ശരത് വെണ്പാല
മുന്മൊഴി
കേരളത്തിന്റെ പതിമൂന്നാമത് മുഖ്യമന്ത്രിയായി ശ്രീ വി.ഡി സതീശന് അധികാരമേറ്റിരിക്കുന്നു. അനുമോദനങ്ങള്;ആശംസകള്!
പത്ത് മിനിറ്റുകൊണ്ട് കാര്യങ്ങള് തീര്ക്കാമെന്ന് മുനമ്പംകാരോട് പറഞ്ഞ അദ്ദേഹത്തിന് തന്റെ കസേരയില് ഇരിക്കാന് തന്നെ പതിനൊന്ന് ദിവസമെടുത്തു എന്നത് 102 സീറ്റ് എന്ന വിസ്മയം കാട്ടി ജയിപ്പിച്ച ജനത്തോട് ഒരു മുന്നണിയോ അല്ലെങ്കില് ഒരു പാര്ട്ടിയോ കാട്ടിയ അനാദരവ് ആണ് എന്നതിന് സംശയം ഇല്ല. കൂടെ തീരദേശത്ത് വിജയഗാഥ രചിക്കാന് കൂടെ നിന്ന ലത്തീന്കത്തോലിക്കരോട് അവരുടെ ഒരു മന്ത്രിയെ നല്കാതെ അനീതിപരമായി പ്രവര്ത്തിക്കുകയും ചെയ്തു. ഇതൊക്കെയാണെങ്കിലും സത്യപ്രതിജ്ഞക്കു ശേഷം ആദ്യ ഉത്തരവുകള് വന്നപ്പോള് പ്രതീക്ഷകള്ക്ക് വീണ്ടും പുതുജീവന് ഉണ്ടായി. ആശാ വര്ക്കേഴ്സിനും അംഗന്വാടി ടീച്ചര്മാര്ക്കും ശമ്പളവര്ധന, ഇന്ത്യയില് ഒരു സംസ്ഥാനത്ത് ആദ്യമായി ജപ്പാന് മോഡല് വയോജന വകുപ്പ്, സ്ത്രീകള്ക്ക് സൗജന്യ ബസ്സ് യാത്ര തുടങ്ങിയ ജനപ്രിയ പദ്ധതികള് ഈ സര്ക്കാര് നടപ്പില് വരുത്തും എന്ന് പ്രത്യാശ പൊതുവില് പരത്തിയിട്ടുണ്ട്. എന്നിരുന്നാലും മുഖ്യമന്ത്രിയുടെ പുസ്തകത്തിന്റെ തലക്കെട്ടിന്റെ ശൈലിയില് പറഞ്ഞാല് ഒരു ഭരണകൂടം പൊതുഖജനാവില് നിന്ന് പണമെടുത്ത് പദ്ധതികള് നടപ്പിലാക്കുമ്പോള് ജനം ചോദിക്കുന്ന പ്രസക്തമായ ചോദ്യം ”ഭരണകൂടമേ നീ ആരോടൊപ്പം? ‘ എന്നതാകും. ഇന്നത്തെ കേരളത്തില് ഭരണകൂടം കൂടെ നില്ക്കണ്ടേവര് ആരെല്ലാമെന്നു അക്കമിട്ട് പറഞ്ഞാല് അത് താഴെ പറയുന്നവര് ആകും എന്നതില് ഒരു സംശയവും ഇല്ല.
- മുനമ്പം മുനമ്പിലെ മനുഷ്യര്
മുനമ്പത്തെ 610-ലധികം കുടുംബങ്ങള് ഇന്ന് നേരിടുന്നത് സമാനതകളില്ലാത്ത ഒരു മാനുഷിക പ്രതിസന്ധിയാണ്. ഈ മണ്ണില് അവര് അതിജീവനത്തിന്റെ വേരുകള് പടര്ത്തിയിട്ട് പതിറ്റാണ്ടുകളായി. അവിടെ കാണുന്നത് നിയമത്തിന്റെ ചരടുകളില് കുടുങ്ങിപ്പോയ മനുഷ്യരെയാണ്: കടലിനോട് പടവെട്ടി ജീവിക്കുന്ന പരമ്പരാഗത മത്സ്യത്തൊഴിലാളികളും സാധാരണക്കാരുമാണ് മുനമ്പത്തുകാര്. ആരും അവര്ക്ക് സൗജന്യമായി തന്നതല്ല ഈ മണ്ണ്. പട്ടിണി കിടന്നും കടല്പ്പാടങ്ങളില് ചോര നീരാക്കിയും അധ്വാനിച്ച പണം കൊടുത്ത്, നിയമപരമായി രജിസ്റ്റര് ചെയ്ത് വാങ്ങിയ ഭൂമിയാണിത്. ആ മണ്ണിലാണ് പെട്ടെന്നൊരുനാള് വഖഫ് ബോര്ഡിന്റെ ഫത്വ വീഴുന്നത്. നിസ്സംഗത നടിക്കുന്ന ഭരണകൂടം ആരെയാണ് പ്രീതിപ്പെടുത്തുന്നത്?
