ബിജോ സില്വേരി
ക്രൂരമായ അടിച്ചമര്ത്തലുകളെയും രക്തസാക്ഷിത്വങ്ങളെയും അതിജീവിച്ചാണ് സഭയും സത്യത്തിന്റെ ശബ്ദവും വളര്ന്നു വന്നത്. റോമന് ചക്രവര്ത്തിമാര്ക്കും ഫാസിസ്റ്റ് ഭരണകൂടങ്ങള്ക്കും മുന്നില് പതറാതെ നിന്ന വിശ്വാസദാര്ഢ്യത്തിന്റെ പിന്തലമുറക്കാര്ക്ക് നേരെ ഇന്ന് ലോകശക്തികളുടെ തലവന് ആക്രോശിക്കുമ്പോള് ചരിത്രം ആവര്ത്തിക്കുകയാണ്. ഭൂമിയില് പതിക്കുന്ന ബോംബുകള്ക്ക് തകര്ക്കാന് കഴിയാത്ത ഒന്നുണ്ട്, അത് മനുഷ്യന്റെ സ്വതന്ത്രമായ ചിന്തയും നീതിക്കുവേണ്ടിയുള്ള ദാഹവുമാണ്. തെളിവുകളേക്കാള് മുമ്പേ ആയുധങ്ങള് സംസാരിക്കുന്ന ഈ കാലഘട്ടത്തില്, ഇന്ത്യ ഉള്പ്പെടെയുള്ള രാജ്യങ്ങള് നേരിടാന് പോകുന്ന പ്രതിസന്ധികള് നാം തിരിച്ചറിയേണ്ടതുണ്ട്.
ലോകചരിത്രത്തിലേക്ക് തിരിഞ്ഞുനോക്കുമ്പോള്, രാഷ്ട്രീയ അധികാരവും ആത്മീയ സത്യവും തമ്മിലുള്ള സംഘര്ഷം പലവട്ടം ആവര്ത്തിക്കപ്പെട്ടിട്ടുണ്ട്. അധികാരം കൈവശമുള്ളവര് പലപ്പോഴും തങ്ങളെ സര്വ്വശക്തരായി കാണുകയും, അവരുടെ തീരുമാനങ്ങള് ലോകത്തിന്റെ വിധി നിര്ണ്ണയിക്കുമെന്ന് കരുതുകയും ചെയ്യുന്നു. എന്നാല്, ആത്മീയ നേതാക്കള്, പ്രത്യേകിച്ച് ക്രൈസ്തവ സഭയുടെ പാരമ്പര്യത്തില് നില്ക്കുന്നവര് മനുഷ്യരാശിയുടെ നന്മക്കും നീതിക്കും വേണ്ടി ശബ്ദമുയര്ത്തുന്നവരാണ്. ഈ സാഹചര്യത്തിലാണ് അമേരിക്കന് പ്രസിഡന്റ് ഡോണള്ഡ് ട്രംപിനെ പോലുള്ള രാഷ്ട്രീയ നേതാക്കളുടെ പ്രതികരണങ്ങളും, പാപ്പായുടെ നിലപാടുകളും വിശകലനം ചെയ്യപ്പെടേണ്ടത്.
കത്തോലിക്ക സഭയുടെ ചരിത്രം രക്തസാക്ഷികളുടെ വിശ്വാസത്തില് നിന്നാണ് ഉയര്ന്നുവന്നത്. ആദ്യകാല ക്രൈസ്തവര് റോമന് സാമ്രാജ്യത്തിന്റെ ക്രൂരത നേരിട്ടപ്പോഴും, അവര് അവരുടെ വിശ്വാസം ഉപേക്ഷിച്ചില്ല. സഭയുടെ വളര്ച്ച അധികാരത്തിന്റെ സംരക്ഷണത്തിലല്ല, മറിച്ച് സത്യത്തില് ഉറച്ചുനിന്ന ധൈര്യത്തിലാണ്. അതുകൊണ്ടുതന്നെ, ഇന്ന് സഭക്കെതിരെ ഉയരുന്ന ഏതൊരു വിമര്ശനത്തിനും അതിന്റെ അടിത്തറയെ കുലുക്കാന് കഴിയില്ല.
