ജോ മാത്യു
ട്രംപിന് ജനപ്രതിനിധിസഭയിലും സെനറ്റിലും തിരിച്ചടി; ആഗോള രാഷ്ട്രീയത്തിലും സാമ്പത്തികരംഗത്തും പുതിയ സമവാക്യങ്ങള്‍, ഇന്ത്യയ്ക്കും നിര്‍ണായകമായ പരീക്ഷണകാലം
ലോകത്തിന്റെ രാഷ്ട്രീയഭൂപടത്തില്‍ ചില തിരഞ്ഞെടുപ്പുകള്‍ ഒരു രാജ്യത്തിന്റെ അധികാരമാറ്റം മാത്രമല്ല അടയാളപ്പെടുത്തുന്നത്. അതിന്റെ പ്രതിഫലനങ്ങള്‍ അതിര്‍ത്തികള്‍ കടന്ന് രാജ്യങ്ങളുടെ സമ്പദ് വ്യവസ്ഥകളിലും നയതന്ത്രബന്ധങ്ങളിലും യുദ്ധഭൂമികളിലും സാധാരണ മനുഷ്യരുടെ ജീവിതച്ചെലവുകളിലും വരെ എത്തുന്നു. അമേരിക്കന്‍ ഇടക്കാല തിരഞ്ഞെടുപ്പ് അത്തരമൊരു ആഗോള പ്രാധാന്യമുള്ള രാഷ്ട്രീയ സംഭവമായി മാറിയിരിക്കുകയാണ്. ലോകത്തിന്റെ സാമ്പത്തികവും സൈനികവും നയതന്ത്രപരവുമായ അധികാരകേന്ദ്രമായി തുടരുന്ന അമേരിക്കയിലെ രാഷ്ട്രീയ സമവാക്യങ്ങളില്‍ സംഭവിച്ച ഈ മാറ്റം വാഷിങ്ടണില്‍ മാത്രം ഒതുങ്ങുന്നതല്ല; അതിന്റെ അലയൊലികള്‍ ലോകത്തിന്റെ വിവിധ കോണുകളിലേക്ക് വ്യാപിക്കുകയാണ്.
2026 നവംബര്‍ 3-ന് നടന്ന അമേരിക്കന്‍ ഇടക്കാല തിരഞ്ഞെടുപ്പില്‍ പ്രസിഡന്റ് ഡൊണള്‍ഡ് ട്രംപിന്റെ റിപ്പബ്ലിക്കന്‍ പാര്‍ട്ടിക്ക് കനത്ത തിരിച്ചടി നല്‍കി ഡെമോക്രാറ്റിക് പാര്‍ട്ടി ജനപ്രതിനിധിസഭയിലും സെനറ്റിലും ഭൂരിപക്ഷം നേടിയിരിക്കുന്നു. പ്രസിഡന്റ് തിരഞ്ഞെടുപ്പിന്റെ ഇടക്കാലത്ത് നടക്കുന്ന ഈ തിരഞ്ഞെടുപ്പിന്റെ ഫലം ട്രംപിന്റെ ഭരണത്തിന്റെ ശേഷിക്കുന്ന രണ്ടു വര്‍ഷങ്ങളെ കൂടുതല്‍ സങ്കീര്‍ണമാക്കും. 2027 ജനുവരിയില്‍ പുതിയ കോണ്‍ഗ്രസ് അധികാരമേല്‍ക്കുന്നതോടെ അമേരിക്കയില്‍ വിഭജിത ഭരണസംവിധാനമാണ് നിലവില്‍ വരുന്നത്. പ്രസിഡന്റിന്റെ അധികാരങ്ങള്‍ നിലനില്‍ക്കുമ്പോഴും നിയമനിര്‍മാണത്തിലും സര്‍ക്കാര്‍ ചെലവുകളിലും ഭരണകൂടത്തിന്റെ പ്രവര്‍ത്തനങ്ങള്‍ പരിശോധിക്കുന്നതിലും ഡെമോക്രാറ്റുകള്‍ക്ക് നിര്‍ണായക സ്വാധീനം ലഭിക്കും.അമേരിക്കന്‍ ജനതയുടെ ഈ വിധിയെഴുത്ത് ട്രംപിന്റെ ഭരണനയങ്ങളോടുള്ള അതൃപ്തിയുടെ പ്രകടനമായി പൊതുവേ വിലയിരുത്തപ്പെടുന്നുണ്ട്. ജീവിതച്ചെലവിലെ വര്‍ധന, പണപ്പെരുപ്പം, ഇറാനുമായുള്ള യുദ്ധസാഹചര്യം, കുടിയേറ്റക്കാരോടുള്ള കടുത്ത സമീപനം, ഭരണകൂടത്തിന്റെ പ്രവര്‍ത്തനങ്ങളിലെ സുതാര്യതക്കുറവ് തുടങ്ങിയ വിഷയങ്ങള്‍ വോട്ടര്‍മാരുടെ തീരുമാനത്തെ സ്വാധീനിച്ചു. അതേസമയം, ഡെമോക്രാറ്റുകളുടെ വിജയം ട്രംപിന്റെ രാഷ്ട്രീയാധികാരം പൂര്‍ണമായി അവസാനിപ്പിക്കുന്നില്ല. മറിച്ച്, വൈറ്റ് ഹൗസും കോണ്‍ഗ്രസും വ്യത്യസ്ത രാഷ്ട്രീയ കക്ഷികളുടെ നിയന്ത്രണത്തിലാകുന്ന പുതിയ അധികാരസമവാക്യമാണ് സൃഷ്ടിക്കുന്നത്.അമേരിക്കന്‍ ഭരണഘടനയുടെ അധികാരവിന്യാസമാണ് ഇവിടെ ശ്രദ്ധേയമാകുന്നത്. പ്രസിഡന്റിന് വിദേശനയത്തിലും ഭരണനിര്‍വഹണത്തിലും വലിയ അധികാരമുണ്ടെങ്കിലും നിയമനിര്‍മാണത്തിനും ബജറ്റിനും സൈനിക ചെലവുകള്‍ക്കും കോണ്‍ഗ്രസിന്റെ പിന്തുണ ആവശ്യമാണ്. അതുകൊണ്ടുതന്നെ പുതിയ കോണ്‍ഗ്രസിന്റെ നിലപാടുകള്‍ ട്രംപിന്റെ ആഭ്യന്തര-വിദേശ നയങ്ങളെ നിയന്ത്രിക്കാനും ചില മേഖലകളില്‍ പുനഃപരിശോധനയ്ക്ക് വിധേയമാക്കാനും ഇടയാക്കും.
