വത്തിക്കാൻ സിറ്റി: ലെയോ പതിനാലാമൻ പാപ്പായുടെ ആരോഗ്യത്തിനായി ഏഷ്യയുടെ വിവിധ ഭാഗങ്ങളിലെ കത്തോലിക്കാ സഭകൾ പ്രാർത്ഥനകൾ സംഘടിപ്പിക്കുന്നു. ശ്വാസകോശത്തിൽ കണ്ടെത്തിയ മുഴ നീക്കം ചെയ്യുന്നതിനുള്ള ശസ്ത്രക്രിയ നടത്തുമെന്ന് ഒക്ടോബർ 11-ന് വത്തിക്കാനിൽ ത്രികാലജപ പ്രാർത്ഥനയ്ക്കുശേഷം പാപ്പാ അറിയിച്ചതോടെയാണ് വിവിധ രാജ്യങ്ങളിൽ പ്രാർത്ഥനകൾക്ക് ആഹ്വാനമുയർന്നത്.
ഇന്ത്യ, മ്യാൻമർ, ഫിലിപ്പീൻസ്, തായ്‌ലൻഡ്, ദക്ഷിണകൊറിയ, ജപ്പാൻ, മധ്യേഷ്യൻ രാജ്യങ്ങൾ എന്നിവിടങ്ങളിലെ സഭകൾ പാപ്പായ്ക്കായി പ്രത്യേക പ്രാർത്ഥനകൾ നടത്തി. വിവിധ രാജ്യങ്ങളിലെ മെത്രാൻ സമിതികളുടെ അറിയിപ്പുകൾ ഉദ്ധരിച്ച് ഫീദെസ് വാർത്താ ഏജൻസിയാണ് ഇക്കാര്യം റിപ്പോർട്ട് ചെയ്തത്. ഇന്ത്യൻ കത്തോലിക്കാ മെത്രാൻ സമിതി അധ്യക്ഷനും ഗോവ-ദമൻ അതിരൂപതാധ്യക്ഷനുമായ കർദിനാൾ ഫിലിപ്പ് നേരി ഫെറാവോ രാജ്യത്തെ രൂപതകൾക്കും ഇടവകകൾക്കും സന്ന്യാസസമൂഹങ്ങൾക്കും പാപ്പായുടെ ആരോഗ്യത്തിനായി പ്രാർത്ഥിക്കണമെന്ന് അഭ്യർഥിച്ചു. ജപമാല മാസമായ ഒക്ടോബറിൽ വ്യക്തിപരമായും സമൂഹമായും പരിശുദ്ധ അമ്മയുടെ മാധ്യസ്ഥം തേടി പ്രാർത്ഥനകൾ നടത്തണമെന്നും അദ്ദേഹം ആഹ്വാനം ചെയ്തു.
മ്യാൻമറിലെ കത്തോലിക്കാ മെത്രാൻ സമിതി അധ്യക്ഷൻ കർദിനാൾ ചാൾസ് ബോയും പാപ്പായുടെ ആരോഗ്യത്തിനായി ദേശീയ തലത്തിൽ പ്രാർത്ഥനകൾക്ക് ആഹ്വാനം നൽകി. ഏഷ്യയിലെ വിവിധ പ്രാദേശികസഭകൾ പാപ്പായോടുള്ള ഐക്യദാർഢ്യവും കരുതലും പ്രാർത്ഥനകളിലൂടെ പ്രകടിപ്പിക്കുകയാണ്.
