സാൽസ്ബർഗ്: യൂറോപ്യൻ മെത്രാൻ സമിതികളുടെ കൗൺസിലിന്റെ (CCEE) 2026–2031 കാലയളവിലേക്കുള്ള വൈസ് പ്രസിഡന്റായി ആർച്ച് ബിഷപ്പ് ഈമൺ മാർട്ടിൻ തിരഞ്ഞെടുക്കപ്പെട്ടു. സുവിശേഷവത്കരണം, സിനഡാത്മകത, യൂറോപ്പിലെ സഭയുടെ ദൗത്യം എന്നിവയെക്കുറിച്ച് ചർച്ച ചെയ്യുന്നതിനായി ഓസ്ട്രിയയിലെ സാൽസ്ബർഗിൽ യൂറോപ്യൻ സഭാനേതാക്കൾ ഒത്തുചേർന്നപ്പോഴായിരുന്നു തിരഞ്ഞെടുപ്പ്.
ഒക്ടോബർ 27 മുതൽ 30 വരെ നടന്ന CCEE പ്ലീനറി സമ്മേളനത്തിനിടെ ഒക്ടോബർ 29 വ്യാഴാഴ്ചയായിരുന്നു തിരഞ്ഞെടുപ്പ്. യൂറോപ്പിലെ വിവിധ രാജ്യങ്ങളിലെ കത്തോലിക്കാ മെത്രാൻ സമിതികളുടെ അധ്യക്ഷന്മാർ സമ്മേളനത്തിൽ പങ്കെടുത്തു.ലിത്വാനിയയിലെ വിൽനിയസ് ആർച്ച് ബിഷപ്പ് ഗിന്റാരസ് ഗ്രുഷാസ് പ്രസിഡന്റായി വീണ്ടും തിരഞ്ഞെടുക്കപ്പെട്ടു. ക്രൊയേഷ്യയിലെ സാഗ്രെബ് ആർച്ച് ബിഷപ്പ് ഡ്രാസെൻ കുട്ലേഷയും വൈസ് പ്രസിഡന്റായി തിരഞ്ഞെടുക്കപ്പെട്ടു. ഇവർക്കൊപ്പമായിരിക്കും ആർച്ച് ബിഷപ്പ് ഈമൺ മാർട്ടിൻ പുതിയ ഉത്തരവാദിത്വം നിർവഹിക്കുക.അയർലണ്ടിലെ അജപാലന നേതൃത്വത്തിലൂടെ നേടിയ അനുഭവസമ്പത്ത് യൂറോപ്യൻ സഭയുടെ വിശാലമായ ദൗത്യത്തിനായി വിനിയോഗിക്കാനുള്ള സുപ്രധാന ഉത്തരവാദിത്വമാണ് പുതിയ നിയമനത്തിലൂടെ ആർച്ച് ബിഷപ്പ് ഈമൺ മാർട്ടിന് ലഭിച്ചിരിക്കുന്നത്.അർമാഗ് ആർച്ച് ബിഷപ്പും അയർലണ്ടിന്റെ പ്രഥമ മെത്രാനുമായ അദ്ദേഹം 2014 ഒക്ടോബർ മുതൽ ഐറിഷ് കത്തോലിക്കാ മെത്രാൻ സമിതിയുടെ അധ്യക്ഷനായി സേവനമനുഷ്ഠിച്ചുവരികയാണ്.
സുവിശേഷവത്കരണം, കത്തോലിക്കാ വിദ്യാഭ്യാസം, സഭാജീവിതത്തിൽ യുവജനങ്ങളുടെ പങ്കാളിത്തം, അയർലണ്ടിലെ സിനഡാത്മകതയുടെ വളർച്ച എന്നിവയ്ക്ക് അദ്ദേഹം പ്രത്യേക പ്രാധാന്യം നൽകിവരുന്നു.യൂറോപ്പിലെ 45 രാജ്യങ്ങളിലെ കത്തോലിക്കാ സഭയെ പ്രതിനിധീകരിക്കുന്ന 39 അംഗങ്ങളാണ് CCEE-യിലുള്ളത്. യൂറോപ്യൻ രാജ്യങ്ങളിലെ സഭകൾ തമ്മിലുള്ള ഐക്യവും സഹകരണവും കൂട്ടായ ചിന്തകളും പ്രോത്സാഹിപ്പിക്കുകയാണ് കൗൺസിലിന്റെ പ്രധാന ലക്ഷ്യം. ഭൂഖണ്ഡം നേരിടുന്ന അജപാലനപരവും ആത്മീയവും സാമൂഹികവുമായ വെല്ലുവിളികളെ ഒരുമിച്ച് അഭിമുഖീകരിക്കുന്നതിനും കൗൺസിൽ നേതൃത്വം നൽകുന്നു.