ട്രംപിന്റെ അധികാരത്തിന് നിയന്ത്രണവേലി
അമേരിക്കന്‍ തിരഞ്ഞെടുപ്പിന്റെ ഏറ്റവും പ്രധാനപ്പെട്ട രാഷ്ട്രീയഫലം ട്രംപിന്റെ ഏകപക്ഷീയമായ നയനീക്കങ്ങള്‍ക്ക് കോണ്‍ഗ്രസില്‍നിന്ന് കൂടുതല്‍ പ്രതിരോധം നേരിടേണ്ടിവരുമെന്നതാണ്. ജനപ്രതിനിധിസഭയിലും സെനറ്റിലും ഡെമോക്രാറ്റുകള്‍ക്ക് ഭൂരിപക്ഷം ലഭിച്ചതോടെ ഭരണകൂടത്തിന്റെ തീരുമാനങ്ങള്‍ പരിശോധിക്കാനും അന്വേഷണങ്ങള്‍ നടത്താനും സര്‍ക്കാര്‍ ചെലവുകളെക്കുറിച്ച് ചോദ്യങ്ങള്‍ ഉന്നയിക്കാനും അവര്‍ക്ക് കഴിയും.പ്രസിഡന്റിന്റെയും മന്ത്രിസഭാംഗങ്ങളുടെയും പ്രധാന ഭരണതലവന്മാരുടെയും നിയമനങ്ങള്‍ സംബന്ധിച്ച സെനറ്റിന്റെ അധികാരവും ഇതില്‍ നിര്‍ണായകമാണ്. സര്‍ക്കാര്‍ ചെലവുകള്‍ക്ക് അംഗീകാരം നല്‍കുന്നതിലും പുതിയ നിയമങ്ങള്‍ പാസാക്കുന്നതിലും ഡെമോക്രാറ്റുകളുടെ നിലപാട് നിര്‍ണായകമാകും.എന്നാല്‍ ഈ വിജയം ട്രംപിന്റെ ഭരണകാലം അവസാനിച്ചതിന് തുല്യമല്ല. കോണ്‍ഗ്രസ് പാസാക്കുന്ന നിയമങ്ങള്‍ വീറ്റോ ചെയ്യാനുള്ള പ്രസിഡന്റിന്റെ അധികാരം നിലനില്‍ക്കും. വീറ്റോ മറികടക്കാന്‍ ഇരുസഭകളിലും മൂന്നില്‍ രണ്ട് ഭൂരിപക്ഷം ആവശ്യമാണ്. അതിനാല്‍ ഡെമോക്രാറ്റുകള്‍ക്ക് എല്ലാ ട്രംപ് നയങ്ങളും റദ്ദാക്കാനാവില്ല. എന്നാല്‍ ഭരണകൂടത്തിന്റെ നീക്കങ്ങള്‍ക്കു രാഷ്ട്രീയവും നിയമപരവുമായ തടസ്സങ്ങള്‍ സൃഷ്ടിക്കാന്‍ കഴിയും.ഇതോടെ അമേരിക്കന്‍ രാഷ്ട്രീയം കൂടുതല്‍ ഏറ്റുമുട്ടലുകളിലേക്കു നീങ്ങുമോ, അതോ ഇരുപാര്‍ട്ടികളും ചില വിഷയങ്ങളില്‍ വിട്ടുവീഴ്ചയ്ക്ക് തയ്യാറാകുമോ എന്നതാണ് ഇനി ലോകം ഉറ്റുനോക്കുന്നത്.
ലോകസമ്പദ് വ്യവസ്ഥ:വ്യാപാരയുദ്ധത്തിന് പുതിയ ദിശയോ?
അമേരിക്കന്‍ തിരഞ്ഞെടുപ്പിന്റെ പ്രതിഫലനം ആദ്യം അനുഭവപ്പെടാന്‍ സാധ്യതയുള്ള മേഖലകളിലൊന്ന് ആഗോള സമ്പദ്വ്യവസ്ഥയാണ്. ട്രംപിന്റെ വ്യാപാരനയങ്ങളും ഇറാനുമായുള്ള യുദ്ധവും ഇന്ധനവിലയിലെ വര്‍ധനയും അമേരിക്കന്‍ ജനതയുടെ ജീവിതച്ചെലവിനെ ബാധിച്ച പ്രധാന ഘടകങ്ങളായിരുന്നു. തിരഞ്ഞെടുപ്പില്‍ തിരിച്ചടി നേരിട്ടതോടെ ഈ നയങ്ങളില്‍ മാറ്റമുണ്ടാകുമെന്ന പ്രതീക്ഷയാണ് സാമ്പത്തിക വിപണികളിലും പ്രതിഫലിച്ചത്.തിരഞ്ഞെടുപ്പിനു പിന്നാലെ ബ്രെന്റ് ക്രൂഡോയില്‍ വില ബാരലിന് 94 ഡോളറിനടുത്തേക്ക് താഴ്ന്നു. നവംബര്‍ 10-ന് പുറത്തുവന്ന റിപ്പോര്‍ട്ടുകള്‍ പ്രകാരം വില വീണ്ടും 91.88 ഡോളറിലെത്തി. ഇറാനുമായുള്ള യുദ്ധം അവസാനിപ്പിക്കുന്നതിനും ഗള്‍ഫ് മേഖലയിലെ എണ്ണനീക്കം സാധാരണ നിലയിലാക്കുന്നതിനും അമേരിക്കന്‍ ഭരണകൂടത്തിനുമേല്‍ രാഷ്ട്രീയസമ്മര്‍ദം വര്‍ധിക്കുമെന്ന വിപണിയുടെ പ്രതീക്ഷയാണ് ഈ വിലയിടിവിനു പിന്നിലെ പ്രധാന ഘടകങ്ങളിലൊന്ന്. എന്നാല്‍ യുദ്ധത്തിനു മുമ്പുണ്ടായിരുന്ന 70 ഡോളറിനടുത്തുള്ള വിലനിലവാരത്തിലേക്ക് എണ്ണ തിരിച്ചെത്തിയിട്ടുമില്ല.ഇതിന്റെ പ്രത്യാഘാതം അമേരിക്കയില്‍ മാത്രം ഒതുങ്ങുന്നതല്ല. ഇന്ത്യയുള്‍പ്പെടെയുള്ള എണ്ണ ഇറക്കുമതി രാജ്യങ്ങള്‍ക്ക് അന്താരാഷ്ട്ര വിപണിയിലെ വിലയിടിവ് ആശ്വാസമാകും. ഇന്ത്യയുടെ ഇറക്കുമതി ചെലവ് കുറയാനും പണപ്പെരുപ്പ സമ്മര്‍ദം ലഘൂകരിക്കാനും രൂപയുടെ മേലുള്ള സമ്മര്‍ദം കുറയ്ക്കാനും ഇതു സഹായിച്ചേക്കാം. ഗതാഗതം, വ്യവസായം, കൃഷി, ചരക്കുനീക്കം തുടങ്ങിയ മേഖലകളിലും ഇന്ധനവിലയിലെ കുറവിന് അനുകൂലമായ പ്രതിഫലനമുണ്ടാകും.എന്നാല്‍ എണ്ണവിലയിലെ ഈ ഇടിവിനെ യുദ്ധം അവസാനിക്കുന്നതിന്റെ സൂചനയായി മാത്രം കാണാനാവില്ല. ഹോര്‍മുസ് കടലിടുക്കിലൂടെയുള്ള കപ്പല്‍ഗതാഗതം തടസ്സപ്പെടുകയോ ഇറാനും അമേരിക്കയും തമ്മിലുള്ള ചര്‍ച്ചകള്‍ പരാജയപ്പെടുകയോ ചെയ്താല്‍ വിപണി വീണ്ടും അസ്ഥിരമാകും. ലോകത്തിലെ പ്രധാന എണ്ണക്കടത്തു പാതകളിലൊന്നായ ഹോര്‍മുസ് കടലിടുക്കിലെ പ്രതിസന്ധി ആഗോള ഊര്‍ജസുരക്ഷയെ നേരിട്ട് ബാധിക്കുന്നതാണ്. ചെങ്കടലിനെയും ഏഷ്യയെയും യൂറോപ്പിനെയും ബന്ധിപ്പിക്കുന്ന ബാബ് അല്‍ മന്ദബ് കടലിടുക്കിലെ സുരക്ഷയും അതുപോലെ നിര്‍ണായകമാണ്.
വ്യാപാരയുദ്ധത്തിന് കോണ്‍ഗ്രസ് തടയിടുമോ?
