വത്തിക്കാൻ: വിശുദ്ധ കൊളംബാനോസിന്റെ ആത്മീയ പൈതൃകം ഇന്നും സഭയ്ക്കും ലോകത്തിനും പ്രചോദനമാണെന്നും, വിശ്വാസം, സംസ്കാരം, സാഹോദര്യം എന്നിവ വളർത്തുന്നതിൽ അദ്ദേഹത്തിന്റെ ജീവിതസാക്ഷ്യം മാതൃകയാണെന്നും ലെയോ പതിനാലാമൻ പാപ്പ പറഞ്ഞു. ഇറ്റലിയിലെ ലോദിയിൽ നടന്ന 27-ാമത് കൊളംബാനസ് ദിനാചരണത്തോടനുബന്ധിച്ച് അയച്ച സന്ദേശത്തിലാണ് പാപ്പ ഈ കാര്യം വ്യക്തമാക്കിയത്.
വിശുദ്ധ കൊളംബാനോസിന്റെ ജീവിതവും ദൗത്യവും പുതിയ തലമുറയിലേക്ക് എത്തിക്കുന്നതിനായി വർഷങ്ങളായി തുടരുന്ന കൊളംബാനസ് ദിനാചരണത്തെ പാപ്പ അഭിനന്ദിച്ചു. വിവിധ രാജ്യങ്ങളിൽ നിന്നുള്ള വിശ്വാസികളെ ഒരുമിച്ചുകൂട്ടുകയും, ക്രൈസ്തവ വിശ്വാസത്തിന്റെ പൊതുമൂല്യങ്ങൾ ശക്തിപ്പെടുത്തുകയും ചെയ്യുന്ന വേദിയായി ഈ ആഘോഷം മാറിയിട്ടുണ്ടെന്നും അദ്ദേഹം ചൂണ്ടിക്കാട്ടി.
ആത്മീയ നവീകരണത്തിനും സഭയിലെ ഐക്യത്തിനും വിശുദ്ധ കൊളംബാനോസ് നൽകിയ പ്രാധാന്യം ഇന്നത്തെ സാഹചര്യത്തിലും ഏറെ പ്രസക്തമാണെന്ന് പാപ്പ പറഞ്ഞു. വിഭജനങ്ങളും അക്രമങ്ങളും വർധിക്കുന്ന ലോകത്തിൽ സമാധാനത്തിന്റെയും അനുരഞ്ജനത്തിന്റെയും സാക്ഷികളാകാൻ വിശ്വാസികൾ മുന്നിട്ടിറങ്ങണമെന്നും അദ്ദേഹം ആഹ്വാനം ചെയ്തു.
