കൊച്ചി: ഒരു ആദ്ധ്യാത്മിക ആചാര്യനും കടന്നുചെല്ലാത്ത വഴികളിലൂടെ സഞ്ചരിച്ച മഹനീയ വ്യക്തിത്വമായിരുന്നു ഫ്രാൻസീസ് പാപ്പയുടേതെന്ന് പ്രൊഫ. എം.കെ സാനു പറഞ്ഞു. കെആര്‍എല്‍സിസിയുടെ ആഭിമുഖ്യത്തില്‍ എറണാകുളത്ത് സംഘടിപ്പിച്ച ഫ്രാന്‍സിസ് പാപ്പാ അനുസ്മരണ സമ്മേളനം ‘പാപ്പാസ്മൃതി’
ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. എന്തിനേക്കാളും ഉപരിയായി മനുഷ്യജീവനാണ് എക്കാലത്തും അദ്ദേഹം മുൻഗണന നൽകിയത്. പാപ്പ പകർന്നു നൽകിയ നന്മയുടെ വെളിച്ചം ലോകത്ത് ജ്വലിപ്പിക്കാൻ നമുക്ക് കഴിയണമെന്നും അദ്ദേഹം കൂട്ടിച്ചേർത്തു.
കച്ചേരിപ്പടി സോഷ്യല്‍ സര്‍വീസ് സൊസൈറ്റി ഓഡിറ്റോറിയത്തില്‍ ചേർന്ന അനുസ്മരണ യോഗത്തിൽ കെ ആര്‍ എല്‍ സി സി വൈസ് പ്രസിഡന്‍റ് ജോസഫ് ജൂഡ് അധ്യക്ഷത വഹിച്ചു. വരാപ്പുഴ അതിരൂപതാ സഹായ മെത്രാന്‍ ബിഷപ്പ് ഡോ.ആന്‍റണി വാലുങ്കല്‍ മുഖ്യപ്രഭാഷണം നടത്തി.
ഹൈബി ഈഡന്‍ എം.പി, കെ.എന്‍ ഉണ്ണികൃഷ്ണന്‍ എം.എല്‍.എ., കെആര്‍എല്‍സിസി ജനറല്‍ സെക്രട്ടറി റവ. ഡോ. ജിജു ജോര്‍ജ് അറക്കക്കത്തറ, ആലുവ അദ്വൈതാശ്രമം സെക്രട്ടറി സ്വാമി ധര്‍മ്മചൈതന്യ, എറണാകുളം ഗ്രാന്‍റ് മസ്ജിദ് ഇമാം ഫൈസല്‍ അസ്ഹരി, അരൂര്‍ ഗ്രാമപഞ്ചായത്ത് പ്രസിഡന്‍റ് അഡ്വ. രാഖി ആന്‍റണി, ജീവനാദം ചീഫ് എഡിറ്റര്‍ ശ്രീ. ജെക്കൊബി, കെഎല്‍സിഎ സംസ്ഥാനപ്രസിഡന്‍റ് അഡ്വ. ഷെറി ജെ. തോമസ്, കെആർഎൽസിസി ട്രഷറർ ബിജു ജോസി, സോണിയ ബിനു എന്നിവര്‍ അനുസ്മരണ പ്രഭാഷണം നടത്തി.