ട്രംപിന്റെ രണ്ടാം ഭരണകാലത്തെ ഏറ്റവും വിവാദപരമായ നയങ്ങളിലൊന്നാണ് ഇറക്കുമതി തീരുവകള്‍ വ്യാപകമായി ഉയര്‍ത്തിയുള്ള വ്യാപാരസംരക്ഷണ സമീപനം. അമേരിക്കന്‍ വ്യവസായങ്ങളെയും തൊഴിലാളികളെയും സംരക്ഷിക്കുക, ആഭ്യന്തര ഉല്‍പ്പാദനം വര്‍ധിപ്പിക്കുക, വിദേശരാജ്യങ്ങളെ അമേരിക്കയുടെ വ്യാപാരതാത്പര്യങ്ങള്‍ക്ക് അനുകൂലമായ കരാറുകള്‍ക്ക് നിര്‍ബന്ധിക്കുക എന്നിവയാണ് ഇതിന്റെ പ്രഖ്യാപിത ലക്ഷ്യങ്ങള്‍. എന്നാല്‍ ഇതിന്റെ പ്രത്യാഘാതം അമേരിക്കന്‍ ഉപഭോക്താക്കള്‍ക്കും വ്യാപാരപങ്കാളികള്‍ക്കും ഒരുപോലെ അനുഭവിക്കേണ്ടിവന്നു.ഡെമോക്രാറ്റുകള്‍ ജനപ്രതിനിധിസഭയില്‍ ഹക്കീം ജെഫ്രിസിന്റെ നേതൃത്വത്തില്‍ ട്രംപിന്റെ ആഗോള തീരുവനയങ്ങളെ ചോദ്യം ചെയ്യാനും വ്യാപാരനയത്തില്‍ കോണ്‍ഗ്രസിന്റെ അധികാരം പുനഃസ്ഥാപിക്കാനും ശ്രമിക്കുമെന്നാണ് പ്രതീക്ഷ. എന്നാല്‍ എല്ലാ തീരുവകളും ഒറ്റയടിക്ക് റദ്ദാക്കാന്‍ അവര്‍ക്കു കഴിയില്ല. പ്രസിഡന്റ് വീറ്റോ അധികാരം ഉപയോഗിച്ചാല്‍ അതിനെ മറികടക്കാന്‍ ആവശ്യമായ മൂന്നില്‍ രണ്ട് ഭൂരിപക്ഷം ഡെമോക്രാറ്റുകള്‍ക്കില്ല.മാത്രമല്ല, സംരക്ഷണവാദത്തിന്റെ കാര്യത്തില്‍ ഡെമോക്രാറ്റുകളും റിപ്പബ്ലിക്കന്‍മാരും തമ്മില്‍ വലിയ ആശയവ്യത്യാസമില്ലാത്ത സാഹചര്യങ്ങളുമുണ്ട്. അമേരിക്കന്‍ തൊഴിലാളികളുടെയും ആഭ്യന്തര ഉല്‍പ്പാദനത്തിന്റെയും താത്പര്യങ്ങള്‍ സംരക്ഷിക്കണമെന്ന നിലപാട് ഇരുപാര്‍ട്ടികളിലും ശക്തമാണ്. അതിനാല്‍ ഡെമോക്രാറ്റുകളുടെ വിജയം അമേരിക്കയുടെ വ്യാപാരനയത്തില്‍ ഉടനടി വലിയ ഉദാരവത്കരണം കൊണ്ടുവരുമെന്ന് പ്രതീക്ഷിക്കുന്നത് യാഥാര്‍ഥ്യബോധമുള്ള വിലയിരുത്തലാകില്ല. എങ്കിലും പുതിയ വ്യാപാരയുദ്ധങ്ങള്‍ ആരംഭിക്കുന്നതിനും നിലവിലുള്ളവ കൂടുതല്‍ രൂക്ഷമാക്കുന്നതിനും ഭരണകൂടത്തിന് രാഷ്ട്രീയതടസ്സങ്ങള്‍ നേരിടേണ്ടിവരും.വ്യാപാരനയത്തിലെ അനിശ്ചിതത്വം ആഗോള നിക്ഷേപത്തെയും ബാധിക്കും. ഉല്‍പാദനശൃംഖലകള്‍ വിവിധ രാജ്യങ്ങളിലായി വ്യാപിച്ചുകിടക്കുന്ന ഇന്നത്തെ ലോകത്ത് ഒരു രാജ്യത്തിന്റെ തീരുവനയം മറ്റൊരു രാജ്യത്തെ വ്യവസായത്തെയും തൊഴില്‍വിപണിയെയും ബാധിക്കും. അമേരിക്കയും ചൈനയും തമ്മിലുള്ള സാമ്പത്തിക മത്സരം ഇതിനകംതന്നെ ലോകവ്യാപാരത്തിന്റെ സ്വഭാവം മാറ്റിയിട്ടുണ്ട്. പുതിയ കോണ്‍ഗ്രസ് ഈ മത്സരത്തെ എങ്ങനെ സമീപിക്കുന്നു എന്നത് ആഗോള വ്യാപാരത്തിന്റെ ഭാവി നിര്‍ണയിക്കുന്നതില്‍ പ്രധാനമാണ്.
യുദ്ധഭൂമികളില്‍ സമാധാനത്തിന്റെ പ്രതീക്ഷ
അമേരിക്കന്‍ തിരഞ്ഞെടുപ്പിന്റെ ഏറ്റവും നിര്‍ണായകമായ അന്താരാഷ്ട്ര പ്രത്യാഘാതം പശ്ചിമേഷ്യന്‍ യുദ്ധസാഹചര്യത്തിലായിരിക്കും. ഇറാനുമായുള്ള സംഘര്‍ഷം അമേരിക്കന്‍ രാഷ്ട്രീയത്തില്‍ വലിയ ആഭ്യന്തരപ്രശ്‌നമായി മാറിയിട്ടുണ്ട്. യുദ്ധച്ചെലവും ഇന്ധനവിലയും സാധാരണക്കാരുടെ ജീവിതത്തെ ബാധിച്ചതോടെ ട്രംപ് ഭരണകൂടത്തിന്റെ സൈനികനയങ്ങള്‍ക്കെതിരേ വിമര്‍ശനം ശക്തമായിരുന്നു. ഇറാനുമായി ഇനി യുദ്ധത്തിന് സാധ്യതയില്ലെന്ന തിരഞ്ഞെടുപ്പിനു ശേഷമുള്ള ട്രംപിന്റെ പ്രഖ്യാപനം ഇവിടെയാണ് പ്രസക്തമാകുന്നത്.ഡെമോക്രാറ്റുകള്‍ കോണ്‍ഗ്രസിന്റെ ബജറ്റ് അധികാരവും പ്രതിരോധ-വിദേശകാര്യ സമിതികളിലെ നിയന്ത്രണവും ഉപയോഗിച്ച് ഇറാനെതിരായ സൈനികനീക്കങ്ങളെ ചോദ്യം ചെയ്യാന്‍ സാധ്യതയുണ്ട്. യുദ്ധത്തിനുള്ള ധനവിനിയോഗം, സൈനിക വിന്യാസം, ഭരണകൂടത്തിന്റെ തീരുമാനങ്ങള്‍ എന്നിവയില്‍ കൂടുതല്‍ പരിശോധനയും നിയന്ത്രണവും ആവശ്യപ്പെടാം. ഇതു സമാധാനചര്‍ച്ചകള്‍ക്ക് അനുകൂലമായ അന്തരീക്ഷം സൃഷ്ടിച്ചേക്കാം. അതു മുന്‍കൂട്ടി കണ്ടുകൊണ്ടായിരിക്കണം ട്രംപിന്റെ പ്രഖ്യാപനം.