ബ്യൂണസ് അയേഴ്സ്: ഉറുഗ്വായിലെ അപ്പസ്തോലിക സന്ദർശനം പൂർത്തിയാക്കി ലെയോ പതിനാലാമൻ പാപ്പ അർജന്റീനയിലെത്തി. അപ്പസ്തോലിക യാത്രയുടെ മൂന്നാം ദിനമായ നവംബർ 9 ഞായറാഴ്ച ഉറുഗ്വേയുടെ സംരക്ഷകയായ ‘ഔവർ ലേഡി ഓഫ് ദി തേർട്ടി-ത്രീ’ ദേശീയ തീർഥാടനകേന്ദ്രത്തിൽ വിശുദ്ധ കുർബാന അർപ്പിച്ചുകൊണ്ടാണ് പാപ്പ ദിനത്തിലെ പരിപാടികൾക്ക് തുടക്കമിട്ടത്.
ത്രികാലപ്രാർഥനയ്ക്കും ഉറുഗ്വേയിലെ മെത്രാന്മാരുമൊത്തുള്ള ഉച്ചഭക്ഷണത്തിനും ശേഷം മോന്തെവിദിയോയിൽനിന്ന് പുറപ്പെട്ട പാപ്പ പ്രാദേശിക സമയം വൈകുന്നേരം 4.33ന് ബ്യൂണസ് അയേഴ്സിലെ എയറോപാർക്ക് ജോർജ് ന്യൂബെറി വിമാനത്താവളത്തിലെത്തി. അർജന്റീന പ്രസിഡന്റ് ഹാവിയർ മിലി നേരിട്ടെത്തി പാപ്പയെ സ്വീകരിച്ചു.തുടർന്ന് അർജന്റീനയുടെ ദേശീയ നായകനായ ജനറൽ ഹൊസെ ഡി സാൻ മാർട്ടിന്റെ സ്മാരകത്തിൽ ആദരമർപ്പിച്ച പാപ്പ, കാസ റൊസാഡയിൽ പ്രസിഡന്റ് മിലിയുമായി സ്വകാര്യ കൂടിക്കാഴ്ച നടത്തി. ബ്യൂണസ് അയേഴ്സ് നഗരത്തിന്റെ ആദരസൂചകമായി നഗരത്തിന്റെ താക്കോലും ചടങ്ങിൽ പാപ്പയ്ക്ക് സമ്മാനിച്ചു. പലാസിയോ ലിബർത്താഡിൽ രാജ്യത്തെ രാഷ്ട്രീയ നേതാക്കൾ, സിവിൽ സമൂഹ പ്രതിനിധികൾ, നയതന്ത്രജ്ഞർ എന്നിവരെ അഭിസംബോധന ചെയ്ത പാപ്പ ജീവന്റെ സംരക്ഷണം, സാമ്പത്തിക അവസരങ്ങളുടെ ലഭ്യത, സാമൂഹിക ഐക്യം എന്നിവയുടെ പ്രാധാന്യം എടുത്തുപറഞ്ഞു. മുൻഗാമിയായ ഫ്രാൻസിസ് പാപ്പയ്ക്ക് ആദരമർപ്പിച്ച അദ്ദേഹം, ഫ്രാൻസിസ് പാപ്പയുടെ ജന്മനാട്ടിലൂടെയുള്ള തന്റെ യാത്ര അദ്ദേഹത്തിന്റെ പാത പിന്തുടരാനുള്ള അവസരമാണെന്നും വിശേഷിപ്പിച്ചു.
സന്ദർശനത്തിന്റെ തുടർന്നുള്ള ദിവസങ്ങളിൽ ക്ലേപോൾ മേഖലയിലെ ‘ലിറ്റിൽ കൊട്ടോലെംഗോ ഡോൺ ഒറിയോൺ’ സന്ദർശനം, ബ്യൂണസ് അയേഴ്സിൽ വിശുദ്ധ കുർബാന, തൊഴിൽമേഖലാ പ്രതിനിധികൾ, വിവിധ മതനേതാക്കൾ, അർജന്റീനയിലെ മെത്രാന്മാർ എന്നിവരുമായുള്ള കൂടിക്കാഴ്ചകൾ എന്നിവയാണ് പാപ്പയുടെ പരിപാടികളിലുള്ളത്.