അമ്മമാരുടെ കണ്ണീരും കുഞ്ഞുങ്ങളുടെ ആശങ്കയും
പണയം വെച്ച് മക്കളുടെ വിദ്യാഭ്യാസമോ വിവാഹമോ നടത്താന് ഈ ഭൂമിയുടെ ആധാരങ്ങള് ഇന്ന് ബാങ്കുകള് സ്വീകരിക്കുന്നില്ല. വീട് പുതുക്കിപ്പണിയാനോ, പുതിയൊരു മുറി കൂട്ടിയെടുക്കാനോ പഞ്ചായത്ത് അനുമതി നല്കുന്നില്ല. നികുതി പോലും ഒടുക്കാന് കഴിയാതെ, സ്വന്തം വീട്ടില് വാടകക്കാരെപ്പോലെ ജീവിക്കേണ്ടി വരുന്ന ഒരു ജനതയുടെ മനോവിഷമം ഏതെങ്കിലും നിയമപുസ്തകത്തിന് അളക്കാനാകുമോ? അന്തിയുറങ്ങുന്ന കൂരയ്ക്ക് മുകളില് എപ്പോള് വേണമെങ്കിലും വീഴാവുന്ന ഒരു മഴുപോലെ വഖഫ് നിയമത്തിന്റെ കരിനിഴല് നില്ക്കുമ്പോള്, അവിടുത്തെ അമ്മമാരുടെ കണ്ണീരിന് ആര് മറുപടി പറയും? ചതിക്കപ്പെട്ടത് നിയമവ്യവസ്ഥയോ മനുഷ്യത്വമോ? ഭൂമി വാങ്ങുമ്പോള് വില്ലേജ് ഓഫീസിലോ രജിസ്ട്രേഷന് വകുപ്പിലോ ഇല്ലാതിരുന്ന എന്ത് തടസ്സമാണ് ഇപ്പോഴുള്ളത്? നിയമപരമായ എല്ലാ നികുതികളും വാങ്ങി സര്ക്കാര് ഒപ്പിട്ടു നല്കിയ ആധാരങ്ങള്ക്ക് ഒരു വിലയുമില്ലാതാകുമ്പോള്, സാധാരണക്കാരന് പിന്നെ ആരെയാണ് വിശ്വസിക്കേണ്ടത്? ജസ്റ്റിസ് സി.എന്. രാമചന്ദ്രന് നായര് കമ്മീഷന് റിപ്പോര്ട്ട് നടപ്പിലാക്കാന് മടിക്കുന്നവര് ഓര്ക്കുക; ഇത് വെറുമൊരു ഭൂമിത്തര്ക്കമല്ല, ഒരു ജനതയെ ജീവനോടെ കുഴിച്ചുമൂടാന് സമ്മതിക്കില്ലെന്ന പ്രഖ്യാപനമാണ്. ഇവിടെ ഭരണകൂടമേ നീ ആരോടൊപ്പം? കടലില് ചാടാന് വിധിക്കപ്പെട്ട ഈ ജനത്തോടൊപ്പമോ അതോ വഖഫ് ബോര്ഡിനൊപ്പമോ? പത്ത് മിനിറ്റല്ല പത്ത് ദിവസമെടുത്തോളൂ
- ജെ.ബി. കോശി കമ്മീഷന് റിപ്പോര്ട്ട്:
ചുവപ്പുനാടയിലെ ആസൂത്രിത അവഗണന
ലത്തീന് കത്തോലിക്കാ വിഭാഗം ഉള്പ്പെടെയുള്ള ക്രൈസ്തവ പിന്നാക്ക ജനവിഭാഗങ്ങളുടെ വിദ്യാഭ്യാസ-സാമ്പത്തിക-സാമൂഹിക പിന്നാക്കാവസ്ഥ പഠിക്കാന് ജസ്റ്റിസ് ജെ.ബി. കോശി കമ്മീഷനെ പ്രഖ്യാപിക്കുമ്പോള് വലിയ പ്രതീക്ഷയിലായിരുന്നു ഈ ജനത. എന്നാല് കമ്മീഷന് രൂപീകരണത്തിന്റെ ആദ്യഘട്ടം മുതല് ഇന്നുവരെ ഭരണകൂടം കാട്ടിയത് കടുത്ത നിസ്സംഗതയും ചതിയുമാണ്. സമൂഹത്തിന്റെ കണ്ണില് പൊടിയിടാന് കമ്മീഷനെ പ്രഖ്യാപിച്ചെങ്കിലും, ഓഫീസ് സൗകര്യങ്ങളും ജീവനക്കാരെയും അനുവദിക്കുന്നതില് പോലും മാസങ്ങളുടെ മെല്ലെപ്പോക്ക് നയമാണ് അധികാരികള് സ്വീകരിച്ചത്. കമ്മീഷന് പ്രവര്ത്തനം തുടങ്ങാന് തന്നെ കര്ഷക-തീരദേശ ജനതയ്ക്ക് തെരുവില് സമരം ചെയ്യേണ്ടി വന്നു.
റിപ്പോര്ട്ട് പൂഴ്ത്തിവെക്കാനുള്ള ആസൂത്രിത താമസം:
ഒടുവില് കമ്മീഷന് കൃത്യമായ പഠനങ്ങള് നടത്തി സമഗ്രമായ ശുപാര്ശകള് സമര്പ്പിച്ചിട്ടും അത് പുറത്തുവിടാന് ഭരണകൂടം കാട്ടിയ താമസം ദുരൂഹമായിരുന്നു. ക്രൈസ്തവ പിന്നാക്ക ജനവിഭാഗങ്ങള് അനുഭവിക്കുന്ന യഥാര്ത്ഥ ദുരിതങ്ങള് പൊതുസമൂഹം അറിഞ്ഞാല് തങ്ങളുടെ വോട്ട് ബാങ്ക് രാഷ്ട്രീയത്തിന് കോട്ടം തട്ടുമോ എന്ന് ഭയന്ന ഭരണാധികാരികള് ആ റിപ്പോര്ട്ട് മാസങ്ങളോളം ഫയലുകളുടെ ഇരുട്ടറയില് പൂഴ്ത്തിവെച്ചു.
