Author: admin

കൊച്ചി : തീരനാടിന്റെ പരമ്പരാഗത കലാരൂപമായ ചവിട്ടുനാടത്തിന്റെ പ്രചാരണത്തിനും സംരക്ഷണത്തിനുമായി വർഷംതോറും നടത്തിവരുന്ന ചുവടി ഫെസ്റ്റ് ചവിട്ടുനാടക മഹോത്സവം ഗോതുരുത്ത് ചിന്നത്തമ്പി അണ്ണാവി സക്വയറിൽ 26 മുതൽ 30 വരെ നടക്കും. എല്ലാദിവസവും വൈകിട്ട് 7 മണി മുതലാണ് പരമ്പരാഗത ശൈലിയിലുള്ള തട്ടിലാണു ചവിട്ടുനാടകങ്ങൾ അവതരിപ്പിക്കുന്നത്. 26ന് പള്ളിപ്പുറം സെന്റ് റോക്കീസ് നൃത്തകലാഭവൻ അവതരിപ്പിക്കുന്ന ‘നെപ്പോളിയൻ ബോണപാർട്’ (ആശാൻ– അലക്സ് താളൂപ്പാടത്ത്)27ന് കേരള ചവിട്ടുനാടക അക്കാദമി ഗോതുരുത്ത് അവതരിപ്പിക്കുന്ന ‘ശ്രീധർമ്മശാസ്താവ്’ ( ആശാൻ– ജോസഫ് സലിം) 28ന് കൃപാസനം ആലപ്പുഴ അവതരിപ്പിക്കുന്ന ‘കൊട്ടാര രഹസ്യം’ ( ആശാന്മാർ– ജോസി കൃപാസനം, സുരേഷ് കണ്ണമാലി)​29ന് രാമചന്ദ്രൻ കേളി സംവിധാനം ചെയ്ത ചവിട്ടുനാടക ഡോക്യുമെന്ററി സിനിമ-‘തിരൈകൂത്ത്’ പ്രദർശനം .തുടർന്ന് യുവജന ചവിട്ടുനാടക സമിതി ഗോതുരുത്ത് അവതരിപ്പിക്കുന്ന ‘കാറൽസ്‌മാൻ’ (ആശാൻ–തമ്പി പയ്യപ്പിള്ളി) 30ന് യുവകേരള കലാസമിതി കുറുമ്പത്തുരുത്ത് അവതരിപ്പിക്കുന്ന ‘വില്യം ഷേക്സ്പിയറിന്റെ മാക്ബത്ത്’ (ആശാൻ– റോയ് ജോർജ്ജ്‌കുട്ടി)

കൊച്ചി : മനസുകളെ വിഭജിക്കുന്നതിലല്ല, ഏവരെയും ചേർത്തു നിർത്തുന്നതിലാണു ക്രിസ്മസിന്‍റെ കാതലെന്നു കെസിബിസി പ്രസിഡന്‍റ് കർദിനാൾ  ബസേലിയോസ്  ക്ലീമിസ് കാതോലിക്കാബാവ . കേരള കത്തോലിക്കാസഭയുടെ ആസ്ഥാനമായ പാലാരിവട്ടം പിഒസിയിൽ‌ ക്രിസ്മസ് സംഗമം  ഉദ്ഘാടനം ചെയ്യുകയായിരുന്നു അദ്ദേഹം. സ്നേഹത്തെക്കുറിച്ചും ഒരുമയെക്കുറിച്ചും ലോകത്തോട് അഭിമാനത്തോടെ വിളിച്ചുപറയാൻ അവകാശമുള്ളവരാണു  ഭാരതീയർ. ദൈവത്തിന്‍റെ പേരിൽ മനസുകളെ മുറിക്കുന്നതു ദൈവികപദ്ധതികൾക്കു വിരുദ്ധമാണെന്നും ക്ലിമ്മിസ് ബാവ പറഞ്ഞു. മന്ത്രി പി. രാജീവ്, കെസിബിസി ഡപ്യൂട്ടി സെക്രട്ടറി ഫാ. ജേക്കബ് ജി. പാലയ്ക്കാപ്പിള്ളി, ബിഷപ്പുമാർ , സ്വാമി ശിവസ്വരൂപാനന്ദ, ബിജെപി സംസ്ഥാന പ്രസിഡന്‍റ് കെ. സുരേന്ദ്രൻ, ഹൈബി ഈഡൻ എംപി, ടി.ജെ. വിനോദ് എംഎൽഎ, കൊച്ചി മേയർ എം.അനിൽകുമാർ, തുടങ്ങി മത, സാമൂഹ്യ, രാഷ്ട്രീയ മേഖലകളിലെ പ്രമുഖർ പങ്കെടുത്തു.

