ന്യൂഡല്ഹി: ഭാരതത്തിലെ കത്തോലിക്കാ സഭയുടെ നാഷണല് സിനഡല് അസംബ്ലി 2026 മെയ് 1 മുതല് 3 വരെ ബാംഗ്ലൂരില് നടക്കും. ”പ്രത്യാശയുടെ സിനഡല് തീര്ത്ഥാടകര്” എന്നതാണ് ഈ സമ്മേളനത്തിന്റെ പ്രമേയം. ഇന്ത്യന് സഭയുടെ ജീവിതത്തിലും ദൗത്യത്തിലും ‘സിനഡാലിറ്റി’ (സഹയാത്ര) നടപ്പിലാക്കുന്നത് വേഗത്തിലാക്കുകയാണ് ഈ ഒത്തുചേരലിന്റെ ലക്ഷ്യമെന്ന് സിസിബിഐ ഡെപ്യൂട്ടി സെക്രട്ടറി റവ. ഡോ. സ്റ്റീഫന് ആലത്തറ അറിയിച്ചു.
2021-ല് ഫ്രാന്സിസ് പാപ്പ തുടക്കം കുറിച്ച ആഗോള സിനഡല് പ്രക്രിയയുടെ ഭാഗമായാണ് ഈ സംരംഭം. ദൈവജനം എങ്ങനെ കൂട്ടായ്മയിലും പങ്കാളിത്തത്തിലും ദൗത്യത്തിലും ഒരുമിച്ച് നടക്കുന്നു എന്ന് ചിന്തിക്കാന് ഈ ആഗോള കൂടിയാലോചന സഭയെ ക്ഷണിച്ചു. ഇന്ത്യയില് രൂപത, പ്രാദേശിക, ദേശീയ തലങ്ങളിലുള്ള ചര്ച്ചകളിലൂടെ ഈ പ്രക്രിയ മുന്നോട്ട് കൊണ്ടുപോകുന്നു.
പ്രാതിനിധ്യവും പങ്കാളിത്തവും
ദേശീയ സിനഡല് അസംബ്ലിയില് സഭയുടെ 220 ഓളം നേതാക്കള് പങ്കെടുക്കും. ഇതില് 2 കര്ദിനാള്മാര്, 25 ബിഷപ്പുമാര്, 66 വൈദികര്, 20 സന്ന്യാസിനികള്, 49 വനിതാ നേതാക്കള്, 43 അല്മായ നേതാക്കള്, 15 യുവജന നേതാക്കള് എന്നിവര് ഉള്പ്പെടുന്നു. ആകെ പ്രതിനിധികളില് 107 പേര് അല്മായരാണ് എന്നത് സഭയുടെ ജീവിതത്തില് സാധാരണ വിശ്വാസികളുടെ പങ്കാളിത്തം വര്ദ്ധിപ്പിക്കാനുള്ള ശ്രമത്തെ സൂചിപ്പിക്കുന്നു.
നാല് പ്രധാന വിഷയങ്ങള്
സിസിബിഐ പാസ്റ്ററല് പ്ലാന് അടിസ്ഥാനമാക്കി, അസംബ്ലിയില് താഴെ പറയുന്ന നാല് പ്രധാന വിഷയങ്ങള് ആഴത്തിലുള്ള ചര്ച്ചയ്ക്ക് വിധേയമാക്കുമെന്ന് ഡെപ്യൂട്ടി സെക്രട്ടറി റവ. ഡോ. സ്റ്റീഫന് ആലത്തറ വ്യക്തമാക്കി. മതാന്തര സംവാദവും സമാധാന നിര്മ്മാണവും: വൈവിധ്യമാര്ന്ന മതങ്ങളുള്ള ഇന്ത്യയില്, മറ്റു മതവിശ്വാസികളുമായി പരസ്പര ബഹുമാനവും സഹകരണവും വളര്ത്തുക. ഒഴിവാക്കപ്പെട്ടവരെ ഉള്പ്പെടുത്തല്: സമൂഹത്തിന്റെ പാര്ശ്വവല്ക്കരിക്കപ്പെട്ടവരെയും സഭയ്ക്കുള്ളില് തന്നെ മാറ്റിനിര്ത്തപ്പെട്ടവരെയും ചേര്ത്തുപിടിക്കുക. ദാരിദ്ര്യവും പരിസ്ഥിതി സംരക്ഷണവും: ‘ലൗദാത്തോ സി’ വിഭാവനം ചെയ്യുന്നത് പോലെ ഭൂമിയുടെയും ദരിദ്രരുടെയും നിലവിളിക്ക് പരിഹാരം കാണുക.
കുട്ടികളെയും യുവാക്കളെയും അനുഗമിക്കല്: യുവജനങ്ങളെ ശ്രവിക്കാനും സഭയുടെ ദൗത്യത്തില് അവരെ പങ്കാളികളാക്കാനും ഊന്നല് നല്കുക.
ഭാവിയിലേക്കുള്ള ചുവടുവെപ്പുകള്
പരിശുദ്ധാത്മാവിനാല് നയിക്കപ്പെടുന്ന ‘ആത്മീയ സംഭാഷണ’ രീതിയിലൂടെയാണ് അസംബ്ലിയിലെ ചര്ച്ചകള് നടക്കുക. 2021 മുതലുള്ള പുരോഗതി വിലയിരുത്തുന്നതിനൊപ്പം, സഭയുടെ വിമോചനത്തിന്റെ രണ്ടായിരം വര്ഷങ്ങള് പൂര്ത്തിയാകുന്ന 2033-ലെ ജൂബിലി വര്ഷം ലക്ഷ്യമിട്ടുള്ള കര്മ്മപദ്ധതികളും അസംബ്ലി ആസൂത്രണം ചെയ്യും.
മെയ് മാസത്തിലെ അസംബ്ലിക്ക് ശേഷം, 2026 സെപ്റ്റംബറില് കൂടുതല് വിപുലമായ കൂടിയാലോചനകള് നടക്കും. ഇതിന്റെ അടിസ്ഥാനത്തിലുള്ള അന്തിമ നിര്ദ്ദേശങ്ങള് 2027 ജനുവരിയില് തമിഴ്നാട്ടിലെ വേളാങ്കണ്ണിയില് നടക്കുന്ന സിസിബിഐയുടെ 38-ാമത് പ്ലീനറി അസംബ്ലിയില് സമര്പ്പിക്കും. അവിടെ ബിഷപ്പുമാര് അന്തിമ തീരുമാനങ്ങള് കൈക്കൊള്ളും.
പ്രാര്ഥനയിലൂടെയും സംവാദത്തിലൂടെയും ഒരുമിച്ച് സഞ്ചരിക്കുന്ന ഒരു ദൈവജനമായി മാറാനും പ്രത്യാശയുടെ തീര്ത്ഥാടകരായി സുവിശേഷത്തിന് സാക്ഷ്യം നല്കാനും ഈ കൂട്ടായ്മ ഭാരത സഭയെ സജ്ജമാക്കുന്നു.