ബൈബിള് പറയുന്നു: ”നീതിക്കുവേണ്ടി പീഡിപ്പിക്കപ്പെടുന്നവര് ഭാഗ്യവാന്മാര്; സ്വര്ഗ്ഗരാജ്യം അവരുടെതാണ്.” (മത്തായി 5:10) ചരിത്രത്തില് നിരവധി രാഷ്ട്രത്തലവന്മാര് പാപ്പാമാര്ക്കെതിരേ പ്രതികരിക്കുകയും അവരെ കായികമായി നേരിടാന് ശ്രമിക്കുകയും ചെയ്തിട്ടുണ്ട്. പക്ഷേ സഭ അതിന്റെ ദൗത്യത്തില് ഒരിക്കലും പിന്നോട്ടുപോയിട്ടില്ല. ഉദാഹരണത്തിന്, മധ്യകാലഘട്ടത്തില് രാഷ്ട്രീയ അധികാരികളും പാപ്പാമാരും തമ്മില് ഉണ്ടായ സംഘര്ഷങ്ങള് പ്രസിദ്ധമാണ്. എന്നാല്, എല്ലാ വെല്ലുവിളികളേയും അതിജീവിച്ച് സഭ മുന്നോട്ട് പോയത് സത്യത്തില് ഉറച്ചുനിന്നതുകൊണ്ടാണ്. യേശുക്രിസ്തുവിന്റെ വാക്കുകള് ഇന്നും അതേ ശക്തിയോടെ മുഴങ്ങുന്നു: ”നിങ്ങള് സത്യത്തെ അറിഞ്ഞാല്, സത്യം നിങ്ങളെ സ്വതന്ത്രരാക്കും.” (യോഹന്നാന് 8:32).
പാപ്പാ ഉന്നയിച്ച വിമര്ശനം, ‘ശക്തരാഷ്ട്രങ്ങളുടെ യുദ്ധനയങ്ങള്’ മനുഷ്യരാശിക്ക് ഭീഷണിയാണെന്നത് ഒരു രാഷ്ട്രീയ പ്രസ്താവന മാത്രമല്ല; അത് ഒരു നൈതിക ആഹ്വാനമാണ്. അമേരിക്കയും ഇസ്രായേലും പോലുള്ള രാജ്യങ്ങള് തങ്ങളുടെ ശക്തിയില് അമിതവിശ്വാസം വെക്കുമ്പോള്, അത് ലോകശാന്തിക്ക് അപകടകരമായ സാഹചര്യം സൃഷ്ടിക്കുന്നു. ”സര്വ്വശക്തരാണെന്ന മിഥ്യാബോധം” എന്ന പാപ്പായുടെ പരാമര്ശം മനുഷ്യചരിത്രത്തിലെ നിരവധി ദുരന്തങ്ങളെ ഓര്മ്മിപ്പിക്കുന്നു.
അനവധി സാമ്രാജ്യങ്ങളും രാജ്യങ്ങളും ജനപഥങ്ങളും അവരുടെ നേതാക്കളുടെ അഹങ്കാരത്താല് തകര്ന്നുവീണിട്ടുണ്ട്.
