പ്രാർത്ഥിക്കുന്നതിന് മുമ്പ് ഒപ്പിടണം: മഹാരാഷ്ട്രയിലെ പുതിയ മതപരിവർത്തന നിയമം വിശ്വാസികളെയും ബാധിക്കുന്നു

മുംബൈ : ഇന്ത്യയുടെ സാമ്പത്തിക തലസ്ഥാനമായ മുംബൈയിലും പരിസരപ്രദേശങ്ങളിലുമുള്ള ചില ദേവാലയങ്ങളിൽ പ്രാർത്ഥനയ്ക്കെത്തുന്ന വിശ്വാസികളോട് എഴുത്തുപരമായ ഒരു പ്രഖ്യാപനം നൽകാൻ ആവശ്യപ്പെടുന്നതായി റിപ്പോർട്ട്. “ഞാൻ എന്റെ സ്വന്തം ഇച്ഛപ്രകാരമാണ് ഇവിടെ പ്രാർത്ഥിക്കാൻ എത്തിയത്” എന്നാണ് പ്രഖ്യാപനത്തിൽ രേഖപ്പെടുത്തേണ്ടത്.പ്രാർത്ഥനയ്ക്കെത്തുന്നവർ സ്വന്തം പേര് രേഖപ്പെടുത്തുകയും ചിലയിടങ്ങളിൽ തിരിച്ചറിയൽ രേഖയുടെ നമ്പർ കൂടി നൽകുകയും തുടർന്ന് ആരും നിർബന്ധിക്കുകയോ പ്രലോഭിപ്പിക്കുകയോ ചെയ്തിട്ടില്ലെന്ന് വ്യക്തമാക്കിക്കൊണ്ട് ഒപ്പിടുകയും ചെയ്യുന്നു. ഈ ഫോമുകൾക്ക് ഔദ്യോഗിക നിയമസാധുതയില്ല. എന്നാൽ പ്രാർത്ഥനാ യോഗം ചോദ്യം ചെയ്യപ്പെടുകയും സംഘാടകർ മതപരിവർത്തനത്തിന് ശ്രമിച്ചെന്ന ആരോപണം ഉയരുകയും ചെയ്താൽ തെളിവായി സൂക്ഷിക്കാനാണ് ചില ദേവാലയങ്ങൾ ഇവ ഉപയോഗിക്കുന്നത്.മഹാരാഷ്ട്രയിൽ പുതിയ മതപരിവർത്തന വിരുദ്ധ നിയമം പ്രാബല്യത്തിൽ വരുന്നതിന് തൊട്ടുമുമ്പ്, ഓഗസ്റ്റ് അവസാനത്തോടെയാണ് ചില ദേവാലയങ്ങളിൽ ഈ നടപടി ആരംഭിച്ചത്.ബലപ്രയോഗം, വഞ്ചന, നിർബന്ധം, പ്രലോഭനം എന്നിവയിലൂടെ നടത്തുന്ന മതപരിവർത്തനം പുതിയ നിയമം നിരോധിക്കുന്നു. സ്വന്തം ഇച്ഛപ്രകാരം മതം മാറാൻ ആഗ്രഹിക്കുന്നവരും മുൻകൂട്ടി അധികൃതരെ അറിയിക്കണമെന്നും നിയമം വ്യവസ്ഥ ചെയ്യുന്നു. നിയമവിരുദ്ധമായ മതപരിവർത്തനത്തിന് ഏഴ് വർഷം വരെ തടവ് ലഭിക്കാം. ആവർത്തിച്ച് കുറ്റം ചെയ്താൽ ശിക്ഷ പത്ത് വർഷം വരെ ഉയരാനും സാധ്യതയുണ്ട്.സാമൂഹികമായോ സാമ്പത്തികമായോ പിന്നാക്കാവസ്ഥയിലുള്ളവരെ പ്രത്യേകമായി ലക്ഷ്യമിട്ട് നിർബന്ധിച്ചോ വഞ്ചിച്ചോ മതം മാറ്റുന്നതിൽ നിന്ന് സംരക്ഷിക്കുകയാണ് നിയമത്തിന്റെ ലക്ഷ്യമെന്ന് മഹാരാഷ്ട്ര സർക്കാർ വ്യക്തമാക്കുന്നു.