കൊല്ലം: ഇന്ന് മുതൽ എറണാകുളത്തിനും വേളാങ്കണ്ണിക്കും ഇടയിൽ പുതിയ ട്രെയിൻ സർവീസ് ആരംഭിക്കുന്നതോടെ കൊല്ലത്തുള്ള യാത്രക്കാർക്ക് ഇനി പുനലൂർ വഴി തമിഴ്നാട്ടിലേക്ക് പോകാം. 16363 നമ്പർ എറണാകുളം ജങ്ഷൻ-വേലങ്കണ്ണി വീക്ക്ലി എക്സ്പ്രസ് ബുധനാഴ്ചകളിൽ രാത്രി 11.50 ന് എറണാകുളം ജങ്ഷനിൽ നിന്ന് പുറപ്പെട്ട് വ്യാഴാഴ്ചകളിൽ വൈകുന്നേരം 5.30 ന് വേളാങ്കണ്ണിയിൽ എത്തും. നിലവിൽ ശനി, തിങ്കൾ ദിവസങ്ങളിൽ എറണാകുളത്തുനിന്ന് വേളാങ്കണ്ണിക്ക് സർവീസുണ്ടെങ്കിലും പുതിയ ട്രെയിൻ വരുന്നതോടെ യാത്രക്കാർക്ക് കൂടുതൽ സൗകര്യമൊരുങ്ങും.
ട്രെയിൻ നമ്പർ 16364 വേളാങ്കണ്ണി-എറണാകുളം ജങ്ഷൻ വീക്കിലി എക്സ്പ്രസ് വ്യാഴാഴ്ചകളിൽ വൈകുന്നേരം 07.45 ന് വേളാങ്കണ്ണിയിൽ നിന്ന് പുറപ്പെട്ട് വെള്ളിയാഴ്ചകളിൽ രാത്രി 11.55 ന് എറണാകുളം ജങ്ഷനിൽ തിരിച്ചെത്തും. പുതിയ റൂട്ടിൽ ഓടുന്ന ട്രെയിൻ സർവീസിന് കൊല്ലം ജില്ലയിലെ കരുനാഗപ്പള്ളി, ശാസ്താംകോട്ട, കൊല്ലം ജങ്ഷൻ, കുണ്ടറ, കൊട്ടാരക്കര, ആവണീശ്വരം, പുനലൂർ, തെന്മല എന്നീ സ്റ്റേഷനുകളിൽ സ്റ്റോപ്പുണ്ടാകും.
“മധുര, തിരുച്ചിറപ്പള്ളി, തഞ്ചാവൂർ വഴി പുതിയൊരു പാതയിലൂടെ ട്രെയിൻ കടന്നുപോകുമെന്നതാണ് ഈ സർവീസിന്റെ പ്രാധാന്യം. തെക്കൻ കേരളത്തിൽ നിന്ന് തഞ്ചാവൂരിലേക്കുള്ള ഏക നേരിട്ടുള്ള ട്രെയിൻ സർവീസായി ഇത് മാറും. മീറ്റർ ഗേജ് കാലഘട്ടത്തിൽ, പുനലൂർ വഴി തഞ്ചാവൂരിലേക്ക് രണ്ട് സർവീസുകൾ ലഭ്യമായിരുന്നു. എന്നിരുന്നാലും, ബ്രോഡ് ഗേജിന് ശേഷം, ട്രെയിനുകൾ ലഭ്യമല്ല. തഞ്ചാവൂരും കുംഭകോണവും സന്ദർശിക്കാൻ ആഗ്രഹിക്കുന്നവർക്ക് ഈ പുതിയ സർവീസ് ഒരു വലിയ അനുഗ്രഹമാണ്,” കൊല്ലം-ചെങ്കോട്ട റെയിൽവേ പാസഞ്ചേഴ്സ് അസോസിയേഷൻ സെക്രട്ടറി ദിപു രവി പറഞ്ഞു.
ബുധൻ രാത്രി 11.50-ന് എറണാകുളത്തുനിന്നു പുറപ്പെടുന്ന ട്രെയിൻ വ്യാഴം പുലർച്ചെ മൂന്നിന് കൊല്ലത്തെത്തും. തുടർന്ന് കുണ്ടറ (3.28), കൊട്ടാരക്കര (3.38), പുനലൂർ (4.20), തെന്മല (5.18), ചെങ്കോട്ട (7.05), തെങ്കാശി (7.28) എന്നിവിടങ്ങൾ കടന്ന് രാവിലെ 11ന് മധുരയിലെത്തും. ഉച്ചയ്ക്ക് 1.35ന് തിരുച്ചിറപ്പള്ളിയിലും 2.33ന് തഞ്ചാവൂരിലുമെത്തുന്ന ട്രെയിൻ വൈകുന്നേരം 5.35നാണ് വേളാങ്കണ്ണിയിൽ യാത്ര അവസാനിപ്പിക്കുക.
മടക്കയാത്ര വ്യാഴം രാത്രി 7.45ന് വേളാങ്കണ്ണിയിൽനിന്ന് ആരംഭിക്കും. രാത്രി 10.08ന് തഞ്ചാവൂരിലും 11.25ന് തിരുച്ചിറപ്പള്ളിയിലുമെത്തുന്ന ട്രെയിൻ വെള്ളി പുലർച്ചെ 1.20ന് മധുരയിലെത്തും. രാവിലെ 4.30ന് ചെങ്കോട്ടയും 6.45ന് പുനലൂരും പിന്നിട്ട് 8.10ന് കൊല്ലത്തെത്തിച്ചേരും. ഉച്ചയ്ക്ക് 11.55ന് ട്രെയിൻ എറണാകുളത്ത് സർവീസ് അവസാനിപ്പിക്കും.