ഒരു രാഷ്ട്രത്തലവന്റെ വാക്കുകള് ലോകത്തിന്റെ ശ്രദ്ധ നേടുന്നു. അതിനാല്, അവയില് ഉത്തരവാദിത്തവും വിനയവും അനിവാര്യമാണ്. ആത്മീയ നേതാക്കളെ അപമാനിക്കുന്നത്, അല്ലെങ്കില് അവരുടെ സന്ദേശത്തെ തെറ്റായി അവതരിപ്പിക്കുന്നത്, ലോകത്തിന് തെറ്റായ മാതൃക നല്കുന്നു. യേശുക്രിസ്തു നമ്മെ പഠിപ്പിച്ചത് അധികാരം ഉപയോഗിച്ച് ഭരിക്കാന് അല്ല, സ്നേഹത്തിലും വിനയത്തിലും നയിക്കാന് തന്നെയാണ്:(”നിങ്ങളില് ഏറ്റവും വലിയവന്, നിങ്ങളുടെ ശുശ്രൂഷകനായിരിക്കട്ടെ.” (മത്തായി 23:11))
ഇന്നത്തെ ലോകത്തില് യുദ്ധവും സംഘര്ഷവും വര്ദ്ധിച്ചുവരുന്ന സാഹചര്യത്തില്, പാപ്പായുടെ ശബ്ദം ഒരു സമാധാനത്തിന്റെ വിളിയാകുന്നു. അത് രാഷ്ട്രീയമായ ഒരു പക്ഷപാതമല്ല; മറിച്ച് മനുഷ്യരാശിയുടെ സംരക്ഷണത്തിനായുള്ള ഒരു ആത്മീയ ഉത്തരവാദിത്തമാണ്. ക്രൈസ്തവ വിശ്വാസം നമ്മെ പഠിപ്പിക്കുന്നത് ശത്രുക്കളെ പോലും സ്നേഹിക്കാനാണ്: സഭയുടെ ചരിത്രം നമ്മെ ഒരു മഹത്തായ സത്യത്തിലേക്ക് നയിക്കുന്നു: രാജ്യങ്ങളും ഭരണാധികാരികളും താല്ക്കാലികമാണ്, എന്നാല് വിശ്വാസം ശാശ്വതമാണ്.
രാജാക്കന്മാരും സാമ്രാജ്യങ്ങളും ഉയരുകയും തകര്ന്നുവീഴുകയും ചെയ്തെങ്കിലും ക്രിസ്തുവിന്റെ സുവിശേഷം ഇന്നും ലോകമെമ്പാടും പ്രസരിപ്പിക്കപ്പെടുന്നു. അത് മനുഷ്യശക്തിയാല് അല്ല, ദൈവകൃപയാല് തന്നെയാണെന്ന് സമകാലീന സംഭവങ്ങള് നമ്മെ വീണ്ടും ഓര്മ്മിപ്പിക്കുന്നു. ശക്തമായ അധികാരങ്ങളുടെ ശബ്ദം സത്യത്തെ ചിലപ്പോള് വെല്ലുവിളിക്കും. എന്നാല്, അവസാന വിജയം സത്യത്തിനാണ്. അവസാനമായി, ക്രൈസ്തവരുടെ കടമ വ്യക്തമാണ്: രാഷ്ട്രീയ നിലപാടുകളെ മറികടന്ന്, സത്യത്തിനും നീതിക്കും സമാധാനത്തിനും വേണ്ടി നിലകൊള്ളുക. ഇതാണ് സഭയുടെ ആത്മാവ്. കാലങ്ങളിലൂടെ നിലനില്ക്കുന്ന സത്യത്തിന്റെ ശബ്ദം; അധികാരങ്ങളെ പോലും ചോദ്യം ചെയ്യാന് ധൈര്യമുള്ള ശബ്ദം.
ഇറാന് യുദ്ധം: ഗര്വ്വിന്റെ രാഷ്ട്രീയവും
തകരുന്ന ലോകക്രമവും
ലോകം മറ്റൊരു വന്യുദ്ധത്തിന്റെ വക്കില് നില്ക്കുമ്പോള്, സമാധാനകാംക്ഷികളായ ജനതയെ ഒന്നടങ്കം ആശങ്കയിലാഴ്ത്തുന്ന സംഭവവികാസങ്ങളാണ് മധ്യപൂര്വദേശത്ത് നടക്കുന്നത്. ഇറാനെ ലക്ഷ്യമിട്ട് അമേരിക്കയും ഇസ്രായേലും നടത്തുന്ന നീക്കങ്ങള് അന്താരാഷ്ട്ര നിയമങ്ങളുടെ ലംഘനമാണെന്ന ആരോപണം ശക്തമായിക്കഴിഞ്ഞു. ഇറാനെതിരായ നീക്കങ്ങളില് അമേരിക്കയും ഇസ്രായേലും സ്വീകരിക്കുന്ന ശൈലി ഏറെ വിമര്ശിക്കപ്പെടുന്നുണ്ട്. ഒരു രാജ്യത്തിന്റെ പരമാധികാരത്തെ മാനിക്കാതെ, വ്യക്തമായ തെളിവുകള് നിരത്തുന്നതിന് മുന്പേ സൈനിക നടപടികളിലേക്ക് നീങ്ങുന്നത് അപകടകരമായ പ്രവണതയാണ്.