നടപ്പിലാക്കാന് കാട്ടിയ ക്രിമിനല് അനാസ്ഥ:
ഒടുവില് ശക്തമായ ജനകീയ പ്രതിഷേധങ്ങള്ക്കൊടുവില് റിപ്പോര്ട്ട് പുറത്തുവിടാന് സര്ക്കാര് നിര്ബന്ധിതരായെങ്കിലും, അതിലെ 284 ജീവല്പ്രധാനമായ ശുപാര്ശകള് നടപ്പിലാക്കാന് കാട്ടുന്ന അനാസ്ഥ ക്രിമിനല് കുറ്റത്തിന് തുല്യമാണ്. തത്വത്തില് അംഗീകരിച്ചു എന്ന് വരുത്തിത്തീര്ത്ത്, പ്രായോഗിക തലത്തില് ഒരു ശുപാര്ശ പോലും നടപ്പിലാക്കാതെ ചുവപ്പുനാടകളില് കുരുക്കിയിട്ടിരിക്കുകയാണ്. വോട്ട് ബാങ്ക് രാഷ്ട്രീയത്തിന് മുന്നില് നട്ടെല്ല് പണയം വെക്കുന്ന ഭരണകൂടങ്ങള് ഈ ജനവിഭാഗത്തിന്റെ അവകാശങ്ങളെ ബോധപൂര്വ്വം വിസ്മരിക്കുകയാണ്. ചരിത്രപരമായ ഈ അവഗണനയ്ക്കെതിരെ പ്രവാചകതുല്യമായ ആര്ജ്ജവത്തോടെ ഈ നാട് ചോദിക്കുന്നു: ഭരണകൂടമേ നീ ആരോടൊപ്പം?
- മുതലപ്പൊഴി: അശാസ്ത്രീയതയുടെ മരണക്കയങ്ങള്
ബൈബിളില് നാം വായിക്കുന്നുണ്ട്:
ജെറിക്കോ നഗരത്തിലെ ജനങ്ങള് എലീശാ പ്രവാചകനോട് വന്ന് പറഞ്ഞു: ‘ഈ നഗരത്തിന്റെ സ്ഥിതി നല്ലതാണ്, എന്നാല് ഇവിടത്തെ വെള്ളം ചീത്തയുമാണ്, അത് മരണകാരണവുമാണ്.’ (2 രാജാക്കന്മാര് 2:19). ഭരണാധികാരികള്ക്ക് മുതലപ്പൊഴി വലിയൊരു ഹാര്ബര് വികസനമായിരിക്കാം, എന്നാല് അവിടുത്തെ മത്സ്യത്തൊഴിലാളികള്ക്ക് അത് മരണക്കയമാണ്!
അശാസ്ത്രീയമായ പുലിമുട്ട് നിര്മ്മാണവും, വാഗ്ദാനങ്ങള് ലംഘിച്ചുള്ള അദാനി ഗ്രൂപ്പിന്റെ ഡ്രെഡ്ജിങ് വീഴ്ചകളും കാരണം നൂറിലധികം മത്സ്യത്തൊഴിലാളികളാണ് ഇവിടെ കടലില് പൊലിഞ്ഞത്. വള്ളങ്ങള് തകര്ന്ന് കടക്കെണിയിലാകുന്ന കുടുംബങ്ങളെ തിരിഞ്ഞുനോക്കാത്ത ഭരണകൂടം, വിഴിഞ്ഞത്തെ കപ്പലുകള്ക്ക് വഴിയൊരുക്കാന് പരമ്പരാഗത മത്സ്യത്തൊഴിലാളികളുടെ ജീവന് ബലിനല്കുകയാണോ? ഈ മരണക്കയങ്ങള് ഒഴിവാക്കാന് യുദ്ധകാലാടിസ്ഥാനത്തില് ശാസ്ത്രീയ പുനര്നിര്മ്മാണം നടത്തണം.
ശാസ്ത്രീയ തീരസംരക്ഷണവും
തീരദേശ പുനരധിവാസവും
ചെല്ലാനം മാതൃകയില് കടലാക്രമണം തടയാന് പുലിമുട്ടുകളും ജിയോ-ടെക്സ്റ്റൈല് ഭിത്തികളും നിര്മ്മിക്കണം. ചെല്ലാനം രണ്ടാം ഘട്ടവും, പൊഴിയൂര്, വലിയതുറ, ശംഖുമുഖം, ഓട്ടശ്ശേരി തുടങ്ങിയ അതീവ ദുര്ബല പ്രദേശങ്ങളും സംരക്ഷിക്കാന് ഫണ്ട് അനുവദിക്കണം.