എന്നാല്‍ അമേരിക്കന്‍ പ്രസിഡന്റ് സൈനിക-വിദേശനയങ്ങളില്‍ ഇപ്പോഴും വലിയ അധികാരം നിലനിര്‍ത്തുന്നുണ്ട്. കോണ്‍ഗ്രസിന്റെ എതിര്‍പ്പ് ഉണ്ടായാലും ഭരണകൂടത്തിന് ചില ഏകപക്ഷീയ നടപടികള്‍ സ്വീകരിക്കാനാകും. അതുകൊണ്ട് ഡെമോക്രാറ്റുകളുടെ വിജയം ഇറാന്‍ യുദ്ധത്തിന് ഉടന്‍ വിരാമമിടുമെന്ന് കരുതാനാവില്ല. ചര്‍ച്ചകള്‍ പരാജയപ്പെട്ടാല്‍ സൈനികസംഘര്‍ഷം വീണ്ടും രൂക്ഷമാകാനുള്ള സാധ്യതയും നിലനില്‍ക്കുന്നു.ഇസ്രായേലിനുള്ള അമേരിക്കന്‍ സൈനികസഹായത്തിന്റെ കാര്യത്തിലും പുതിയ കോണ്‍ഗ്രസിന്റെ സമീപനം ശ്രദ്ധേയമാകും. ഗാസയിലെ യുദ്ധവും പശ്ചിമേഷ്യയിലെ മനുഷ്യാവകാശപ്രശ്‌നങ്ങളും അമേരിക്കന്‍ രാഷ്ട്രീയത്തില്‍ കൂടുതല്‍ ചര്‍ച്ച ചെയ്യപ്പെടുന്ന സാഹചര്യത്തില്‍ ആയുധവില്‍പ്പനയ്ക്കും സൈനികസഹായത്തിനും കൂടുതല്‍ നിബന്ധനകള്‍ ഏര്‍പ്പെടുത്തണമെന്ന ആവശ്യം ഡെമോക്രാറ്റുകളുടെ ചില വിഭാഗങ്ങളില്‍ ശക്തമാണ്. ഇതു ഇസ്രായേല്‍ ഭരണകൂടത്തിന് വാഷിങ്ടണില്‍ പുതിയ രാഷ്ട്രീയവെല്ലുവിളികള്‍ സൃഷ്ടിച്ചേക്കാം. എന്നാല്‍ അമേരിക്ക-ഇസ്രായേല്‍ ബന്ധത്തിന്റെ അടിസ്ഥാനപരമായ തന്ത്രപ്രധാന്യം പെട്ടെന്ന് ഇല്ലാതാകുമെന്ന് കരുതാനാവില്ല.യുക്രെയ്ന് യുദ്ധത്തിന്റെ കാര്യത്തിലും പുതിയ കോണ്‍ഗ്രസിന്റെ നിലപാട് പ്രധാനമാണ്. റഷ്യന്‍ അധിനിവേശത്തിനെതിരായ യുക്രെയ്ന് കൂടുതല്‍ സഹായം നല്‍കണമെന്ന നിലപാടാണ് ഡെമോക്രാറ്റുകള്‍ പൊതുവെ സ്വീകരിക്കുന്നത്. എന്നാല്‍ ട്രംപിന്റെ വിദേശനയവും യൂറോപ്യന്‍ രാജ്യങ്ങളോടുള്ള സമീപനവും നാറ്റോയുടെ ഭാവിയും സംബന്ധിച്ച അനിശ്ചിതത്വം തുടരും. അമേരിക്കയുടെ സൈനിക-സാമ്പത്തിക സഹായം പൂര്‍ണമായി ഡെമോക്രാറ്റുകളുടെ നിയന്ത്രണത്തിലാകില്ലെന്നതാണ് യാഥാര്‍ഥ്യം. അതിനാല്‍ യുക്രെയ്ന് ലഭിക്കുന്ന സഹായത്തില്‍ വലിയ മാറ്റമുണ്ടാകുമോ എന്നത് ഇപ്പോള്‍ ഉറപ്പിച്ചു പറയാനാവില്ല.യൂറോപ്പിനെ സംബന്ധിച്ചിടത്തോളം ഈ തിരഞ്ഞെടുപ്പ് ഒരേസമയം പ്രതീക്ഷയും ആശങ്കയുമാണ്. ട്രംപിന്റെ നാറ്റോ നയങ്ങളെക്കുറിച്ചുള്ള അനിശ്ചിതത്വം യൂറോപ്യന്‍ രാജ്യങ്ങളെ സ്വന്തം പ്രതിരോധശേഷി വര്‍ധിപ്പിക്കാന്‍ പ്രേരിപ്പിക്കുന്നുണ്ട്. പുതിയ കോണ്‍ഗ്രസ് ട്രംപിന്റെ ചില തീരുമാനങ്ങളെ നിയന്ത്രിച്ചേക്കാമെങ്കിലും അമേരിക്കയുടെ ദീര്‍ഘകാല തന്ത്രപരമായ നിലപാടില്‍ എത്രമാത്രം മാറ്റമുണ്ടാകുമെന്ന് വ്യക്തമല്ല.
സാങ്കേതികവിദ്യയുടെ ഭാവിയുംകൃത്രിമബുദ്ധിയുടെ നിയന്ത്രണവും
കൃത്രിമബുദ്ധിയുടെ അതിവേഗ വളര്‍ച്ചയും ഡാറ്റാ കേന്ദ്രങ്ങളുടെ വ്യാപനവും അമേരിക്കന്‍ രാഷ്ട്രീയത്തില്‍ പുതിയ ചര്‍ച്ചാവിഷയങ്ങളാണ്. സാങ്കേതികവിദ്യയുടെ വികസനത്തിനൊപ്പം സ്വകാര്യത, തൊഴില്‍, ഊര്‍ജോപയോഗം, പരിസ്ഥിതി, വിവരസുരക്ഷ തുടങ്ങിയ വിഷയങ്ങളില്‍ നിയന്ത്രണങ്ങള്‍ വേണമെന്ന ആവശ്യം ശക്തമാണ്. ഡെമോക്രാറ്റുകള്‍ കൃത്രിമബുദ്ധി കമ്പനികളുടെ പ്രവര്‍ത്തനങ്ങളിലും ഡാറ്റാ കേന്ദ്രങ്ങളുടെ വികസനത്തിലും കൂടുതല്‍ പരിശോധനയും നിയന്ത്രണവും ആവശ്യപ്പെട്ടേക്കാം. വലിയ സാങ്കേതിക കമ്പനികളുടെ വിപണിമേധാവിത്വം, വ്യക്തിഗത വിവരങ്ങളുടെ ദുരുപയോഗം, കൃത്രിമബുദ്ധി സൃഷ്ടിക്കുന്ന തൊഴില്‍പ്രതിസന്ധി എന്നിവയും കോണ്‍ഗ്രസിന്റെ പരിഗണനയില്‍ വരാം.ഇത് ഇന്ത്യയ്ക്കും പ്രധാനമാണ്. അമേരിക്കന്‍ സാങ്കേതിക കമ്പനികളുമായി ബന്ധപ്പെട്ട് പ്രവര്‍ത്തിക്കുന്ന ഇന്ത്യന്‍ ഐടി മേഖലയും സ്റ്റാര്‍ട്ടപ്പ് സംരംഭങ്ങളും പുതിയ നിയന്ത്രണങ്ങളോട് പൊരുത്തപ്പെടേണ്ടിവരും. മറുവശത്ത്, ഉത്തരവാദിത്വമുള്ള കൃത്രിമബുദ്ധി വികസനത്തിനും ഡാറ്റാ സുരക്ഷയ്ക്കും ആഗോള മാനദണ്ഡങ്ങള്‍ രൂപപ്പെടുന്നത് ഇന്ത്യന്‍ കമ്പനികള്‍ക്ക് ദീര്‍ഘകാലത്ത് ഗുണകരമാകാം.
