ജപമാലകളുടെ പ്രദർശനം ശ്രദ്ധേയമായി

പറവൂർ: പഴങ്ങൾ, മുത്തുകൾ, ബട്ടണുകൾ, സുഗന്ധവിളകൾ, തുണി, പേപ്പർ, പൂക്കൾ, ഇലകൾ തുടങ്ങി വ്യത്യസ്ത വസ്തുക്കളിൽ കുട്ടികൾ ഒരുക്കിയ ജപമാലകളുടെ പ്രദർശനം പറവൂർ മടപ്ലാതുരുത്ത് സെന്റ് ജോർജ് ഇടവകയിൽ ശ്രദ്ധേയമായി. ബൈബിൾ നഴ്സറി മുതൽ പ്ലസ് ടു വരെയുള്ള വിശ്വാസപരിശീലന ക്ലാസുകളിലെ കുട്ടികളാണ് സർഗാത്മകതയും വൈവിധ്യവും നിറഞ്ഞ ജപമാലകൾ ഒരുക്കിയത്. ഇടവക വിശ്വാസപരിശീലന യൂണിറ്റിന്റെ നേതൃത്വത്തിൽ ദൈവദാസൻ തിയോഫിലസ് പാണ്ടിപ്പിള്ളി ഹാളിൽ സംഘടിപ്പിച്ച പ്രദർശനം ഇടവക വികാരി ഫാ. പോൾ കുര്യാപ്പിള്ളി ഉദ്ഘാടനം ചെയ്തു. പ്രധാനാധ്യാപകൻ ജോജോ മനക്കിൽ അധ്യക്ഷത വഹിച്ചു. സിസ്റ്റർ സാമുവേല, സിസ്റ്റർ മർസല എന്നിവർ പ്രസംഗിച്ചു.