കൊച്ചി : കേരളാ ബ്ലാസ്റ്റേഴ്‌സ് ഇന്ന് രാത്രി 7.30ന് കൊച്ചി ജവഹർലാൽ നെഹ്റു സ്റ്റേഡിയത്തിൽ കൊൽക്കത്തൻ ക്ലബ് മുഹമ്മദൻ എസ് സിയെ നേരിടും. ടീമിന്റെ ദയനീയ പ്രകടനത്തെ തുടർന്ന് പരിശീലകൻ മൈക്കൽ സ്റ്റാറെയെയും സഹപരിശീലകരെയും പുറത്താക്കിയതിന് ശേഷമുള്ള ആദ്യ മത്സരമാണ് ഇന്നത്തേത് .ഇതുവരെ മൂന്ന് മത്സരങ്ങളിൽ മാത്രമാണ് ബ്ലാസ്റ്റേഴ്‌സ് ജയിച്ചത്. ഇതിലൊന്ന് മുഹമ്മദൻസിനെതിരെ അവരുടെ തട്ടകത്തിലായിരുന്നു. നിലവിൽ അവസാന സ്ഥാനത്താണ് കൊൽക്കത്തൻ ടീം. ബ്ലാസ്റ്റേഴ്‌സാകട്ടെ 11 പോയിന്റുമായി 11ാം സ്ഥാനത്തും. അവസാന നാല് കളികളിലും ടീം തോറ്റു.പല കാരണങ്ങളാൽ ഇന്നത്തെ മത്സരം പ്രധാനപ്പെട്ടതാണെന്ന് ടീം നായകൻ അഡ്രിയാൻ ലൂണ പറയുന്നു. ഒരാഴ്ചയായി ടീം കഠിന പരിശീലനത്തിലായിരുന്നു. ആരാധകരുടെ വികാരം മനസ്സിലാക്കുന്നുവെന്ന് പറയുന്ന ലൂണ, എല്ലാ മത്സരങ്ങളിലും ടീം പരമാവധി നൽകുന്നുണ്ടെന്നും എല്ലായ്‌പ്പോഴും ഫലം ഒന്നാകില്ലെന്നും മറുപടി നൽകി.

ചണ്ഡീഗഡ്: പഞ്ചാബിലെ മൊഹാലി ജില്ലയിൽ ആറ് നില കെട്ടിടം തകർന്നു വീണ് ഒരാൾ മരിച്ചു. കെട്ടിട അവശിഷ്ടങ്ങൾക്കിടയിൽ നിരവധി പേർ കുടുങ്ങി കിടക്കുന്നതായും അധികൃതർ അറിയിച്ചു. ഹിമാചൽ പ്രദേശ് സ്വദേശിയായ യുവതിയാണ് അപകടത്തിൽ മരിച്ചത്. ഇവരെ ആശുപത്രിയിൽ എത്തിക്കാൻ ശ്രമിച്ചുവെങ്കിലും മരിക്കുകയായിരുന്നു. ശനിയാഴ്ച വൈകുന്നേരമാണ് അപകടമുണ്ടായത്. കെട്ടിട അവശിഷ്ടങ്ങൾക്കിടയിൽ എത്ര പേരാണ് കുടുങ്ങി കിടക്കുന്നതെന്ന് വ്യക്തമല്ല. രക്ഷാപ്രവർത്തനം പുരോഗമിക്കുകയാണെന്നും അ​ധികൃതർ അറിയിച്ചു.

