കൊച്ചി: സമൂഹത്തിന്റെ അരികുകളിലേക്ക് മാറ്റിനിർത്തപ്പെട്ടവരുടെ ജീവിതത്തിലേക്ക് ഇറങ്ങിച്ചെന്ന് അവരുടെ വേദനകളും പ്രതീക്ഷകളും പങ്കുവെച്ച് സേവനം ചെയ്ത വ്യക്തിയായിരുന്നു ബ്രദർ മാവറൂസ്. ക്രിസ്തീയ വിശ്വാസം വാക്കുകളിലൂടെ മാത്രമല്ല, മനുഷ്യസ്നേഹത്തിലൂടെയും സേവനത്തിലൂടെയും സാമൂഹിക ഇടപെടലിലൂടെയും സാക്ഷ്യപ്പെടുത്തണമെന്ന ബോധ്യമാണ് അദ്ദേഹത്തിന്റെ പ്രവർത്തനങ്ങളിൽ പ്രകടമായിരുന്നത്.
എറണാകുളം ഉദയ കോളനിയിലെ ജനങ്ങൾക്കിടയിൽ അദ്ദേഹം നടത്തിയ സേവനം പ്രത്യേകം ശ്രദ്ധേയമാണ്. സമൂഹത്തിന്റെ മുഖ്യധാരയിൽനിന്ന് അകന്നുനിന്നിരുന്ന കുടുംബങ്ങളുടെയും കുട്ടികളുടെയും ജീവിതത്തിലേക്ക് സ്നേഹപൂർവം കടന്നുചെന്ന് അവരുടെ സാഹചര്യങ്ങൾ മനസ്സിലാക്കാനും പ്രശ്നങ്ങൾ കേൾക്കാനും അവരോടൊപ്പം നിൽക്കാനും ബ്രദർ മാവറൂസ് തയ്യാറായി.സഹായം നൽകുന്നതിൽ മാത്രം ഒതുങ്ങാതെ മനുഷ്യരുടെ അന്തസ്സും ആത്മവിശ്വാസവും അവകാശബോധവും വീണ്ടെടുക്കുന്നതിനായിരുന്നു അദ്ദേഹത്തിന്റെ ഇടപെടലുകൾ.
കുട്ടികളുടെ വിദ്യാഭ്യാസത്തിനും കുടുംബങ്ങളുടെ സാമൂഹിക പുരോഗതിക്കും അദ്ദേഹം പ്രത്യേക പ്രാധാന്യം നൽകി.ജനങ്ങൾക്കിടയിലെ സജീവ സാന്നിധ്യമായിരുന്നു അദ്ദേഹത്തിന്റെ സേവനത്തിന്റെ പ്രധാന പ്രത്യേകത. കേൾക്കുക, കൂടെ നടക്കുക, പ്രോത്സാഹിപ്പിക്കുക, അവസരങ്ങൾ സൃഷ്ടിക്കുക എന്നിവയിലൂടെ ജനങ്ങളെ ശാക്തീകരിക്കുകയായിരുന്നു അദ്ദേഹം.സാമൂഹ്യസേവനം കേവലം ദാനധർമ്മമല്ലെന്നും കരുണയിൽനിന്ന് സാമൂഹിക പരിവർത്തനത്തിലേക്ക് വളരുന്ന പ്രക്രിയയാണെന്നും ബ്രദർ മാവറൂസിന്റെ ജീവിതം ഓർമിപ്പിക്കുന്നു. മനുഷ്യന്റെ അന്തസ്സ് സംരക്ഷിക്കുകയും സ്വന്തം കാലിൽ നിൽക്കാനുള്ള അവസരം ഒരുക്കുകയും ചെയ്യുന്നതാണ് യഥാർഥ സാമൂഹ്യസേവനമെന്ന സന്ദേശമാണ് അദ്ദേഹത്തിന്റെ പ്രവർത്തനങ്ങൾ നൽകുന്നത്.
