പെറു : ലെയോ പതിനാലാമൻ പാപ്പായുടെ വരവിനായി ആവേശത്തോടെ കാത്തിരിക്കുകയാണ് പെറു. ലാറ്റിനമേരിക്കൻ ജനതയ്ക്ക് പാപ്പാ തങ്ങളിൽ ഒരാളാണെന്ന ആത്മബന്ധമാണുള്ളതെന്ന് കുസ്കോയുടെ കോഅഡ്ജുട്ടർ ആർച്ച് ബിഷപ്പും ലാറ്റിനമേരിക്കൻ, കരീബിയൻ മെത്രാൻ സമിതിയായ സെലാമിന്റെ സെക്രട്ടറി ജനറലുമായ ലിസാർഡോ എസ്ട്രാഡ ഹെരേര പറഞ്ഞു.നവംബർ 6 മുതൽ 17 വരെ നടക്കുന്ന പാപ്പായുടെ ലാറ്റിനമേരിക്കൻ അപ്പസ്തോലിക സന്ദർശനത്തിലെ മൂന്നാമത്തെ രാജ്യമാണ് പെറു. ഉറുഗ്വേ, അർജന്റീന എന്നീ രാജ്യങ്ങളിലെ സന്ദർശനത്തിനുശേഷമാണ് പാപ്പാ പെറുവിലെത്തുന്നത്.
പെറുവിൽ മിഷനറിയായി സേവനം ചെയ്തിരുന്ന കാലം മുതൽ ജനങ്ങളുമായി അടുത്ത ബന്ധം പുലർത്തിയിരുന്ന ലെയോ പാപ്പായെ ‘പെറുവിയൻ പാപ്പാ’ എന്നാണ് വിശേഷിപ്പിക്കുന്നത്. 1980-കളിലും 1990-കളിലും പിയൂറ, ട്രുഹില്ലോ മേഖലകളിൽ അഗസ്റ്റീനിയൻ സന്യാസിയായി മിഷനറി പ്രവർത്തനം നടത്തിയ അദ്ദേഹം, 2015-ൽ ചിക്ലായോ രൂപതയുടെ മെത്രാനായി നിയമിതനായി. 2020-ൽ കല്ലാവോ രൂപതയുടെ അപ്പസ്തോലിക അഡ്മിനിസ്ട്രേറ്ററായും ചുമതലയേറ്റു.വിവിധ വംശീയ വിഭാഗങ്ങൾ അധിവസിക്കുന്ന പെറുവുമായി പാപ്പായ്ക്ക് ആഴത്തിലുള്ള ബന്ധമാണുള്ളത്. പാപ്പായായി തിരഞ്ഞെടുക്കപ്പെട്ടതിനുശേഷവും തന്റെ പ്രിയപ്പെട്ട ചിക്ലായോ രൂപതയുമായുള്ള ആത്മബന്ധം അദ്ദേഹം കാത്തുസൂക്ഷിക്കുന്നു.
പാപ്പായുടെ സന്ദർശനത്തിനായുള്ള ഒരുക്കങ്ങൾ രാജ്യത്തുടനീളം ഉത്സവാന്തരീക്ഷം സൃഷ്ടിക്കുമ്പോൾ, ഒക്ടോബർ 30-ന് കുസ്കോ ആർച്ച് ബിഷപ്പ് റിച്ചാർഡ് ഡാനിയൽ അലാർക്കോൺ ഉറൂട്ടിയയുടെ നിര്യാണം രാജ്യത്തിന് ദുഃഖമായി. ഓഗസ്റ്റ് 29-ന് ലെയോ പാപ്പാ കുസ്കോയുടെ കോഅഡ്ജുട്ടർ ആർച്ച് ബിഷപ്പായി നിയമിച്ച ലിസാർഡോ എസ്ട്രാഡ ഹെരേരയാണ് വത്തിക്കാൻ മാധ്യമങ്ങളോട് സംസാരിച്ചത്.