ഗോഡൗണുകളിലെ നരകജീവിതം
കടലാക്രമണത്തില് വീട് നഷ്ടപ്പെട്ട് സ്കൂളുകളിലും അടച്ചുപൂട്ടിയ സിമന്റ് ഗോഡൗണുകളിലും വര്ഷങ്ങളായി നരകയാതന അനുഭവിക്കുന്ന മത്സ്യത്തൊഴിലാളി കുടുംബങ്ങള് ഈ നാടിന്റെ നാണക്കേടാണ്. ഉള്നാടുകളിലെ ഉയര്ന്ന ഭൂമിവിലയ്ക്ക് അനുസൃതമായി പുനരധിവാസ പാക്കേജുകള് പുതുക്കാന് മടിക്കുന്ന സര്ക്കാര്, പാവപ്പെട്ടവന്റെ തല ചായ്ക്കാനുള്ള ഒരിടം പോലും നിഷേധിക്കുകയാണ്.
- വിഴിഞ്ഞം സമരക്കേസുകള്: നീതി ചോദിച്ചവര്ക്ക് ക്രിമിനല് മുദ്ര
തങ്ങളുടെ തീരവും തൊഴിലും സംരക്ഷിക്കാന് തെരുവിലിറങ്ങിയ വൈദികരെയും തീരദേശ യുവാക്കളെയും കള്ളക്കേസുകളില് കുടുക്കി ജയിലിലടച്ച നടപടി ഭരണകൂട ഭീകരതയുടെ ഉത്തമ ഉദാഹരണമാണ്. ഒത്തുതീര്പ്പ് ചര്ച്ചകളില് കേസുകള് പിന്വലിക്കുമെന്ന് ഉറപ്പുനല്കിയ സര്ക്കാര്, ഇന്നും യുവാക്കള്ക്ക് പോലീസ് ക്ലിയറന്സ് സര്ട്ടിഫിക്കറ്റ് നിഷേധിച്ച് അവരുടെ സ്വദേശ-വിദേശ തൊഴില് സ്വപ്നങ്ങള് തല്ലിക്കെടുത്തുകയാണ്. തകര്ന്നടിഞ്ഞ ജറൂസലേമിന്റെ മതില് പണിയാന് ഇറങ്ങിത്തിരിച്ച നെഹെമ്യാവിനെ കള്ളക്കേസുകളില് കുടുക്കാന് നോക്കിയ ശത്രുക്കളെപ്പോലെ, സമരവീര്യത്തെ അടിച്ചമര്ത്താന് നോക്കേണ്ട; ഇത് ഉപജീവനത്തിനായുള്ളതു മാത്രമല്ല അതിജീവനത്തിനായുള്ള ചെറുത്തുനില്പ്പാണ്.
- സംവരണാധികാരങ്ങള്: ഒ.ബി.സി അട്ടിമറിയും ഇ.ഡബ്ല്യു.എസ് വഞ്ചനയും
ജനസംഖ്യാടിസ്ഥാനത്തില് ലത്തീന് കത്തോലിക്കാ വിഭാഗത്തിന് അര്ഹതപ്പെട്ട വിദ്യാഭ്യാസ-തൊഴില് സംവരണ ആനുകൂല്യങ്ങള് ലഭ്യമാക്കുന്നതില് വ്യവസ്ഥാപിതവും ആസൂത്രിതവുമായ അട്ടിമറികളാണ് ഭരണകൂടത്തിന്റെ മൂക്കിനുതാഴെ നടക്കുന്നത്. കമ്മ്യൂണിറ്റി സര്ട്ടിഫിക്കറ്റുകള് നല്കുന്നതിലെ ഉദ്യോഗസ്ഥ ശാഠ്യങ്ങളും ചുവപ്പുനാടകളും പിന്നാക്ക ജനവിഭാഗങ്ങളെ കൂടുതല് പാര്ശ്വവല്ക്കരിക്കാന് മാത്രമേ ഉപകരിക്കൂ എന്ന ചിന്ത പൊതുസമൂഹത്തില് ശക്തമാണ്.
ഒ.ബി.സി സംവരണത്തിലെ അട്ടിമറി:
സംസ്ഥാനത്തെ ഒ.ബി.സി ലിസ്റ്റില് ഉള്പ്പെട്ടിട്ടും ലത്തീന് കത്തോലിക്കാ വിഭാഗത്തിന് അര്ഹമായ പ്രാതിനിധ്യം പൊതുമേഖലാ സ്ഥാപനങ്ങളിലും ഉന്നത വിദ്യാഭ്യാസ രംഗത്തും ലഭിക്കുന്നില്ല. ക്രീമിലെയര് പരിധി നിശ്ചയിക്കുന്നതിലെ അശാസ്ത്രീയതയും, നോണ്-ക്രീമിലെയര് സര്ട്ടിഫിക്കറ്റുകള്ക്കായി വില്ലേജ് ഓഫീസുകള് കയറിയിറങ്ങേണ്ടി വരുന്ന സാധാരണക്കാരുടെ ദുരിതവും ഈ ജനതയെ സംവരണത്തിന് പുറത്താക്കാനുള്ള ബോധപൂര്വ്വമായ ശ്രമങ്ങളുടെ ഭാഗമാണ്. അര്ഹതപ്പെട്ട ഒ.ബി.സി ആനുകൂല്യങ്ങള് പോലും ഉദ്യോഗസ്ഥ മേധാവിത്വത്തിന്റെ ചുവപ്പുനാടകളില് കുരുങ്ങി ഇല്ലാതാവുകയാണ്.
