ന്യൂഡല്‍ഹി : ഡല്‍ഹി അലിപൂര്‍ ദയാല്‍പൂര്‍ മാര്‍ക്കറ്റിലെ പെയിന്‍റ് ഫാക്‌ടറിയില്‍ തീപടര്‍ന്ന് 11 പേര്‍ മരിച്ചു . സംഭവത്തില്‍ നാല് പേര്‍ക്ക് ഗുരുതരമായി പൊള്ളലേറ്റിട്ടുണ്ട്. ഫാക്‌ടറിയുടെ വളപ്പില്‍ നിന്നാണ് മൃതദേഹങ്ങള്‍ കണ്ടെത്തിയത്.
കത്തിക്കരിഞ്ഞ നിലയിലായിരുന്നു മൃതദേഹങ്ങള്‍. മരിച്ചവരെ തിരിച്ചറിഞ്ഞിട്ടില്ല. മൃതദേഹങ്ങള്‍ ബാബു ജഗ്‌ജീവന്‍ റാം ആശുപത്രിയില്‍ സൂക്ഷിച്ചിരിക്കുന്നു. പരിക്കേറ്റ നാലുപേര്‍ ചികിത്സയിലാണ്. ഇവരില്‍ ഒരാള്‍ക്ക് രക്ഷാപ്രവര്‍ത്തനത്തിന് ഇടയിലാണ് പരിക്കേറ്റത്.
ഇന്നലെ വൈകിട്ടോടെയായിരുന്നു സംഭവം. വൈകിട്ട് 5.25 നാണ് തീപിടിത്തത്തെ കുറിച്ച് തങ്ങള്‍ക്ക് വിവരം ലഭിച്ചതെന്നും ഉടന്‍ രക്ഷാപ്രവര്‍ത്തനത്തിനായി ഫയര്‍ ആന്‍ഡ് റെസ്‌ക്യൂ സംഘത്തെ അയച്ചതായും ഡിഎഫ്‌എസ് ഉദ്യോഗസ്ഥന്‍ പറഞ്ഞു. തിപിടിത്തം ഉണ്ടായതിന് തൊട്ടുപിന്നാലെ തന്നെ ഡല്‍ഹി ഫയര്‍ സര്‍വീസസ് ടെന്‍ഡര്‍ സ്ഥലത്തെത്തി തീയണക്കുകയായിരുന്നു. രാത്രി 9 മണിയോടെ തീ നിയന്ത്രണ വിധേയമാക്കി.