ഇന്ത്യയുടെ മുന്നിലുള്ളപുതിയ നയതന്ത്ര സമവാക്യങ്ങള്‍
അമേരിക്കന്‍ തിരഞ്ഞെടുപ്പിന്റെ പ്രത്യാഘാതങ്ങള്‍ ഏറ്റവും സൂക്ഷ്മമായി നിരീക്ഷിക്കേണ്ട രാജ്യങ്ങളിലൊന്നാണ് ഇന്ത്യ. ലോകത്തിലെ ഏറ്റവും വലിയ ജനാധിപത്യരാജ്യവും ഏറ്റവും വലിയ സാമ്പത്തിക-സൈനിക ശക്തികളിലൊന്നുമായ അമേരിക്കയുമായുള്ള ബന്ധം ഇന്ത്യയുടെ വിദേശനയത്തിലും വ്യാപാരത്തിലും പ്രതിരോധമേഖലയിലും സാങ്കേതികവിദ്യയിലും നിര്‍ണായകമാണ്.ട്രംപിന്റെ രണ്ടാം ഭരണകാലത്ത് ഇന്ത്യ-അമേരിക്ക ബന്ധത്തില്‍ ചില വിള്ളലുകള്‍ പ്രത്യക്ഷപ്പെട്ടിരുന്നു. വ്യാപാരതര്‍ക്കങ്ങള്‍, ഇറക്കുമതിത്തീരുവകള്‍, റഷ്യയില്‍നിന്നുള്ള ഇന്ത്യയുടെ എണ്ണവാങ്ങല്‍, കുടിയേറ്റനയത്തിലെ നിയന്ത്രണങ്ങള്‍ തുടങ്ങിയ വിഷയങ്ങള്‍ ഇരുരാജ്യങ്ങള്‍ക്കുമിടയില്‍ അസ്വസ്ഥത സൃഷ്ടിച്ചു. പ്രധാനമന്ത്രി നരേന്ദ്ര മോദിയും ഡൊണാള്‍ഡ് ട്രംപും തമ്മില്‍ വ്യക്തിപരമായ സൗഹൃദമുണ്ടെങ്കിലും രാജ്യങ്ങളുടെ താത്പര്യങ്ങള്‍ പലപ്പോഴും വ്യത്യസ്ത ദിശകളിലാണ് സഞ്ചരിക്കുന്നത്.ഡെമോക്രാറ്റുകളുടെ തിരഞ്ഞെടുപ്പ് വിജയം ഇന്ത്യയ്ക്ക് പുതിയ നയതന്ത്രസാധ്യതകള്‍ തുറന്നേക്കാം. എന്നാല്‍ അമേരിക്കയുടെ ഇന്ത്യാനയത്തില്‍ അടിസ്ഥാനപരമായ മാറ്റമുണ്ടാകുമെന്ന് ഇപ്പോള്‍ പ്രതീക്ഷിക്കാനാവില്ല. ട്രംപിന്റെ വിദേശനയത്തെ കോണ്‍ഗ്രസ് കൂടുതല്‍ ചോദ്യം ചെയ്യുമെങ്കിലും ഇന്ത്യയുമായുള്ള ബന്ധത്തിന്റെ കാര്യത്തില്‍ റിപ്പബ്ലിക്കന്‍മാരും ഡെമോക്രാറ്റുകളും തമ്മില്‍ ചില പൊതുതാത്പര്യങ്ങളുണ്ട്. ചൈനയുടെ വളര്‍ച്ചയെ പ്രതിരോധിക്കുക, ഇന്തോ-പസഫിക് മേഖലയില്‍ സ്വാധീനം നിലനിര്‍ത്തുക, പ്രതിരോധ-സാങ്കേതിക സഹകരണം വര്‍ധിപ്പിക്കുക തുടങ്ങിയ വിഷയങ്ങളില്‍ ഇന്ത്യയ്ക്ക് അമേരിക്കയുടെ പിന്തുണ ഇരുപാര്‍ട്ടികളുടെയും പരിഗണനയിലുള്ളതാണ്.
വ്യാപാരബന്ധംആശ്വാസത്തിനൊപ്പം പുതിയ വെല്ലുവിളികളും
ഇന്ത്യയെ സംബന്ധിച്ചിടത്തോളം അമേരിക്കന്‍ തീരുവനയമാണ് ഏറ്റവും പ്രധാനപ്പെട്ട വിഷയങ്ങളിലൊന്ന്. ഇന്ത്യന്‍ ഉല്‍പ്പന്നങ്ങള്‍ക്ക് ഉയര്‍ന്ന ഇറക്കുമതിത്തീരുവ ഏര്‍പ്പെടുത്തുന്നതും വ്യാപാരകരാറുകള്‍ക്കായി സമ്മര്‍ദം ചെലുത്തുന്നതും ഇന്ത്യന്‍ കയറ്റുമതി മേഖലയെ ബാധിച്ചിട്ടുണ്ട്.ഡെമോക്രാറ്റുകളുടെ നിയന്ത്രണത്തിലുള്ള കോണ്‍ഗ്രസ്, ട്രംപിന്റെ തീരുവനയങ്ങളെ കൂടുതല്‍ ചോദ്യം ചെയ്യുന്നത് ഇന്ത്യയ്ക്ക് അനുകൂലമായേക്കാം. എന്നാല്‍ അമേരിക്കയുടെ വ്യാപാരസംരക്ഷണ സമീപനം പൂര്‍ണമായി മാറുമെന്ന് പ്രതീക്ഷിക്കാനാവില്ല. അമേരിക്കന്‍ തൊഴിലവസരങ്ങളും ആഭ്യന്തര ഉല്‍പ്പാദനവും സംരക്ഷിക്കണമെന്ന ആവശ്യം ഇരുപാര്‍ട്ടികളിലും ശക്തമാണ്.ഇന്ത്യയും അമേരിക്കയും തമ്മിലുള്ള വ്യാപാരകരാര്‍ സംബന്ധിച്ച ചര്‍ച്ചകള്‍ക്ക് പുതിയ രാഷ്ട്രീയസാഹചര്യം ചില അവസരങ്ങള്‍ നല്‍കിയേക്കാം. എന്നാല്‍ ട്രംപിന് വ്യാപാരനയത്തില്‍ ഇപ്പോഴും വലിയ നിര്‍വഹണാധികാരമുള്ളതിനാല്‍ ഇന്ത്യയ്ക്കുമേലുള്ള തീരുവസമ്മര്‍ദം പെട്ടെന്ന് ഇല്ലാതാകണമെന്നില്ല. അമേരിക്കയുമായുള്ള വ്യാപാരബന്ധത്തില്‍ കൂടുതല്‍ സ്ഥിരതയും പ്രവചനാത്മകതയും ഉറപ്പാക്കാന്‍ ഇന്ത്യയ്ക്ക് നയതന്ത്രപരമായ ജാഗ്രത ആവശ്യമാണ്.
ഇന്ത്യന്‍ ഐടി മേഖലയ്ക്കുംപ്രവാസികള്‍ക്കും എന്തു സംഭവിക്കും?