ഇ.ഡബ്ല്യു.എസ് എന്ന ഇരട്ടത്താപ്പ്:
മുന്നാക്കക്കാരിലെ പിന്നാക്കക്കാര്ക്കായി കൊണ്ടുവന്ന ഇ.ഡബ്ല്യു.എസ് സംവരണം നടപ്പിലാക്കിയ രീതിയിലൂടെ ഭരണകൂടം ലത്തീന് കത്തോലിക്കാ സമൂഹത്തോട് കാട്ടിയത് ക്രൂരമായ വഞ്ചനയാണ്. മുന്നാക്ക സംവരണത്തിന് നിശ്ചയിച്ച ഉദാരമായ മാനദണ്ഡങ്ങള് കാണുമ്പോള്, വര്ഷങ്ങളായി ഒ.ബി.സി ലിസ്റ്റില് കിടക്കുന്ന ലത്തീന് കത്തോലിക്കര്ക്ക് നോണ്-ക്രീമിലെയര് സര്ട്ടിഫിക്കറ്റ് ലഭിക്കാന് ഏര്പ്പെടുത്തിയിരിക്കുന്ന കടുപ്പമേറിയ വരുമാന-ഭൂമി പരിധികള് വിവേചനപരമാണ്. യഥാര്ത്ഥ പിന്നാക്കാവസ്ഥ അനുഭവിക്കുന്ന തീരദേശവാസിയെയും കര്ഷകനെയും നിസ്സാര കാരണങ്ങള് പറഞ്ഞ് സംവരണത്തിന് പുറത്തുനിര്ത്തുമ്പോള്, സാമ്പത്തികമായി മുന്നില് നില്ക്കുന്നവര്ക്ക് സംവരണത്തിന്റെ ആനുകൂല്യങ്ങള് ദാനം നല്കുന്ന ഇരട്ടത്താപ്പാണ് ഇവിടെ കാണുന്നത്.
വിദ്യാഭ്യാസ-തൊഴില് മേഖലകളില് ചരിത്രപരമായ പിന്നാക്കാവസ്ഥ നേരിടുന്ന ഒരു ജനവിഭാഗത്തെ വ്യവസ്ഥാപിതമായി തഴയുകയും, മുന്നാക്ക താല്പ്പര്യങ്ങള്ക്ക് മുന്പില് ദാസ്യവേല ചെയ്യുകയും ചെയ്യുന്ന നയങ്ങളിലൂടെ ഭരണകൂടം അതിന്റെ പൊരുള് വ്യക്തമാക്കുകയാണ്. അര്ഹതപ്പെട്ട അവകാശങ്ങള് കവര്ന്നെടുക്കുന്ന ഈ അനീതിയോട് വിട്ടുവീഴ്ചയില്ലാതെ ഈ നാട് വീണ്ടും ചോദിക്കുന്നു: ഭരണകൂടമേ നീ ആരോടൊപ്പം?
- ദലിത് ക്രിസ്ത്യന് ധര്മ്മസങ്കടം:
വിശ്വാസത്തിന്റെ പേരില് ക്രൂശിക്കപ്പെടുന്ന ഇരട്ട വഞ്ചന
കേരളത്തിലെ മാത്രമല്ല ഇന്ത്യയിലെ മുഴുവന് ദലിത് ക്രൈസ്തവര് ഇന്ന് നേരിടുന്നത് സ്വതന്ത്ര ഇന്ത്യയിലെ ഏറ്റവും ക്രൂരമായ സാമൂഹിക-നിയമപരമായ ഇരട്ട വഞ്ചനയാണ്. ഭരണഘടന ഉറപ്പുനല്കുന്ന അവകാശങ്ങള് വിശ്വാസത്തിന്റെ പേരില് നിഷേധിക്കപ്പെടുമ്പോള്, ഈ ജനത അനുഭവിക്കുന്ന ആത്മസംഘര്ഷങ്ങളും വിലാപങ്ങളും ഭരണകൂടങ്ങളുടെ മതേതര നാട്യങ്ങളെ പൂര്ണ്ണമായും തുറന്നുകാട്ടുന്നതാണ്.
ഹിന്ദു, സിഖ്, ബുദ്ധ മതങ്ങളിലെ ദലിത് വിഭാഗങ്ങള്ക്ക് പട്ടികജാതി പദവിയും അതിന്റെ ആനുകൂല്യങ്ങളും ഭരണഘടനാപരമായി ലഭിക്കുമ്പോള്, ക്രൈസ്തവ വിശ്വാസം സ്വീകരിച്ചു എന്ന ഒരൊറ്റ കാരണത്താല് ദലിത് ക്രിസ്ത്യാനികള്ക്ക് ഈ അവകാശം നിഷേധിക്കപ്പെടുന്നു. ഒരേ മാതാപിതാക്കളുടെ മക്കളില് ഒരാള് ക്രിസ്തുമതം സ്വീകരിക്കുകയും മറ്റൊരാള് പഴയ മതത്തില് തുടരുകയും ചെയ്താല്, രണ്ടാമന് ലഭിക്കുന്ന എല്ലാ ആനുകൂല്യങ്ങളും ഒന്നാമന് നഷ്ടപ്പെടുന്നു. മതം മാറിയാലും ദലിതന് നേരിടുന്ന സാമൂഹിക പിന്നാക്കാവസ്ഥയോ ജാതീയമായ അവഗണനകളോ ഇല്ലാതാകുന്നില്ലെന്ന യാഥാര്ത്ഥ്യം ഭരണകൂടം ബോധപൂര്വ്വം മറച്ചുപിടിക്കുകയാണ്. രംഗനാഥ് മിശ്ര കമ്മീഷന് ഉള്പ്പെടെയുള്ള ഔദ്യോഗിക സമിതികള് ദലിത് ക്രൈസ്തവര്ക്ക് പട്ടികജാതി പദവി നല്കണമെന്ന് ശുപാര്ശ ചെയ്തിട്ടും, വോട്ട് ബാങ്ക് തകരുമെന്ന് ഭയന്ന് കേന്ദ്ര-സംസ്ഥാന ഭരണകൂടങ്ങള് ഈ ഫയലുകള് പൂഴ്ത്തിവെച്ചിരിക്കുകയാണ്.