തിരുവനന്തപുരം: മുണ്ടക്കൈ-ചൂരൽമല ദുരന്തബാധിതരുടെ പുനരധിവാസം ചർച്ച ചെയ്യാൻ ഇന്ന് പ്രത്യേക മന്ത്രിസഭാ യോഗം ചേരും. വൈകിട്ട് മൂന്ന് മണിക്ക് ഓൺലൈനായിട്ടാണ് പ്രത്യേക മന്ത്രിസഭാ യോഗം ചേരുന്നത്. നിലവിൽ പുനരധിവാസത്തിനായി സർക്കാർ ഏറ്റെടുത്ത സ്ഥലത്തിൻ്റെ ഉടമകൾ കോടതിയെ സമീപിച്ചിരിക്കുന്ന പശ്ചാത്തലത്തിൽ ഇത് സംബന്ധിച്ച വിവരങ്ങളും പ്രത്യേക മന്ത്രിസഭായോഗത്തിൽ പ്രധാന അജണ്ടയാകും. പുനരധിവാസത്തിന് ഗുണഭോക്താക്കളെ നിശ്ചയിച്ചതുമായി ബന്ധപ്പെട്ട നടപടിക്രമങ്ങളും പ്രത്യേക മന്ത്രിസഭായോഗം ചർച്ച ചെയ്യും.

മുനമ്പം. റവന്യൂ അവകാശങ്ങൾ പുനസ്ഥാപിച്ചു കിട്ടുന്നതിനായി മുനമ്പം ജനത നടത്തുന്ന റിലേ നിരാഹാരം എഴുപത്തിഒന്നാം ദിനത്തിലേക്ക് . എഴുപതാം ദിന നിരാഹാര സമരത്തിൻ്റെ ഉദ്ഘാടനം ഫാ ആന്റണി തോമസ് പോളക്കാട്ട് നിർവ്വഹിച്ചു. എഴുപത് ദിനങ്ങൾ എന്നത് ഒരു വലിയ നാഴികക്കല്ലാണെന്ന് ഉദ്ഘാടന പ്രസംഗത്തിൽ ഫാ ആൻ്റണി പ്രസ്താവിച്ചു. ഇനിയുള്ള ദിവസങ്ങളും പോരാട്ടത്തിന്റെ ദിനങ്ങൾ ആണെന്നും നീതിക്ക്‌ വേണ്ടിയുള്ള ഈ സമരത്തിൽ വിജയം മുനമ്പം ജനതയുടേത് ആയിരിക്കുമെന്നും പറഞ്ഞു. എഴുപതം ദിനത്തിൽ നിരാഹാരമിരുന്നത് കുഞ്ഞുമോൻ ആന്റണി, റോക്കി വലിയ വീട്ടിൽ, ഉഷ ജോസി മഞ്ഞളി, ഫ്രാൻസിസ് മനക്കിൽ എന്നിവർ ആയിരുന്നു.

കൊല്ലം: പുനലൂർ സെന്റ്. അലോഷ്യസ് കാത്തലിക് സെമിനാരിയിലെ “ക്രിസ്തുമസ് സന്‌ധ്യ ” പുനലൂർ രൂപതാ ബിഷപ്പ് സെൽവിസ്റ്റർ പൊന്നുമുത്തൻ ഉത്ഘാടനം ചെയ്തു. കൊട്ടാരക്കര സെന്റ്. ഗ്രീഗോറിയോസ് ഹയർ സെക്കണ്ടറി ഗണിത വിഭാഗം അദ്ധ്യാപിക സൂസൻ കോശി വരിഞ്ഞവിള ക്രിസ്തുമസ് സന്ദേശം നൽകി. വത്തിക്കാനിൽ നടന്ന ലോക മത പാർലമെന്റിൽ പ്രത്യേക ക്ഷണിതാവായി പങ്കെടുത്ത ഫാ. കോശി ജോർജ് വരിഞ്ഞവിള, പരിശുദ്ധ ഫ്രാൻസിസ് മാർപ്പാപ്പയുമായി നടത്തിയ കൂടിക്കാഴ്ചാ വിവരണം നൽകി. ബഹു. വൈദികരും, സെമിനാരി വിദ്യാർത്ഥികളും ക്രിസ്തുമസ്സ് സന്ധ്യയിൽ പങ്കെടുത്തു.

താമരക്കുളം: ചാരുംമ്മുട് സെൻറ് ജോസഫ്‌സ് ഐ ടി ഐ യിലെ ക്രിസ്തുമസ് ആഘോഷം താമരക്കുളം ഗ്രാമപഞ്ചായത്ത്‌ വികസന കാര്യ ചെയർമാൻ പി. ബി ഹരികുമാർ ഉദ്ഘടനo ചെയ്തു. പ്രിൻസിപ്പാൾ ഫാ. വിൻസെന്റ് എസ് അധ്യക്ഷത വഹിച്ചു. ഫാ. ഷിജി കോശി ക്രിസ്തുമസ് സന്ദേശം നൽകി. വൈസ് പ്രിൻസിപ്പൽ വിജയചന്ദ്രൻ ഉണ്ണിത്താൻ, ഗ്രൂപ്പ്‌ ഇൻസ്റ്റക്ടർ സുമ രാജേന്ദ്രൻ, ജർമ്മൻ ലാംഗ്വേജ് ട്യൂട്ടർ ആരതി അനിൽ എന്നിവർ സംസാരിച്ചു