അമേരിക്കന്‍ കുടിയേറ്റനയത്തിലെ മാറ്റങ്ങള്‍ ഇന്ത്യന്‍ ഐടി മേഖലയെയും അമേരിക്കയില്‍ ജോലി ചെയ്യുന്ന ലക്ഷക്കണക്കിന് ഇന്ത്യക്കാരെയും നേരിട്ട് ബാധിക്കുന്നതാണ്. എച്ച്-1ബി വിസാ നിയന്ത്രണങ്ങളും വിസാ ഫീസിലെ വര്‍ധനയും വിദേശ തൊഴിലാളികളോടുള്ള കടുത്ത സമീപനവും ഇന്ത്യന്‍ സാങ്കേതികവിദഗ്ധര്‍ക്ക് ആശങ്ക സൃഷ്ടിച്ചിട്ടുണ്ട്.ഡെമോക്രാറ്റുകള്‍ കുടിയേറ്റനയത്തിലെ ചില നടപടികളെ ചോദ്യം ചെയ്യാനും വിദേശ തൊഴിലാളികളോടുള്ള സമീപനത്തില്‍ കൂടുതല്‍ പരിശോധന ആവശ്യപ്പെടാനും സാധ്യതയുണ്ട്. എന്നാല്‍ എച്ച്-1ബി വിസാ സംവിധാനത്തില്‍ വലിയ മാറ്റമുണ്ടാകുമെന്നോ ഇന്ത്യക്കാര്‍ക്ക് കൂടുതല്‍ അനുകൂലമായ നയം ഉടന്‍ നിലവില്‍ വരുമെന്നോ കരുതാനാവില്ല. അമേരിക്കന്‍ തൊഴില്‍വിപണിയിലെ താത്പര്യങ്ങളും കുടിയേറ്റനിയന്ത്രണവുമായി ബന്ധപ്പെട്ട രാഷ്ട്രീയ സമ്മര്‍ദങ്ങളും തുടരുകതന്നെ ചെയ്യുമെന്നാണ് ആ രാജ്യത്തിന്റെ ചരിത്രം പരിശോദിച്ചാല്‍ മനസിലാക്കാനാകുക.അമേരിക്കയിലെ ഇന്ത്യന്‍ ഐടി കമ്പനികള്‍ക്കും അവിടെ ജോലി ചെയ്യുന്ന മലയാളികള്‍ ഉള്‍പ്പെടെയുള്ള ഇന്ത്യന്‍ പ്രൊഫഷണലുകള്‍ക്കും ഈ രാഷ്ട്രീയമാറ്റം പക്ഷേ, നിര്‍ണായകമാണ്. വിസാ നയങ്ങളിലെ ചെറിയ മാറ്റങ്ങള്‍പോലും അവരുടെ തൊഴില്‍സുരക്ഷയെയും കുടുംബജീവിതത്തെയും ബാധിക്കും.
റഷ്യന്‍ എണ്ണയുംഇന്ത്യയുടെ തന്ത്രപരമായ സ്വാതന്ത്ര്യവും
അമേരിക്കയുമായുള്ള ഇന്ത്യയുടെ ബന്ധത്തില്‍ റഷ്യയുമായുള്ള ഇന്ത്യയുടെ സൗഹൃദവും പ്രധാനപ്പെട്ട ഘടകമാണ്. യുക്രെയ്ന് യുദ്ധത്തിനുശേഷം റഷ്യയില്‍നിന്ന് കുറഞ്ഞ വിലയ്ക്ക് എണ്ണ വാങ്ങാനുള്ള ഇന്ത്യയുടെ തീരുമാനം അമേരിക്കയില്‍ വിമര്‍ശനങ്ങള്‍ക്കിടയാക്കിയിരുന്നു. റഷ്യന്‍ എണ്ണയും ആയുധങ്ങളും വാങ്ങുന്നതുമായി ബന്ധപ്പെട്ട ഉപരോധനയങ്ങള്‍ ഇന്ത്യയ്ക്ക് സമ്മര്‍ദമുണ്ടാക്കി.ഇറാനുമായുള്ള യുദ്ധവും ആഗോള എണ്ണവിപണിയിലെ അസ്ഥിരതയും ഈ വിഷയത്തിന് കൂടുതല്‍ പ്രാധാന്യം നല്‍കുന്നു. പശ്ചിമേഷ്യയിലെ സംഘര്‍ഷം രൂക്ഷമായാല്‍ ഇന്ത്യയുടെ ഊര്‍ജസുരക്ഷയും ഇറക്കുമതിച്ചെലവും അപകടത്തിലാകും. റഷ്യയില്‍നിന്നും പശ്ചിമേഷ്യയില്‍നിന്നും മറ്റ് രാജ്യങ്ങളില്‍നിന്നും എണ്ണ ലഭ്യമാക്കാനുള്ള ഇന്ത്യയുടെ നയതന്ത്രനീക്കങ്ങള്‍ അതുകൊണ്ടുതന്നെ നിര്‍ണായകമാണ്.അമേരിക്കന്‍ കോണ്‍ഗ്രസില്‍ ഡെമോക്രാറ്റുകള്‍ക്ക് കൂടുതല്‍ സ്വാധീനം ലഭിച്ചതുകൊണ്ട് റഷ്യന്‍ എണ്ണയുടെ കാര്യത്തില്‍ ഇന്ത്യയ്ക്ക് പൂര്‍ണമായ ഇളവുണ്ടാകുമെന്ന് കരുതാനാവില്ല. റഷ്യയെ സംബന്ധിച്ച കടുത്ത നിലപാട് ഡെമോക്രാറ്റുകളിലും ശക്തമാണ്. അതിനാല്‍ ഇന്ത്യയുടെ തന്ത്രപരമായ സ്വാതന്ത്ര്യം സംരക്ഷിക്കാനുള്ള ശ്രമം തുടരണം. ഒരു രാജ്യത്തിന്റെയും സമ്മര്‍ദത്തിനു വഴങ്ങാതെ സ്വന്തം ഊര്‍ജ-സുരക്ഷാ താത്പര്യങ്ങള്‍ക്കനുസരിച്ച് തീരുമാനമെടുക്കാനുള്ള ഇന്ത്യയുടെ കഴിവാണ് ഇവിടെ പരീക്ഷിക്കപ്പെടുന്നത്.
പ്രതിരോധരംഗത്ത് ഇന്ത്യയ്ക്ക് അവസരങ്ങള്‍
അമേരിക്കയും ഇന്ത്യയും തമ്മിലുള്ള പ്രതിരോധസഹകരണം കഴിഞ്ഞ കുറെ വര്‍ഷങ്ങളായി ശക്തിപ്പെട്ടിട്ടുണ്ട്. ആയുധങ്ങള്‍, സൈനിക സാങ്കേതികവിദ്യ, രഹസ്യാന്വേഷണ വിവരങ്ങള്‍, നാവികസഹകരണം തുടങ്ങിയ മേഖലകളില്‍ ഇരുരാജ്യങ്ങളും ഒരുമിച്ച് പ്രവര്‍ത്തിക്കുന്നു. ചൈനയുടെ വര്‍ധിച്ചുവരുന്ന സൈനികസാന്നിധ്യവും ഇന്തോ-പസഫിക് മേഖലയിലെ സ്വാധീനമത്സരവും ഈ സഹകരണത്തിന് കൂടുതല്‍ പ്രാധാന്യം നല്‍കുന്നു.ഡെമോക്രാറ്റുകളുടെ വിജയം ഈ ബന്ധത്തിന് വലിയ തിരിച്ചടിയാകാന്‍ സാധ്യതയില്ല. മറിച്ച്, ഇന്ത്യയുമായുള്ള തന്ത്രപരമായ ബന്ധം കൂടുതല്‍ ശക്തിപ്പെടുത്തേണ്ടതിന്റെ ആവശ്യകത അമേരിക്കന്‍ കോണ്‍ഗ്രസില്‍ ചര്‍ച്ചയാകാം. പ്രതിരോധ ഉല്‍പ്പാദനത്തിലും സാങ്കേതികവിദ്യാ കൈമാറ്റത്തിലും സഹകരണത്തിന് പുതിയ അവസരങ്ങളുണ്ടാകാനും സാധ്യതയുണ്ട്.എന്നാല്‍ അമേരിക്കയുടെ വിദേശനയത്തിലെ അനിശ്ചിതത്വം ഇന്ത്യയ്ക്ക് വെല്ലുവിളിയുമാണ്. ഒരു ഭരണകൂടം സ്വീകരിക്കുന്ന നയങ്ങള്‍ അടുത്ത ഭരണകൂടം മാറ്റുന്ന സാഹചര്യം ഉണ്ടാകുമ്പോള്‍ ദീര്‍ഘകാല പ്രതിരോധപദ്ധതികള്‍ക്ക് സ്ഥിരത ഉറപ്പാക്കാന്‍ പ്രയാസമാകും. അതിനാല്‍ വ്യക്തിബന്ധങ്ങളെക്കാള്‍ സ്ഥാപനപരമായ ബന്ധങ്ങള്‍ക്ക് ഇന്ത്യ പ്രാധാന്യം നല്‍കേണ്ടതുണ്ട്.