- കോര്പ്പറേറ്റ് കടല് ചൂഷണം:
ആഴക്കടലിലെ കൊള്ളയും ‘ബ്ലൂ ഇക്കോണമി’ ചതിയും
‘ബ്ലൂ ഇക്കോണമി’ അഥവാ നീല സമ്പദ്വ്യവസ്ഥ എന്ന വശ്യമായ പേരിട്ടുവിളിച്ച് ആഴക്കടല് ഖനനത്തിനും കോര്പ്പറേറ്റ് ട്രോളറുകള്ക്കും കടലിന്റെ മണ്ണ് പകുത്തുനല്കാന് കേന്ദ്ര-സംസ്ഥാന ഭരണകൂടങ്ങളുടെ ഒത്താശയോടെ വന് നീക്കങ്ങളാണ് നടക്കുന്നത്. പരമ്പരാഗത മത്സ്യത്തൊഴിലാളികളെ കടലില് നിന്ന് ആട്ടിയോടിക്കുന്ന ഈ ജനവിരുദ്ധ നയങ്ങള് തീരദേശത്തെ കൂട്ടപ്പട്ടിണിയിലേക്കാണ് നയിക്കുന്നത്.
എന്താണ് ഈ’ബ്ലൂ ഇക്കോണമി’?
സമുദ്രവിഭവങ്ങളെ സുസ്ഥിരമായി ഉപയോഗിച്ച് സാമ്പത്തിക വളര്ച്ച നേടുക എന്ന വ്യാഖ്യാനത്തോടെയാണ് ആഗോളതലത്തില് ‘ബ്ലൂ ഇക്കോണമി’ അവതരിപ്പിക്കപ്പെട്ടത്. എന്നാല് പ്രായോഗിക തലത്തില് ഇത് കോര്പ്പറേറ്റുകള്ക്ക് കടല് കൊള്ളയടിക്കാനുള്ള ലൈസന്സായി മാറിയിരിക്കുന്നു. കടലിലെ എണ്ണ-വാതക പര്യവേക്ഷണം, ആഴക്കടല് ഖനനം, വന്കിട ടൂറിസം പദ്ധതികള്, വിദേശ ട്രോളറുകള്ക്ക് പരമാധികാരം നല്കല് എന്നിവയാണ് വികസനത്തിന്റെ പേരില് ഇതിലൂടെ നടപ്പിലാക്കുന്നത്.
പരമ്പരാഗത മത്സ്യത്തൊഴിലാളികളുടെ വേരറുക്കല്:
ഈ നയത്തിന്റെ ഭാഗമായി തീരപ്രദേശങ്ങളെയും കടലിനെയും പ്രത്യേക സാമ്പത്തിക മേഖലകളാക്കി മാറ്റുമ്പോള്, നൂറ്റാണ്ടുകളായി കടലില് പോയി ജീവിക്കുന്ന പരമ്പരാഗത മത്സ്യത്തൊഴിലാളികള്ക്ക് അവിടെ പ്രവേശനം നിഷേധിക്കപ്പെടുന്നു. കടലിന്റെ തീരങ്ങളില് വന്കിട റിസോര്ട്ടുകളും പോര്ട്ടുകളും വരുമ്പോള് മത്സ്യത്തൊഴിലാളികളുടെ വള്ളങ്ങള് അടുപ്പിക്കാനുള്ള ഇടം പോലും ഇല്ലാതാകുന്നു.
ആഴക്കടല് കൊള്ളയും പരിസ്ഥിതി നാശവും:
ഭീമാകാരമായ കോര്പ്പറേറ്റ് കപ്പലുകള് വന്ന് അടിത്തട്ട് ഉഴുതുമറിക്കുന്ന ‘ട്രോളിങ്’ നടത്തുമ്പോള് കടലിന്റെ ആവാസവ്യവസ്ഥയും മത്സ്യസമ്പത്തും പൂര്ണ്ണമായും നശിക്കുന്നു. കോര്പ്പറേറ്റുകള് വന് ലാഭം കൊയ്യുമ്പോള്, പരമ്പരാഗത വള്ളങ്ങളില് പോകുന്ന സാധാരണക്കാരായ മത്സ്യത്തൊഴിലാളികള്ക്ക് ഒരു കൊട്ട മീന് പോലും കിട്ടാതെ ശൂന്യമായ കൈകളോടെ മടങ്ങേണ്ടി വരുന്നു.
കടലമ്മ കനിഞ്ഞുതരുന്ന സമ്പത്ത് സാധാരണക്കാരന്റെ വയറ്റത്തടിച്ച് കോര്പ്പറേറ്റുകള്ക്ക് കവര്ന്നെടുക്കാന് ഭരണകൂടം ചുവപ്പ് പരവതാനി വിരിക്കരുത്. വികസനത്തിന്റെ ഈ നീലച്ചതി തിരിച്ചറിഞ്ഞ്, സ്വന്തം മണ്ണും തൊഴിലും കാക്കാന് ജീവന്മരണ പോരാട്ടം നടത്തുന്ന മനുഷ്യരെ കാണാതെ പോകുന്ന സിംഹാസനങ്ങളോട് ഈ നാട് ഉറക്കെ ചോദിക്കുന്നു: ഭരണകൂടമേ നീ ആരോടൊപ്പം?