ഐക്യരാഷ്ട്രസഭയുടെ ചട്ടങ്ങള് കാറ്റില്പ്പറത്തിക്കൊണ്ടാണ് ഇറാനെതിരായ സൈനിക നീക്കങ്ങള് ആസൂത്രണം ചെയ്യുന്നത്. ആയുധങ്ങള് കൊണ്ടോ ബോംബുകള് കൊണ്ടോ പരിഹരിക്കാവുന്നതല്ല മധ്യപൂര്വദേശത്തെ സങ്കീര്ണ്ണമായ പ്രശ്നങ്ങള്. യുദ്ധം നാശവും ദാരിദ്ര്യവും മാത്രമേ സമ്മാനിക്കൂ.
നമ്മുടേതല്ലാത്ത യുദ്ധം
നമ്മെ തൊടുന്ന പ്രത്യാഘാതങ്ങള്
നമ്മുടേതല്ലാത്ത ഒരു യുദ്ധം… എന്നാല് അതിന്റെ ആഘാതങ്ങള് നമ്മുടെ ജീവിതത്തിന്റെ സൂക്ഷ്മതകളിലേക്കും കടന്നുവരുന്നുണ്ട്. അമേരിക്ക, ഇസ്രായേല്, ഇറാന് എന്നീ രാജ്യങ്ങള് തമ്മിലുള്ള സംഘര്ഷങ്ങള് ദൂരെയൊക്കെ നടക്കുന്ന രാഷ്ട്രീയ സംഭവങ്ങളായി മാത്രം നാം കരുതിയിരുന്നു. എന്നാല് ഇന്നത്തെ ആഗോളവത്കൃത ലോകത്തില് ഒരു പ്രദേശത്തെ സംഘര്ഷം മറ്റൊരു ഭൂഖണ്ഡത്തിലെ ജീവിതത്തെ എങ്ങനെ ബാധിക്കുന്നു എന്നതിന്റെ സജീവ ഉദാഹരണമായി ഈ യുദ്ധസാഹചര്യം മാറിക്കൊണ്ടിരിക്കുകയാണ്.
കേരളത്തിന്റെ സമ്പദ്വ്യവസ്ഥയെക്കുറിച്ച് സംസാരിക്കുമ്പോള് ഗള്ഫ് രാജ്യങ്ങളുടെ സ്വാധീനം അനിവാര്യമായി പരിഗണിക്കേണ്ടതാണ്. ഗള്ഫ് കോര്പറേഷന് കൗണ്സില് (ജിസിസി) രാജ്യങ്ങളില് തൊഴില് ചെയ്യുന്ന ലക്ഷക്കണക്കിന് മലയാളികള് അയക്കുന്ന വിദേശനാണ്യമാണ് കേരളത്തിന്റെ ഉപഭോഗാധിഷ്ഠിത സമ്പദ്വ്യവസ്ഥയ്ക്ക് ജീവന് പകരുന്നത്. വീടുകള്, വിദ്യാഭ്യാസം, ആരോഗ്യം, ചെറിയ വ്യാപാരങ്ങള് എല്ലാം ഈ പണത്തിന്റെ ചുറ്റും തന്നെ വളര്ന്നവയാണ്.
