കൊച്ചി: പ്രശ്നങ്ങളെ പ്രാർത്ഥന കൊണ്ട് മറികടക്കാൻ കഴിയുമെന്ന് വരാപ്പുഴ അതിരൂപത സഹായ മെത്രാൻ ഡോ. ആന്റണി വാലുങ്കൽ. അതിരൂപത മെത്രാസന മന്ദിരത്തിൽ നടന്ന ഇടവകകളിൽ നിന്നുള്ള പ്രാർത്ഥന ഗ്രൂപ്പ് ലീഡർമാരുടെ സംഗമം “ലൂക്സ് മൂന്തി” ഒത്തുചേരലിന്റെ ഉദ്ഘാടനം നിർവഹിക്കുകയായിരുന്നു ബിഷപ്പ്.
കെസിബിസി ഡെപ്യൂട്ടി സെക്രട്ടറിയും പിഒസി ഡയറക്ടറുമായ ഫാ.തോമസ് തറയിൽ അധ്യക്ഷത വഹിച്ച യോഗത്തിൽ , അതിരൂപത പ്രൊക്ലമേഷൻ കമ്മീഷൻ ഡയറക്ടർ ഫാ.ആന്റണി ഷൈൻ കാട്ടുപറമ്പിൽ, കമ്മീഷൻ സെക്രട്ടറി സി ടി ജോസഫ് , കമ്മീഷൻ കോ-ഓർഡിനേറ്റർ സി ടി പീറ്റർ തോമസ്, സി.ലോറൻസി, സി.ഓസ്ബെർഗ എന്നിവർ പ്രസംഗിച്ചു.
കെ ആർ എൽ സി ബി സി പ്രൊക്ലമേഷൻ കമ്മീഷൻ സ്റ്റേറ്റ് സെക്രട്ടറി ഫാ. ഡോ. സ്റ്റാൻലി മാതിരപ്പിള്ളി ക്ലാസ് നയിച്ചു. അതിരൂപതയിലെ എട്ട് ഫൊറോനകളിലേക്കുള്ള പ്രൊക്ലമേഷൻ കമ്മീഷൻ ഫൊറോന കമ്മിറ്റി അംഗങ്ങളെ യോഗത്തിൽ തിരഞ്ഞെടുത്തു. പ്രൊക്ലമേഷൻ കമ്മീഷൻ സ്റ്റേറ്റ് കമ്മിറ്റിയിലേയും അതിരൂപത കമ്മിറ്റിയിലേയും അംഗങ്ങൾ നേതൃത്വം നൽകിയ പ്രസ്തുത യോഗത്തിൽ ഇരുന്നൂറോളം പേർ പങ്കെടുത്തു.