കടക്കെണിയും പലിശനിരക്കുംആഗോള സാമ്പത്തിക അനിശ്ചിതത്വവും
അമേരിക്കന്‍ തിരഞ്ഞെടുപ്പിന്റെ മറ്റൊരു പ്രത്യാഘാതം ആഗോള സാമ്പത്തിക വിപണികളിലായിരിക്കും. സര്‍ക്കാര്‍ ചെലവുകള്‍, കടമെടുപ്പ്, നികുതി, പലിശനിരക്ക് തുടങ്ങിയ വിഷയങ്ങളില്‍ പുതിയ കോണ്‍ഗ്രസും പ്രസിഡന്റും തമ്മില്‍ അഭിപ്രായവ്യത്യാസങ്ങള്‍ ശക്തമായാല്‍ ബജറ്റ് പ്രതിസന്ധികള്‍ക്കും സര്‍ക്കാര്‍ പ്രവര്‍ത്തനങ്ങള്‍ ഭാഗികമായി സ്തംഭിക്കുന്നതിനും സാധ്യതയുണ്ട്.2027-ല്‍ സര്‍ക്കാര്‍ ധനവിനിയോഗത്തെക്കുറിച്ചും കടപരിധിയെക്കുറിച്ചും റിപ്പബ്ലിക്കന്‍ പ്രസിഡന്റും ഡെമോക്രാറ്റിക് കോണ്‍ഗ്രസും തമ്മില്‍ ഏറ്റുമുട്ടലുണ്ടാകാനുള്ള സാധ്യത സാമ്പത്തിക നിരീക്ഷകര്‍ ചൂണ്ടിക്കാട്ടുന്നു. അമേരിക്കന്‍ സമ്പദ്വ്യവസ്ഥയിലെ അനിശ്ചിതത്വം ലോകത്തെ ഓഹരിവിപണികളെയും നിക്ഷേപകരെയും ബാധിക്കും. അമേരിക്കന്‍ ഫെഡറല്‍ റിസര്‍വിന്റെ പലിശനിരക്കുകളിലെ തീരുമാനങ്ങള്‍ ഇന്ത്യയുള്‍പ്പെടെയുള്ള വികസ്വര രാജ്യങ്ങള്‍ക്കും പ്രധാനമാണ്. അമേരിക്കയിലെ പലിശനിരക്ക് ഉയര്‍ന്നുനില്‍ക്കുകയാണെങ്കില്‍ അന്താരാഷ്ട്ര നിക്ഷേപങ്ങള്‍ അമേരിക്കയിലേക്ക് ഒഴുകാനും വികസ്വര രാജ്യങ്ങളുടെ കറന്‍സികള്‍ക്കുമേല്‍ സമ്മര്‍ദമുണ്ടാകാനും സാധ്യതയുണ്ട്. അതേസമയം, എണ്ണവിലയും പണപ്പെരുപ്പവും നിയന്ത്രണവിധേയമായാല്‍ പലിശനിരക്കുകള്‍ കുറയ്ക്കാനുള്ള സാഹചര്യം രൂപപ്പെടാം.ഇന്ത്യയുടെ സാമ്പത്തിക വളര്‍ച്ചയ്ക്കും വിദേശനിക്ഷേപത്തിനും രൂപയുടെ മൂല്യസ്ഥിരതയ്ക്കും അമേരിക്കന്‍ സാമ്പത്തികനയങ്ങള്‍ നിര്‍ണായകമാണ്. അതുകൊണ്ടുതന്നെ വാഷിങ്ടണിലെ ബജറ്റ് തര്‍ക്കങ്ങള്‍ പോലും ന്യൂഡല്‍ഹിയിലെ സാമ്പത്തിക ആസൂത്രണത്തെ ബാധിക്കാവുന്ന സാഹചര്യമാണുള്ളത്.
പുതിയ ലോകക്രമത്തിന്റെ സൂചനയോ?
അമേരിക്കന്‍ തിരഞ്ഞെടുപ്പിന്റെ ഫലത്തെ ലോകക്രമത്തിലെ വലിയൊരു മാറ്റത്തിന്റെ തുടക്കമായി കാണാമോ? ഈ ചോദ്യത്തിന് ഇപ്പോള്‍ വ്യക്തമായ ഉത്തരം നല്‍കാനാവില്ല. എന്നാല്‍ അമേരിക്കയുടെ ആഭ്യന്തര രാഷ്ട്രീയത്തില്‍ സംഭവിച്ച മാറ്റം ആഗോള അധികാരസമവാക്യങ്ങളെ സ്വാധീനിക്കുമെന്നതില്‍ സംശയമില്ല.രണ്ടാം ലോകമഹായുദ്ധത്തിനുശേഷം അമേരിക്കയുടെ നേതൃത്വത്തില്‍ രൂപപ്പെട്ട അന്താരാഷ്ട്ര രാഷ്ട്രീയ-സാമ്പത്തിക ക്രമം ഇന്ന് പലതരത്തിലുള്ള വെല്ലുവിളികള്‍ നേരിടുകയാണ്. ചൈനയുടെ സാമ്പത്തിക-സൈനിക വളര്‍ച്ച, റഷ്യയുടെ പുനരുജ്ജീവനശ്രമങ്ങള്‍, പശ്ചിമേഷ്യയിലെ സംഘര്‍ഷങ്ങള്‍, യൂറോപ്പിന്റെ പ്രതിരോധസ്വയംപര്യാപ്തത, വികസ്വര രാജ്യങ്ങളുടെ വര്‍ധിച്ചുവരുന്ന സ്വാധീനം എന്നിവ ലോകത്തെ ബഹുധ്രുവ വ്യവസ്ഥയിലേക്ക് നയിക്കുന്നുണ്ട്.ട്രംപിന്റെ ‘അമേരിക്ക ആദ്യം’ എന്ന നയവും അന്താരാഷ്ട്ര കരാറുകളോടുള്ള സംശയവും സഖ്യരാജ്യങ്ങളോടുള്ള സമ്മര്‍ദവും ഈ മാറ്റങ്ങള്‍ക്ക് വേഗം കൂട്ടിയിട്ടുണ്ട്. പുതിയ കോണ്‍ഗ്രസ,് ഭരണകൂടത്തിന്റെ ചില ഏകപക്ഷീയ തീരുമാനങ്ങളെ നിയന്ത്രിച്ചേക്കാം. എന്നാല്‍ അമേരിക്കയുടെ ആഗോള ആധിപത്യം സംരക്ഷിക്കണമെന്ന താത്പര്യം ഡെമോക്രാറ്റുകളിലും ശക്തമാണ്. അതിനാല്‍ അമേരിക്കന്‍ വിദേശനയത്തില്‍ അടിസ്ഥാനപരമായ ദിശാമാറ്റം ഉണ്ടാകുമെന്ന് കരുതുന്നത് അതിശയോക്തിയാകും.