ഭീഷണികളും അത്യന്തം അപലപനീയമാണെന്ന് കൊടിക്കുന്നിൽ സുരേഷ് എം.പി. മതവിശ്വാസം ഉപേക്ഷിക്കാൻ നിർബന്ധിക്കുകയും സ്ത്രീകൾക്കും കുട്ടികൾക്കും നേരെ ഭീഷണികൾ ഉയർത്തുകയും ചെയ്തുവെന്ന പരാതികൾ ഇന്ത്യയിൽ ഭരണഘടനാ അവകാശങ്ങൾ ഉറപ്പാക്കേണ്ടതിന്റെ ആവശ്യകതയിലേക്കാണ് വിരൽചൂണ്ടുന്നതെന്നും അദ്ദേഹം പറഞ്ഞു. മതസ്വാതന്ത്ര്യം ഉറപ്പാക്കാനും സ്ത്രീകളുടെയും കുട്ടികളുടെയും സുരക്ഷ ഉറപ്പുവരുത്താനും മതത്തിന്റെ പേരിലുള്ള അക്രമങ്ങൾ ആവർത്തിക്കാതിരിക്കാനും പശ്ചിമ ബംഗാൾ സർക്കാർ അടിയന്തരമായി ഇടപെടണമെന്ന് കൊടിക്കുന്നിൽ സുരേഷ് എം.പി ആവശ്യപ്പെട്ടു.