യുദ്ധം ശക്തമാകുകയും നീണ്ടുനില്ക്കുകയും ചെയ്താല്, ഗള്ഫ് മേഖലയിലെ സാമ്പത്തിക സ്ഥിരത തന്നെ ബാധിക്കപ്പെടാം. എണ്ണവില ഉയരുന്നത് ആദ്യഘട്ടത്തില് ഗള്ഫ് രാജ്യങ്ങള്ക്ക് നേട്ടമെന്നു തോന്നാമെങ്കിലും, ദീര്ഘകാലത്ത് വ്യവസായങ്ങളും അടിസ്ഥാന സൗകര്യങ്ങളും ബാധിക്കപ്പെടുമ്പോള് തൊഴില് അവസരങ്ങള് ചുരുങ്ങാനുള്ള സാധ്യത ഉണ്ട്. അതോടെ പ്രവാസികളുടെ വരുമാനവും, നാട്ടിലേക്ക് എത്തുന്ന പണവും കുറയാം.
ക്രൂഡ് ഓയില് വിപണിയിലെ അനിശ്ചിതത്വം ഇന്ത്യയെ നേരിട്ട് ബാധിക്കുന്ന ഘടകമാണ്. ഇന്ത്യ ഊര്ജ്ജ ആവശ്യങ്ങളുടെ ഭൂരിഭാഗവും ഇറക്കുമതി ചെയ്യുന്ന രാജ്യമാണ്. യുദ്ധം മൂലം എണ്ണവില ഉയര്ന്നാല്, ഇന്ധനവിലയും ഗതാഗതച്ചെലവും ഉയരും. അതിന്റെ ഭാരം സാധാരണ ജനങ്ങളുടെ ചുമലിലേക്കാണ് മാറുന്നത്.
കേരളം പോലുള്ള ഉപഭോഗസംസ്ഥാനങ്ങളില് വിലക്കയറ്റം കൂടുതല് കഠിനമായി അനുഭവപ്പെടും. ഭക്ഷ്യവസ്തുക്കള് മുതല് നിര്മ്മാണ സാമഗ്രികള് വരെ എല്ലാത്തിന്റെയും വില ഉയരാന് സാധ്യതയുണ്ട്. ഗള്ഫ് രാജ്യങ്ങളിലെ രാഷ്ട്രീയ-സാമ്പത്തിക സാഹചര്യങ്ങള് അസ്ഥിരമായാല്, അവിടെ ജോലി ചെയ്യുന്ന മലയാളികള്ക്ക് തൊഴില് നഷ്ടമോ ശമ്പളക്കുറവോ അനുഭവിക്കേണ്ടി വരാം. ചിലപ്പോള് നിര്ബന്ധിത മടങ്ങിവരവും സംഭവിക്കാം. ഇത് കേരളത്തിലെ തൊഴില്രംഗത്തും സാമൂഹിക ഘടനയിലും സമ്മര്ദ്ദം സൃഷ്ടിക്കും.
പ്രവാസി വരുമാനം കുറഞ്ഞാല്, ബാങ്കിംഗ് മേഖലയിലും റിയല് എസ്റ്റേറ്റ് മേഖലയിലും പ്രതിസന്ധി വളരും. വീടുകളുടെ നിര്മാണം, ഭൂമിവില, ഉപഭോഗച്ചെലവ് എല്ലാം ചുരുങ്ങുന്ന ഒരു പ്രവണതയിലേക്ക് മാറാം. യുദ്ധം ഒന്നിനും പരിഹാരമല്ല. തെളിവുകളുടെയും ന്യായങ്ങളുടെയും അടിസ്ഥാനത്തിലല്ലാതെ ഏകപക്ഷീയമായി നടത്തുന്ന ആക്രമണങ്ങള് ലോകക്രമത്തെ തകര്ക്കും. സമാധാനത്തിന്റെ പാതയിലേക്ക് ലോകശക്തികള് മടങ്ങിവരണമെന്നും, സാമ്പത്തികവും മാനുഷികവുമായ തകര്ച്ച ഒഴിവാക്കാന് നയതന്ത്ര ചര്ച്ചകള്ക്ക് മുന്ഗണന നല്കണമെന്നുമാണ് ലോകം മുഴുവനും ഇപ്പോള് ആഗ്രഹിക്കുന്നത്.