ചൈനയെ സംബന്ധിച്ചിടത്തോളം ഈ സാഹചര്യം ശ്രദ്ധേയമാണ്. അമേരിക്കയുടെ ആഭ്യന്തര രാഷ്ട്രീയത്തില്‍ റിപ്പബ്ലിക്കന്‍-ഡെമോക്രാറ്റ് ഏറ്റുമുട്ടലുകള്‍ ശക്തമാകുന്നത് ചൈനയ്ക്ക് ചില നയതന്ത്രാവസരങ്ങള്‍ നല്‍കിയേക്കാം. എന്നാല്‍ വ്യാപാരം, സാങ്കേതികവിദ്യ, തായ്വാന്‍, ദക്ഷിണ ചൈനാക്കടല്‍ തുടങ്ങിയ വിഷയങ്ങളില്‍ അമേരിക്കയുടെ അടിസ്ഥാന നിലപാടുകള്‍ തുടര്‍ന്നേക്കും. അതിനാല്‍ ഡെമോക്രാറ്റുകളുടെ വിജയം ചൈനയ്ക്കുള്ള തുറന്ന രാഷ്ട്രീയവിജയമായി വ്യാഖ്യാനിക്കാനാവില്ല.ലോകത്തിലെ മറ്റു രാജ്യങ്ങളും ഈ പുതിയ സാഹചര്യത്തെ സൂക്ഷ്മമായി വിലയിരുത്തും. അമേരിക്കയുമായുള്ള ബന്ധം മാത്രം ആശ്രയിക്കാതെ യൂറോപ്പ്, ചൈന, റഷ്യ, ഗള്‍ഫ് രാജ്യങ്ങള്‍, ആഫ്രിക്ക, ഏഷ്യ എന്നിവയുമായി ബന്ധങ്ങള്‍ ശക്തിപ്പെടുത്താനുള്ള ശ്രമം കൂടുതല്‍ രാജ്യങ്ങളില്‍നിന്ന് ഉണ്ടാകാം.
ഇന്ത്യയുടെ അവസരംഇന്ത്യയുടെ ഉത്തരവാദിത്വം
ഈ സാഹചര്യത്തില്‍ ഇന്ത്യയ്ക്ക് ഒരു പ്രത്യേക സ്ഥാനമുണ്ട്. അമേരിക്കയുമായും റഷ്യയുമായും പശ്ചിമേഷ്യന്‍ രാജ്യങ്ങളുമായും ഒരേസമയം ബന്ധം നിലനിര്‍ത്താന്‍ കഴിയുന്ന രാജ്യമാണ് ഇന്ത്യ. ചൈനയുമായുള്ള അതിര്‍ത്തി-തന്ത്രപ്രധാന പ്രശ്‌നങ്ങള്‍ നിലനില്‍ക്കുമ്പോഴും ആഗോള ദക്ഷിണരാജ്യങ്ങളുടെ താത്പര്യങ്ങള്‍ ഉയര്‍ത്തിപ്പിടിക്കാനുള്ള ശ്രമവും ഇന്ത്യ നടത്തുന്നുണ്ട്. അമേരിക്കയിലെ രാഷ്ട്രീയമാറ്റത്തെ സ്വന്തം വിദേശനയത്തിന്റെ വിജയമായോ പരാജയമായോ മാത്രം കാണാതെ ദേശീയതാത്പര്യങ്ങള്‍ സംരക്ഷിക്കുന്നതിനുള്ള പുതിയ അവസരമായി ഇന്ത്യ ഉപയോഗിക്കണം. വ്യാപാരബന്ധങ്ങളില്‍ കൂടുതല്‍ നീതിയും സ്ഥിരതയും ഉറപ്പാക്കണം. ഊര്‍ജസുരക്ഷയ്ക്ക് ബഹുമുഖ സമീപനം സ്വീകരിക്കണം. പ്രതിരോധരംഗത്ത് സാങ്കേതിക സ്വയംപര്യാപ്തത വര്‍ധിപ്പിക്കണം. അമേരിക്കയിലെ ഇന്ത്യന്‍ പ്രവാസികളുടെ അവകാശങ്ങളും തൊഴില്‍സുരക്ഷയും ഉറപ്പാക്കുന്നതിനും നയതന്ത്രശ്രദ്ധ വേണം.അമേരിക്കന്‍ തിരഞ്ഞെടുപ്പില്‍ ഡെമോക്രാറ്റുകള്‍ നേടിയ വിജയം ട്രംപിന്റെ രാഷ്ട്രീയാധികാരത്തിന് നിയന്ത്രണങ്ങള്‍ സൃഷ്ടിച്ചിട്ടുണ്ടെങ്കിലും അത് അമേരിക്കയുടെ ആഗോള നയങ്ങളില്‍ സമ്പൂര്‍ണമായ മാറ്റത്തിന് വഴിയൊരുക്കിയിട്ടില്ല. യുദ്ധം, വ്യാപാരം, ഊര്‍ജം, സാങ്കേതികവിദ്യ, കുടിയേറ്റം തുടങ്ങിയ വിഷയങ്ങളില്‍ പുതിയ ഏറ്റുമുട്ടലുകള്‍ക്കും ഒത്തുതീര്‍പ്പുകള്‍ക്കും ഒരേസമയം സാധ്യതയുണ്ട്. ഒരു രാജ്യത്തെ തിരഞ്ഞെടുപ്പ് ഫലം ലോകത്തിന്റെ ഭാവിയെ എത്രമാത്രം സ്വാധീനിക്കുമെന്നത് ആ രാജ്യത്തിന്റെ അധികാരവിന്യാസം മാത്രമല്ല, മറ്റു രാജ്യങ്ങള്‍ അതിനോട് എങ്ങനെ പ്രതികരിക്കുന്നു എന്നതിനെക്കൂടി ആശ്രയിച്ചിരിക്കുന്നു.വാഷിങ്ടണിലെ അധികാരത്തിന്റെ ചുവരുകളില്‍ സംഭവിച്ച വിള്ളലുകള്‍ ലോകത്തിന്റെ രാഷ്ട്രീയഭൂപടത്തില്‍ പുതിയ വഴികള്‍ തുറക്കുമോ, അതോ പഴയ അധികാരമത്സരങ്ങള്‍ക്ക് പുതിയ രൂപം നല്‍കുമോ? അതിനുള്ള ഉത്തരം വരും മാസങ്ങളിലെ സംഭവവികാസങ്ങളിലായിരിക്കും. എന്നാല്‍ ഒരു കാര്യം വ്യക്തമാണ്: അമേരിക്കന്‍ ജനതയുടെ ഈ വിധിയെഴുത്ത് ട്രംപിന്റെ ഭരണത്തിന്റെ ശേഷിക്കുന്ന കാലത്തെ മാത്രമല്ല, ആഗോള രാഷ്ട്രീയത്തിന്റെ അടുത്ത അധ്യായത്തെയും സ്വാധീനിക്കാന്‍ പോകുന്നു.
