വിശുദ്ധ ഫ്രാൻസിസ് അസീസ്സി നിത്യസമ്മാനത്തിന് വിളിക്കപ്പെട്ടിട്ട് 800 വർഷം

അസീസ്സി (ഇറ്റലി): സകല സൃഷ്ടികളെയും ദൈവസ്നേഹത്തിന്റെ കണ്ണുകളിലൂടെ കണ്ടും ദാരിദ്ര്യവും എളിമയും ജീവിതത്തിൽ സ്വീകരിച്ചും ക്രിസ്തുവിന്റെ സ്നേഹവും സമാധാനവും ലോകത്തിന് പകർന്നുനൽകിയ വിശുദ്ധ ഫ്രാൻസിസ് അസീസ്സി നിത്യസമ്മാനത്തിന് വിളിക്കപ്പെട്ടിട്ട് 800 വർഷം.1226 ഒക്ടോബർ 4-ന് ഇറ്റലിയിലെ പോർസ്യുങ്കുളയിൽവച്ചാണ് ക്രിസ്തുസ്നേഹത്തിന്റെ സാക്ഷിയായി ജീവിച്ച വിശുദ്ധ ഫ്രാൻസിസ് അസീസ്സി സ്വർഗീയ പിതാവിന്റെ സന്നിധിയിലേക്ക് യാത്രയായത്. വിശുദ്ധന്റെ സ്വർഗീയ യാത്രയുടെ 800-ാം വാർഷികാഘോഷങ്ങൾക്ക് അസീസ്സിയിൽ നേരത്തെ തന്നെ തുടക്കമായിരുന്നു.വിശുദ്ധ ഫ്രാൻസിസിന്റെ ജീവിതവും ആത്മീയ പൈതൃകവും സൃഷ്ടികളോടുള്ള കരുതലും സമാധാനത്തിനായുള്ള അദ്ദേഹത്തിന്റെ സാക്ഷ്യവും അനുസ്മരിച്ചുകൊണ്ടാണ് വാർഷികാഘോഷങ്ങൾ സംഘടിപ്പിക്കുന്നത്. ദാരിദ്ര്യവും ലാളിത്യവും സാഹോദര്യവും സുവിശേഷജീവിതത്തിന്റെ കേന്ദ്രമാക്കിയ വിശുദ്ധന്റെ സന്ദേശം ഇന്നും ലോകത്തിന് പ്രചോദനമായി തുടരുന്നു.