- ന്യൂനപക്ഷ അവകാശങ്ങള്ക്കുമേലുള്ള കടന്നുകയറ്റം
ഭരണഘടന ഉറപ്പുനല്കുന്ന ന്യൂനപക്ഷ അവകാശങ്ങള്ക്ക് മേല് കരിനിഴല് വീഴ്ത്തുന്ന രീതിയിലാണ് ചില വകുപ്പുകളുടെ ഇടപെടലുകള്. ന്യൂനപക്ഷ വിദ്യാഭ്യാസ സ്ഥാപനങ്ങളുടെ സ്വയംഭരണാവകാശത്തെ ചോദ്യം ചെയ്യാനും കടിഞ്ഞാണിടാനും നടത്തുന്ന ശ്രമങ്ങള് ജനാധിപത്യ വിരുദ്ധമാണ്.
വിദ്യാഭ്യാസ അവഗണനയും സ്കോളര്ഷിപ്പ് വിവേചനവും
തീരദേശത്തെ വിദ്യാര്ഥികള്ക്ക് ലഭിക്കേണ്ട സ്കോളര്ഷിപ്പുകളും ഉന്നത വിദ്യാഭ്യാസ ഗ്രാന്റുകളും മാസങ്ങളായി കുടിശ്ശികയാണ്. മത്സരപരീക്ഷകള്ക്കായി പിന്നാക്ക മേഖലകളില് സൗജന്യ പരിശീലന കേന്ദ്രങ്ങള് തുടങ്ങാന് മടിക്കുന്ന സര്ക്കാര്, പുതിയ തലമുറയുടെ വഴി അന്ധകാരത്തിലാക്കുകയാണ്. യുഡിഎഫ് മുന്നണിയിലെ മുഖ്യ പാര്ട്ടി ആയ കോണ്ഗ്രസ് തന്നെ വിദ്യാഭ്യാസ വകുപ്പ് ഏറ്റെടുക്കണം എന്ന് പല സമുദായ സംഘടനകളും ഒരു പോലെ ആവശ്യപ്പെടുന്നെങ്കില് അതില് കാര്യമുണ്ട് എന്ന് ഭരണകൂടം മനസിലാക്കി പ്രവര്ത്തിക്കേണ്ടത് അനിവാര്യമാണ്
- ലഹരി മാഫിയയുടെ കടന്നുകയറ്റം: ബോധപൂര്വ്വമായ നിസ്സംഗത?
തീരദേശത്തെ യുവാക്കളെ ലക്ഷ്യമിട്ട് തഴച്ചുവളരുന്ന മയക്കുമരുന്ന് മാഫിയകള്ക്കെതിരെ ശക്തമായ നടപടിയെടുക്കാന് പൊലീസ് പരാജയപ്പെടുകയാണ്. വരുമാനം കൂട്ടാന് മദ്യശാലകള് തുറക്കുന്ന ഭരണകൂടം, നാളെയുടെ വാഗ്ദാനങ്ങളായ ഒരു തലമുറയെ ലഹരിക്ക് അടിമകളാക്കി നശിപ്പിക്കാന് കൂട്ടുനില്ക്കുകയാണ്. അയല്നാടായ തമിഴ്നാട്ടില് ദളപതി വിജയ് സ്കൂള് പരിസരത്തുള്ള ബാറുകള് പൂട്ടാന് ഉത്തരവിട്ടത് ഒരു മാതൃകയാക്കാവുന്നതാണ്. ഇല്ലെങ്കില് പഞ്ചാബിന്റെ ഗതി കേരളത്തിനും വരും
- വന്യമൃഗങ്ങള്ക്ക് കാവല്, മനുഷ്യന് കല്ലറ
കേരളത്തിന്റെ കിഴക്കന് മലയോര മേഖലകളില് (കണ്ണൂര്,വയനാട്, ഇടുക്കി, പാലക്കാട്, പീരുമേട് മൂന്നാര് പത്തനംതിട്ട, പുനലൂര്, നെയ്യാറ്റിന്കര)കര്ഷകന്റെ ഉറക്കം കെടുത്തുന്നത് വന്യമൃഗങ്ങളുടെ വന്യതയാണ്. മനുഷ്യന്റെ ജീവനേക്കാള് വില ഇന്ന് കാട്ടുപന്നികള്ക്കും കാട്ടാനകള്ക്കുമാണ്!
ആവാസവ്യവസ്ഥയുടെ തകര്ച്ചയും ഭരണകൂട നിസ്സംഗതയും:
വനാതിര്ത്തികളില് രാത്രിയും പകലും ഭീതിയോടെ കഴിയുന്ന കര്ഷകരുടെ വിളകള് വന്യമൃഗങ്ങള് ചവിട്ടിമെതിക്കുമ്പോള്, വനംവകുപ്പ് ഉദ്യോഗസ്ഥര് കാഴ്ച്ചക്കാരാവുകയാണ്. വനത്തിനുള്ളിലെ അക്കേഷ്യ, യൂക്കാലിപ്സ് തുടങ്ങിയ ഏകവിള തോട്ടങ്ങളും അധിനിവേശ സസ്യങ്ങളും പ്രകൃതിദത്തമായ പുല്മേടുകളെ ഇല്ലാതാക്കി. വനത്തിനുള്ളില് തീറ്റയും വെള്ളവും കിട്ടാതെ വരുമ്പോഴാണ് ആനകളും കാട്ടുപോത്തുകളും ജനവാസ മേഖലകളിലേക്ക് ഇറങ്ങുന്നത്.
