വത്തിക്കാൻ സിറ്റി: റഷ്യ-ഉക്രൈൻ യുദ്ധത്തിൽ ദുരിതമനുഭവിക്കുന്ന ജനങ്ങൾക്ക് അടിയന്തര സഹായം ഉറപ്പാക്കുന്നതിനും സമാധാനശ്രമങ്ങൾ ശക്തിപ്പെടുത്തുന്നതിനും ആഹ്വാനം ചെയ്ത് ലെയോ പതിനാലാമൻ പാപ്പാ. ഉക്രൈൻ പ്രസിഡന്റ് വ്ളാദിമിർ സെലെൻസ്കിയുമായി ഫോണിൽ സംസാരിച്ച പാപ്പാ, ഖേർസൺ മേഖലയിലെ ഓലെഷ്കി നഗരത്തിലെ ഗുരുതരമായ സാഹചര്യത്തിൽ പ്രത്യേക ആശങ്ക രേഖപ്പെടുത്തി.
ഓലെഷ്കിയിൽ അടിയന്തരമായി മാനുഷിക വെടിനിർത്തൽ നടപ്പാക്കണമെന്ന ആവശ്യം റഷ്യൻ പ്രസിഡന്റ് വ്ളാദിമിർ പുടിനോട് ഉന്നയിച്ച കാര്യം പാപ്പാ സംഭാഷണത്തിൽ പരാമർശിച്ചു. ഇരുവിഭാഗങ്ങളുടെയും സഹകരണം ഉറപ്പായാൽ മാത്രമേ ഭക്ഷണവും വൈദ്യസഹായവും എത്തിക്കാനും സാധാരണക്കാരെ സുരക്ഷിതമായി ഒഴിപ്പിക്കാനും കഴിയൂവെന്നും അദ്ദേഹം ചൂണ്ടിക്കാട്ടി. സംഘർഷങ്ങൾക്ക് പരിഹാരം കണ്ടെത്താൻ സംഭാഷണവും നയതന്ത്ര ഇടപെടലുകളും അനിവാര്യമാണെന്ന വത്തിക്കാന്റെ നിലപാടും പാപ്പാ ആവർത്തിച്ചു. ശസ്ത്രക്രിയയ്ക്കുശേഷം റോമിലെ ജെമെല്ലി ആശുപത്രിയിൽ ചികിത്സയിലായിരിക്കെ ഒക്ടോബർ 16ന് പുടിനുമായും പാപ്പാ ഫോണിൽ സംസാരിച്ചിരുന്നു. യുദ്ധത്തിന്റെ ദുരിതങ്ങൾ അനുഭവിക്കുന്ന ജനതയോടുള്ള ഐക്യദാർഢ്യവും സമാധാനം പുനഃസ്ഥാപിക്കാനുള്ള സഭയുടെ പ്രതിബദ്ധതയുമാണ് പാപ്പായുടെ തുടർച്ചയായ ഇടപെടലുകളിലൂടെ വ്യക്തമാകുന്നത്.
