വിൽനിയസ്: ആഗോള ദൈവകാരുണ്യ കോൺഗ്രസിന് (WACOM 6) ആതിഥേയത്വം വഹിക്കാൻ ലിത്വാനിയയിലെ വിൽനിയസ് തയ്യാറെടുക്കുന്നു. ജൂൺ 7 മുതൽ 12 വരെയാണ് ആറാമത്തെ ദൈവകരുണയുടെ കോൺഗ്രസ് നടക്കുക. വിൽനിയസ് അതിരൂപത ആതിഥേയത്വം വഹിക്കുന്ന സമ്മേളനത്തിൽ, ദൈവകരുണയെ കേന്ദ്രീകരിച്ചുള്ള ഒരു ആഴ്ചത്തെ പ്രാർത്ഥന, ധ്യാന വിചിന്തനം, ഭാവി പദ്ധതികൾക്കായുള്ള ആസൂത്രണം എന്നിവ നടക്കും. ലോകമെമ്പാടു നിന്നുമുള്ള മെത്രാന്മാരും വൈദികരും ആയിരക്കണക്കിന് വിശ്വാസികളും പരിപാടിയിൽ പങ്കെടുക്കും.
യൂറോപ്യൻ ബിഷപ്പ്സ് കോൺഫറൻസ് കൗൺസിൽ പ്രസിഡൻറും വിൽനിയസ് അധ്യക്ഷനുമായ ആർച്ച് ബിഷപ്പ് ജിന്റാറസ് ഗ്രുഷാസ് സമ്മേളനത്തിലേക്ക് ഏവരെയും സ്വാഗതം ചെയ്തു. ഭിന്നത, സംഘർഷം എന്നിവ നേരിടുന്ന ലോകത്ത് ദൈവകരുണയോടുള്ള പ്രതിബദ്ധത പുതുക്കാനുള്ള അവസരമായി ഈ പരിപാടിയെ നോക്കികാണുകയാണെന്നും അനുരഞ്ജനം, സമാധാനം, ഐക്യം എന്നിവയ്ക്കുള്ള ഒരു ശക്തിയായി ദൈവകരുണ പ്രവർത്തിക്കുകയാണെന്നും അദ്ദേഹം കൂട്ടിച്ചേർത്തു.
മൂന്ന് വർഷത്തിലൊരിക്കൽ വ്യത്യസ്ത രാജ്യങ്ങളിലാണ് ദൈവകരുണയുടെ അപ്പസ്തോലിക കോൺഗ്രസ് നടക്കുന്നത്. വിശുദ്ധ ഫൗസ്റ്റീന കോവാൽസ്കയുടെ ആത്മീയതയിൽ വേരൂന്നിയ ദൈവകരുണയുടെ ഭക്തിയും അതിനു വിശുദ്ധ ജോൺ പോൾ രണ്ടാമൻ പാപ്പ നൽകിയ പിന്തുണയും എല്ലാ കോൺഗ്രസിലും അനുസ്മരിക്കാറുണ്ട്. എല്ലാ ജനങ്ങളോടുമുള്ള ദൈവത്തിന്റെ കരുണാർദ്രമായ സ്നേഹം പ്രഘോഷിക്കാൻ കൂടിയാണ് ദൈവകരുണയുടെ കോൺഗ്രസ് നടത്തുന്നത്. റോം, ക്രാക്കോവ്, ബൊഗോട്ട, മനില, അപിയ എന്നീ വിവിധ സ്ഥലങ്ങളിൽ ദൈവകരുണയുടെ കോൺഗ്രസ് ഇതിനു മുൻപ് നടന്നിട്ടുണ്ട്.
