ന്യൂഡൽഹി: രാജ്യം ഇന്ന് 80-ാം സ്വാതന്ത്ര്യദിനം ആഘോഷിക്കുന്നു. തെരുവുകളിൽ മുഴങ്ങുന്ന ദേശഭക്തിഗാനങ്ങളും ആകാശത്ത് പാറുന്ന ത്രിവർണപതാകയും ഓരോ ഇന്ത്യക്കാരന്റെയും മനസ്സിൽ നിറയുന്ന ദേശാഭിമാനവും ചേർന്നാണ് സ്വാതന്ത്ര്യദിനാഘോഷങ്ങൾക്ക് തുടക്കമാകുന്നത്. സ്വാതന്ത്ര്യത്തിനായി ജീവൻ ബലിയർപ്പിച്ച ധീരദേശാഭിമാനികളെ അനുസ്മരിക്കുകയും രാജ്യത്തിന്റെ ഐക്യവും അഖണ്ഡതയും ജനാധിപത്യ മൂല്യങ്ങളും ഉയർത്തിപ്പിടിക്കുമെന്ന് പ്രതിജ്ഞ പുതുക്കുകയും ചെയ്യുന്ന ദിനം കൂടിയാണിത്.
സ്വാതന്ത്ര്യത്തിന്റെ എൺപത് വർഷങ്ങൾ പിന്നിടുമ്പോൾ രാജ്യത്തിന്റെ പുരോഗതിക്കും സമാധാനത്തിനും ഐക്യത്തിനും വേണ്ടി ഓരോ പൗരനും തന്റെ ഉത്തരവാദിത്വം തിരിച്ചറിയേണ്ട അവസരമാണ് ഈ സ്വാതന്ത്ര്യദിനം.“വികസിത ഭാരതത്തിനായി യുവശക്തി@2047” എന്നതാണ് 2026ലെ സ്വാതന്ത്ര്യദിനത്തിന്റെ പ്രമേയം. 2047ഓടെ ഇന്ത്യയെ വികസിത രാഷ്ട്രമാക്കി മാറ്റുന്നതിൽ യുവജനങ്ങളുടെ പങ്കും കഴിവുകളും സംഭാവനകളും ഉയർത്തിക്കാട്ടുകയാണ് പ്രമേയത്തിന്റെ ലക്ഷ്യം. രാജ്യത്തിന്റെ ഭാവി നിർണയിക്കുന്നതിൽ യുവതലമുറയുടെ ഊർജവും ആശയങ്ങളും നൈപുണ്യങ്ങളും നിർണായകമാണെന്ന സന്ദേശവും പ്രമേയം മുന്നോട്ടുവയ്ക്കുന്നു.
ദേശീയഗാനമായ ‘വന്ദേ മാതരം’ 150-ാം വാർഷികവും ഈ വർഷത്തെ സ്വാതന്ത്ര്യദിനാഘോഷങ്ങളുടെ പ്രധാന പ്രത്യേകതയാണ്.
രാജ്യത്തിന്റെ വിവിധ ഭാഗങ്ങളിൽ ഇന്ന് ദേശീയപതാക ഉയർത്തലും സ്വാതന്ത്ര്യദിനത്തോടനുബന്ധിച്ചുള്ള പരിപാടികൾ നടക്കും. വിദ്യാലയങ്ങൾ, സർക്കാർ സ്ഥാപനങ്ങൾ, വിവിധ സംഘടനകൾ, പൊതുസ്ഥാപനങ്ങൾ എന്നിവിടങ്ങളിലും വിപുലമായ ആഘോഷങ്ങൾ സംഘടിപ്പിച്ചിട്ടുണ്ട്. സ്വാതന്ത്ര്യസമര സേനാനികളുടെ ത്യാഗങ്ങൾ അനുസ്മരിച്ച് രാജ്യത്തിന്റെ ഐക്യത്തിനും അഖണ്ഡതയ്ക്കും വികസനത്തിനുമായി പ്രതിജ്ഞ പുതുക്കിയാണ് രാജ്യം 80-ാം സ്വാതന്ത്ര്യദിനം ആഘോഷിക്കുന്നത്.
