വചനപ്രഘോഷണം ജീവിതബന്ധിയാകണം – ബിഷപ്പ് ആന്റണി വാലുങ്കൽ

കൊച്ചി : എളിമ നിറഞ്ഞ ഹൃദയത്തോടെ സഭാ കൂട്ടായ്മയോട് ചേർന്നു നിന്നു വേണം വചനപ്രഘോഷണം നടത്താൻ എന്ന് ബിഷപ്പ് ആന്റണി വാലുങ്കൽ പ്രസ്താവിച്ചു. വചനപ്രഘോഷണം ജീവിതബന്ധിയാകണം എന്ന് ബിഷപ്പ് ഉത്ബോധിപ്പിച്ചു. എറണാകുളം ആശിർഭവനിൽ കെ.ആർ.എൽ.സി.ബി.സി. പ്രൊക്ലമേഷൻ കമ്മീഷൻ സംഘടിപ്പിച്ച അൽമായവചനപ്രഘോഷകരുടെ സെമിനാറിൽ സംസാരിക്കുകയായിരുന്നു ബിഷപ്പ്. കണ്ണൂർ മുതൽ നെയ്യാറ്റിൻകര വരെയുള്ള 12 രൂപതകളെ പ്രതിനിധീകരിച്ച് വചനപ്രഘോഷകർ പങ്കെടുത്തു. പരിശുദ്ധാത്മാവിന്റെ ചൈതന്യത്തോടെ വചനം പകരുന്ന സഭയിലെ ഏറ്റവും അനുഗ്രഹീതമായ ഒരു പ്രക്രിയയിൽ നിരതരായിരിക്കുന്ന എല്ലാവരെയും ബിഷപ്പ് അഭിനന്ദിച്ചു. കമ്മീഷൻ സെക്രട്ടറി ഡോ. സ്റ്റാൻലി മാതിരപ്പള്ളി ക്ലാസ് നയിച്ചു. നിരവധി അൽമായരും സന്യസ്തരും ഈ സെമിനാറിൽ പങ്കുചേർന്നു. ബിജു തോമസ്, മാർട്ടിൻ നൂനെസ്, ബെന്നി രാജൻ, ജൂഡ് സി വർഗീസ്, ഷാജി പി ജോർജ് എന്നിവർ സംസാരിച്ചു.