വത്തിക്കാൻ : യേശുക്രിസ്തുവിനെ പ്രഘോഷിക്കുകയും അവിടുത്തെ രക്ഷാകരമായ സ്നേഹം ലോകത്തിലെ എല്ലാ ജനതകളിലേക്കും എത്തിക്കുകയും ചെയ്യുക എന്നതാണ് സഭയുടെ അടിസ്ഥാനപരമായ വിളിയും ദൗത്യവുമെന്ന് ഓർമിപ്പിച്ച് മിഷൻ സന്ദേശം. ഇടവകകളുടെയും രൂപതകളുടെയും രാജ്യങ്ങളുടെയും അതിരുകൾക്കപ്പുറത്തേക്ക് ക്രിസ്തുവിന്റെ സ്നേഹം പകരാനുള്ള ഉത്തരവാദിത്വം ഓരോ വിശ്വാസിക്കുമുണ്ടെന്നും സന്ദേശം വ്യക്തമാക്കുന്നു.
ഒക്ടോബർ മാസത്തിലെ മിഷൻ ആഹ്വാനത്തിന് പിന്നാലെ നവംബർ മാസത്തിലേക്ക് പ്രവേശിക്കുമ്പോൾ പ്രേഷിത ദൗത്യത്തിന്റെ പ്രാധാന്യം വീണ്ടും ശ്രദ്ധാകേന്ദ്രമാകുന്നു. മിഷൻ അവബോധം, പ്രാർത്ഥന, ഉദാരമായ പങ്കുവെക്കൽ, സുവിശേഷത്തോടുള്ള പ്രതിബദ്ധത എന്നിവ വളർത്തുന്നതിനായി സഭ വിവിധ പ്രവർത്തനങ്ങളിലൂടെ വിശ്വാസികളെ പ്രചോദിപ്പിക്കുന്നു. ഇതിന്റെ ഭാഗമായി ആചരിക്കുന്ന ആഗോള മിഷൻ ഞായർ കേവലം ഒരു ദിനാചരണമല്ല, മറിച്ച് വിശ്വാസികളിൽ പ്രേഷിത മനോഭാവം വളർത്തുന്നതിനുള്ള ആഹ്വാനം കൂടിയാണ്.മിഷൻ പ്രദേശങ്ങൾക്കായുള്ള സംഭാവനകൾ, പിടിയരി പിരിവ്, മിഷൻ പങ്കുവെക്കൽ, മിഷൻ പ്രവർത്തനങ്ങളെക്കുറിച്ചുള്ള ബോധവത്കരണം എന്നിവ കേരളത്തിലെ മിഷൻ ഞായർ ആചരണത്തിന്റെ പ്രധാന സവിശേഷതകളാണ്. സഭ തനിക്കുവേണ്ടി മാത്രം നിലനിൽക്കുന്ന സമൂഹമല്ലെന്നും ലോകമെമ്പാടും സുവിശേഷത്തിന്റെ വെളിച്ചവും ക്രിസ്തുവിന്റെ സ്നേഹവും എത്തിക്കാനുള്ള ഉത്തരവാദിത്വം സഭയ്ക്കുണ്ടെന്നും ഈ ആചരണം ഓർമിപ്പിക്കുന്നു.
