വത്തിക്കാൻ: യഹൂദരുടെ മതോത്സവങ്ങളായ റോഷ് ഹ ഷാന, യോം കിപ്പൂർ, സുക്കോട്ട് എന്നിവയോടനുബന്ധിച്ച് പാപ്പാ ആശംസകൾ നേർന്നു.
റോമിലെ മുഖ്യ യഹൂദ റബീ റിക്കാർദൊ ദി സേഞ്ഞിക്ക് സെപ്റ്റംബർ 22-ന് തിങ്കളാഴ്ചയാണ് ലിയൊ പതിനാലാമൻ പാപ്പാ ആശംസാ ടെലെഗ്രാം സന്ദേശം അയച്ചത്.
ജൂത പുതുവത്സരമാണ് റോഷ് ഹ ഷാന. സെപ്റ്റംബറിലൊ ഒക്ടോബറിലോ ആയിവരുന്ന ദ്വിദിന ഉത്സവമാണിത്. യഹൂദ പഞ്ചാംഗത്തിലെ ഏറ്റവും വിശുദ്ധ ദിനമായി ആചരിക്കപ്പെടുന്നതാണ് ഉപവാസത്തിൻറെയും പ്രാർത്ഥനയുടെയും അനുതാപത്തിൻറെയും ദിനമായ യോം കിപ്പൂർ.
റോഷ് ഹ ഷാനയ്ക്കു ശേഷം പത്താം ദിനത്തിലാണ് ഈ പുണ്യദിനം. സുക്കോട്ട് കൂടാരത്തിരുന്നാൾ ആണ്. ഈജിപ്തിൽ നിന്നുള്ള പുറപ്പാടിനു ശേഷം ഇസ്രായേൽ ജനം മരുഭൂമിയിൽ അലഞ്ഞ ആ കാലഘട്ടത്തെ അനുസ്മരിപ്പിക്കുന്ന ഒരാഴ്ച നീളുന്ന ഉത്സവമാണ് സുക്കോട്ട്.
ആസന്നമായിരിക്കുന്ന ഈ തിരുന്നാളുകളോടനുബന്ധിച്ച് റബീ റിക്കാർദൊ ദി സേഞ്ഞിക്കും റോമിലെ യഹൂദ സമൂഹത്തിനു മുഴുവനും താൻ ഹൃദയംഗമാമായി ആശംസകൾ അർപ്പിക്കുകയും കഴിഞ്ഞ മെയ് 18-ന് തൻറെ പത്രോസിനടുത്ത ശുശ്രൂഷയുടെ ആരംഭദിനത്തിൽ റബീ സേഞ്ഞി പങ്കെടുത്തത് കൃതജ്ഞതാപുർവ്വം അനുസ്മരിക്കുകയും ചെയ്യുന്നുവെന്ന് പാപ്പാ ആശംസാസന്ദേശത്തിൽ അറിയിക്കുന്നു.
നിത്യനായ ദൈവം തൻറെ അപരിമേയ നന്മയാൽ യഹൂദ സമൂഹത്തിൻറെ ചാരെയായിരിക്കട്ടെയെന്നും, നമുക്കിടയിലും, റോം നഗരത്തിലും, ലോകമെമ്പാടും ആഴത്തിലുള്ള സൗഹൃദം നിലനിർത്താൻ നമ്മൾ നടത്തുന്ന എല്ലാ ശ്രമങ്ങളെയും തുണയ്ക്കട്ടെയെന്നും പാപ്പാ ആശംസിക്കുന്നു.
ദൈവം, തൻറെ അനന്തമായ കാരുണ്യത്താൽ, സമാധാന ദാനവും അത് സദാ പരിപോഷിപ്പിക്കാനുള്ള അശ്രാന്ത അഭിവാഞ്ഛയും നമുക്ക് പ്രദാനം ചെയ്യട്ടെയെന്നും പാപ്പാ പ്രാർത്ഥിക്കുന്നു. നിങ്ങൾക്ക് സമാധാനം എന്നർത്ഥം വരുന്ന ഷാലോം അലെഹെം എന്ന ഹീബ്രു ഭാഷയിലുള്ള ആശംസയോടെയാണ് പാപ്പാ ടെലെഗ്രാം സന്ദേശം ഉപസംഹരിക്കുന്നത്.