തകരുന്ന കാര്ഷിക സമ്പദ്വ്യവസ്ഥ:
ഏത്തവാഴ, തെങ്ങ്, കപ്പ, ചേന, കാപ്പി, കുരുമുളക് തുടങ്ങിയ നാണ്യവിളകള് കാട്ടുപന്നികളും കുരങ്ങുകളും ആനകളും ഒറ്റരാത്രികൊണ്ട് തുടച്ചുനീക്കുന്നു. പട്ടിണിയിലായ കര്ഷകന് ജീവിക്കാന് വേണ്ടി പ്രതികരിക്കുമ്പോള് വന്യജീവി സംരക്ഷണ നിയമത്തിന്റെ ഇരുമ്പഴിക്കുള്ളിലാക്കുന്ന ഭരണകൂടം, ചോര നീരാക്കി ഈ നാടിന് അന്നം തരുന്ന കര്ഷകനെ ആത്മഹത്യയിലേക്ക് തള്ളിവിടുകയാണ്.
നിയമപരമായ മാറ്റങ്ങളും ഇന്ഷുറന്സും:
കര്ഷക കൂട്ടായ്മകളുടെ ശക്തമായ പ്രതിഷേധങ്ങളെത്തുടര്ന്ന് വന്യജീവി സംരക്ഷണ നിയമങ്ങളില് ഭേദഗതി വരുത്താനും, ജനവാസ മേഖലയിലിറങ്ങുന്ന ജീവികളെ വെടിവെയ്ക്കാനുള്ള അധികാരം തദ്ദേശ സ്ഥാപനങ്ങള്ക്ക് നല്കാനും സമ്മര്ദ്ദമേറുന്നുണ്ട്. കേന്ദ്ര സര്ക്കാരിന്റെ പ്രധാനമന്ത്രി ഫസല് ബീമ യോജന വഴി വന്യമൃഗങ്ങള് മൂലമുണ്ടാകുന്ന കൃഷിനാശത്തിന് ഇന്ഷുറന്സ് പരിരക്ഷ ലഭ്യമാക്കാന് പുതിയ വ്യവസ്ഥകള് വന്നിട്ടുണ്ടെങ്കിലും, നഷ്ടപരിഹാരം യഥാസമയം കര്ഷകന്റെ കൈകളില് എത്തുന്നില്ലെന്നതാണ് യാഥാര്ത്ഥ്യം. ഭൂമിയുടെ വില ഇടിയുന്നതിനും ബാങ്ക് വായ്പകള് തിരിച്ചടയ്ക്കാന് കഴിയാതെ കര്ഷകര് വലയുന്നതിനും ഭരണകൂടത്തിന്റെ ഈ മെല്ലെപ്പോക്ക് നയം കാരണമാകുന്നു.
പിന്മൊഴി
പാവപ്പെട്ടവരെ ചവിട്ടിമെതിക്കുകയും നീതി നിഷേധിക്കുകയും ചെയ്യുന്ന ഭരണാധികാരികളോട് ആമോസ് പ്രവാചകന് ഗര്ജ്ജിച്ചതുപോലെ ഈ നാടും വിളിച്ചുപറയുന്നു: ‘നീതി വെള്ളംപോലെയും ധര്മ്മം വറ്റാത്ത അരുവിപോലെയും ഒഴുകട്ടെ.’ (ആമോസ് 5:24).
കടലിന്റെ ആഴങ്ങളില് കണ്ണീരൊഴുക്കുന്നവനും,
മലയുടെ മുകളില് ചോരയൊഴുക്കുന്നവനും,
ഈ നാടിന്റെ നെടുംതൂണുകളാണ്…
അലറുന്ന കടലില് വള്ളം മറിയുമ്പോള് മുങ്ങുന്നത് കോര്പ്പറേറ്റുകളുടെ ലാഭമല്ല, ഈ നാടിന്റെ ചോറ്റുകലമാണ്. മലമടക്കുകളില് ആന ചവിട്ടിമെതിക്കുന്നത് തോട്ടങ്ങളെയല്ല, ഒരു കര്ഷകന്റെ ആയുസ്സിന്റെ പ്രതീക്ഷകളെയാണ്. ജനങ്ങളുടെ നെഞ്ചിലെ തീ അണയ്ക്കാന് കഴിഞ്ഞില്ലെങ്കില്, അധികാരത്തിന്റെ തണലിലിരുന്ന് നിങ്ങള് പണിയുന്ന വികസന ഗോപുരങ്ങള് ഈ ജനതയുടെ പ്രതിഷേധക്കടലില് ഒലിച്ചുപോകും. ഭരണകൂടമേ, നീ ജനപക്ഷത്ത് നില്ക്കുക; ഇല്ലെങ്കില് ചരിത്രം നിങ്ങളെ രേഖപ്പെടുത്തുക സ്വന്തം മക്കളെ തെരുവിലേക്ക് തള്ളിവിട്ട നിസ്സംഗതയുടെ പ്രതീകങ്ങളായിട്ടായിരിക്കും!
