വത്തിക്കാൻ സിറ്റി: ലെയോ പതിനാലാമൻ പാപ്പായുടെ ശ്വാസകോശത്തിൽനിന്ന് ശസ്ത്രക്രിയയിലൂടെ നീക്കം ചെയ്ത മുഴയുടെ പരിശോധനാഫലം പുറത്തുവന്നു. പാപ്പായ്ക്ക് കൂടുതൽ ചികിത്സ ആവശ്യമില്ലെന്ന് ഡോക്ടർമാർ സ്ഥിരീകരിച്ചതായി ഒക്ടോബർ 21-ന് പരിശുദ്ധ സിംഹാസനത്തിന്റെ പ്രസ് ഓഫീസ് അറിയിച്ചു.
ഒക്ടോബർ 13-ന് റോമിലെ ജെമെല്ലി ആശുപത്രിയിൽ നടത്തിയ ശസ്ത്രക്രിയയിൽ പാപ്പായുടെ വലത് ശ്വാസകോശത്തിന്റെ താഴത്തെ ലോബിൽനിന്നാണ് മുഴ നീക്കം ചെയ്തത്. ഇത് ശ്വാസകോശ അഡിനോകാർസിനോമയാണെന്നും രോഗം പ്രാദേശികമായി പരിമിതപ്പെട്ട നിലയിലായിരുന്നുവെന്നും നേരത്തേ വ്യക്തമാക്കിയിരുന്നു. ശസ്ത്രക്രിയയിലൂടെ നീക്കം ചെയ്ത കലകളിൽ നടത്തിയ സൂക്ഷ്മപരിശോധനയുടെയും കോശങ്ങളിലെ ജനിതകമാറ്റങ്ങൾ പരിശോധിക്കുന്ന മോളിക്യുലാർ പരിശോധനയുടെയും ഫലങ്ങൾ വിലയിരുത്തിയ ശേഷമാണ് ഡോക്ടർമാർ കൂടുതൽ ചികിത്സ ആവശ്യമില്ലെന്ന് സ്ഥിരീകരിച്ചത്. ഡോ. ലൂയിജി കാർബോണെയും പ്രൊഫ. സ്തേഫനോ മാർഗരിത്തോറയുമാണ് പരിശോധനകളുടെ അടിസ്ഥാനത്തിൽ ഇക്കാര്യം അറിയിച്ചത്.