കൊച്ചി :വരാപ്പുഴ അതിരൂപതയുടെ ആഭിമുഖ്യത്തിൽ എറണാകുളം സെയിന്റ് ആൽബെർട്സ് സ്‌കൂൾ ഗ്രൗണ്ടിൽ ക്രിസ്മസ് ആഘോഷം ‘ജിംഗിൽ വൈബ്‌സ്’ നടന്നു . വരാപ്പുഴ അതിരൂപത ആർച്ച് ബിഷപ്പ് ഡോ. ജോസഫ് കളത്തിപ്പറമ്പിൽ ഉദ്‌ഘാടനം ചെയ്തു . മേയർ അനിൽകുമാർ, ഹൈബി ഈഡൻ എംപി, ടി. ജെ.വിനോദ് എംഎൽഎ, വികാരി ജനറൽ മോൺ .മാത്യു കല്ലിങ്കൽ,ചാൻസലർ ഫാ. എബിജിൻ അറക്കൽ, കൗൺസിലർ മനു ജേക്കബ്, ഫാ.യേശുദാസ് പഴമ്പിള്ളി, അഡ്വ. ഷെറി ജെ.തോമസ് , ഫാ. വിൻസൻറ് നടുവിലപറമ്പിൽ എന്നിവർ സംബന്ധിച്ചു . ചടങ്ങിൽ വ്യവസായ വകുപ്പ് മന്ത്രി പി രാജീവ് മുഖ്യാതിഥിയായിരുന്നു.

കോഴിക്കോട്: മുണ്ടകൈ – ചൂരൽമല ഉരുൾപൊട്ടൽ ദുരിതബാധിതരെ പുനരധിവസിപ്പിക്കാൻ കേരള കത്തോലിക്കാ മെത്രാൻ സമിതി ( കെസിബിസി)യുo കോഴിക്കോട് രൂപതയുടെ ശതാബ്ദി ആഘോഷ ഭവന പദ്ധതിയും ചേർന്ന് ഭവനരഹിതർക്ക് നടപ്പാക്കുന്ന ഭവന നിർമ്മാണ പദ്ധതിയുടെ ശിലാ ആശീർവാദം കെസിബിസി ചെയർമാൻ കർദിനാൾ ബസേലിയോസ് ക്ലീമീസ് കാതോലിക്ക ബാവ നിർവഹിച്ചു. കേരളത്തിൽ ലത്തീൻ കത്തോലിക്കാ മെത്രാൻ സമിതി (കെആർഎൽസിബിസി) പ്രസിഡന്റും കോഴിക്കോട് രൂപത ബിഷപ്പ് വർഗീസ് ചക്കാലക്കൽ സമ്മേളനത്തിൽ അധ്യക്ഷനായി . കെസിബിസി സെക്രട്ടറി കണ്ണൂർ രൂപത ബിഷപ്പ് ഡോക്ടർ അലക്സ് വടക്കുംതല അനുഗ്രഹ പ്രഭാഷണം നടത്തി. താമരശ്ശേരി രൂപതാ ബിഷപ്പ് മാർ റെമിഞ്ചിയോസ് ഇഞ്ചനാനിയൽ തുടങ്ങിയർ പങ്കെടുത്തു. കോഴിക്കോട് രൂപതയുടെ പരിധിയിലുള്ള മേലെ അരപ്പറ്റയിൽ ഉള്ള സ്ഥലത്താണ് പുനരുധിവാസ ഭവന പദ്ധതി നടപ്പിലാക്കുന്നത്.കാരിത്താസ് ഇന്ത്യയുടെയും കേരള സോഷ്യൽ സർവീസ് ഫോറത്തിന്റെയും കോഴിക്കോട് രൂപത ബിഷപ്പ് ഡോ. വൾഗ്ഗീസ് ചക്കാലക്കൽ, വികാരി ജനറൽ റവ. ഡോ. ജൻസൻ പുത്തൻ വീട്ടിൽ, ഫിനാൻഷ്യൽ അഡ്മിനിസ്ട്രേറ്റർ…