കൊച്ചി: മുനമ്പത്തെ 610 കുടുംബങ്ങള് വിലകൊടുത്ത് നിയമാനുസൃതം സ്വന്തമാക്കി അനുഭവിച്ചു വന്നിരുന്ന ഭൂമി വഖഫ് ഭൂമിയാണെന്ന വഖഫ് ബോര്ഡിന്റെ തീരുമാനം നിയമപരമായും ധാര്മ്മികമായും നിലനില്ക്കാത്തതാണെന്നു കെആര്എല്സിസി. മുനമ്പത്തെ പ്രശ്ന പരിഹാരത്തിനായി കേരള സര്ക്കാര് നിയോഗിച്ച ജുഡീഷ്യല് കമ്മീഷന് ചെയര്മാന് ജസ്റ്റീസ് സി.എന്. രാമചന്ദ്രന് നായര്ക്ക് സമര്പ്പിച്ച നിവേദനത്തിലാണ് കെആര്എല്സിസി ഇത് വ്യക്തമാക്കിയത്.
2019 ല് മുനമ്പത്തെ ഭൂമി വഖഫ് ഭൂമിയാണെന്ന് ഏകപക്ഷീയമായി തീരുമാനിക്കുകയും ആസ്തിപ്പട്ടികയില് ഉള്പ്പെടുത്തുകയും ചെയ്ത കേരള വഖഫ് ബോര്ഡിന്റെ തീരുമാനം പൂര്ണമായും തെറ്റും അനുചിതവും ആണ്. വഖഫ് ആധാരം എന്ന് പറയപ്പെടുന്ന രേഖയിലെ വ്യവസ്ഥകള്, അക്കാലത്തെ ഭൂമിയുടെ യഥാര്ത്ഥ കൈവശാവകാശികള്, ആ കാലയളവില് നിലനിന്നിരുന്ന നിയമ വ്യവസ്ഥകള്, തീരുമാനത്തിന്റെ നിയമപരമായ പ്രത്യാഘാതങ്ങള് എന്നിവയൊന്നും കണക്കിലെടുക്കാതെ ഏകപക്ഷീയമായി വഖഫ് ബോര്ഡ് തീരുമാനം സ്വീകരിക്കുകയായിരുന്നു.
ഫറൂഖ് കോളെജിന് ഭൂമി കൈമാറുന്നതിന് രജിസ്റ്റര് ചെയ്യപ്പെട്ട ആധാരത്തില് വഖഫ് ആധാരമെന്ന് ശീര്ഷകം ചെയ്തിട്ടുണ്ടെങ്കിലും ക്രയവിക്രയ സ്വതന്ത്യം നല്കുന്നതിലൂടെ വഖഫിന്റെ നിര്വ്വചിത സ്വഭാവമായ ശാശ്വത സമര്പ്പണമെന്നത് നഷ്ടപ്പെടും, ഇത് വ്യക്തമാക്കുന്ന നിരവധി കോടതി പരാമര്ശങ്ങളുണ്ട്. വിദ്യാഭ്യാസ ആവശ്യങ്ങള്ക്കു മാത്രമെ ഫറൂഖ് കോളെജിന് നല്കുന്ന ഭൂമി ഉപയോഗിക്കാനാവൂ എന്ന നിബന്ധന മതപരമോ ജീവകാരുണ്യപരവുമായ പ്രവര്ത്തനങ്ങള് ഒഴിവാക്കപ്പെടുന്നതിനാല് വഖഫിന്റെ അടിസ്ഥാന സ്വഭാവം നഷ്ടപ്പെടുത്തുന്നു. ഒരു പ്രത്യേക സാഹചര്യത്തില് ഭൂമി തിരിച്ചെടുക്കാം എന്ന വ്യവസ്ഥയിലൂടെ ശാശ്വത സമര്പ്പണം ഇല്ലാതാകുന്നതിനാല് വഖഫ് അസാധുവാകും എന്ന നിരവധി കോടതി വിധികളും നിവേദനത്തില് ചൂണ്ടികാട്ടിയിട്ടുണ്ട്.
1988-93 കാലയളവിലാണ് ഫറൂഖ് കോളെജിന്റെ അധികാരികള് ഈ ഭൂമി അക്കാലത്തെ വിപണി വിലയ്ക്കനുസൃതമായി മുനമ്പംനിവാസികള്ക്ക് കൈമാറുന്നത്. 1954 ലെ വഖഫ് നിയമത്തിലെ വകുപ്പ് 36 അനുസരിച്ച് വഖഫ്ബോര്ഡ് ആസ്തി രജിസ്റ്ററില് ചേര്ത്തിട്ടുള്ള ഏതൊരു ഭൂമിയും ബോര്ഡിന്റെ മുന്കൂര് അനുമതിയില്ലാതെ കൈമാറ്റം ചെയ്യാന് പാടുള്ളതല്ല. ഈക്കാലയളവില് നിലനിന്നിരുന്ന 1954 ലെ വഖഫ് നിയമത്തിലെ സെക്ഷന് 36 (ബി) വ്യവസ്ഥയനുസരിച്ച് വഖഫ് ബോര്ഡിന്റെ ആസ്തി രജിസ്റ്ററില് വഖഫ് സ്വത്തായി രജിസ്റ്റര് ചെയ്തിട്ടുള്ള ഭുമിയുടെ ക്രയവിക്രയത്തിനു മാത്രമെ വഖഫ് ബോര്ഡിന്റെ മുന്കൂര് അനുമതി ആവശ്യമായി വരുന്നത്.
എന്നാല് മുനമ്പത്തെ ഭൂമി ഇടപാടുകള് വഖഫ് ബോര്ഡിന്റെ മുന്കൂര് അനുമതി വാങ്ങാതെയാണ് എന്നതിനാല് അസാധുവാകുന്നു എന്നാണ്വഖഫ് ബോര്ഡ് വാദിക്കുന്നത്. ഈ സ്വത്തുക്കളാകട്ടെ 2019 വരെ വഖഫ് ബോര്ഡിന്റെ ആസ്തി രജിസ്റ്ററില് ഉള്പ്പെടുത്തിയിട്ടില്ല. കാരണം ഈ ഭൂമി ഫറുക്ക് കോളെജിന് സമ്മാനമായി ലഭിച്ച സ്വത്താണ്. 1975 ല് കേരള ഹൈക്കോടതിയുടെ വിധിയില് ഫറൂഖ് കോളെജിന് സമ്മാനമായി ലഭിച്ചതാണന്ന് വ്യക്തമാക്കുകയും ചെയ്യുന്നുണ്ട്. ആയതിനാല് ഫറുഖ് കോളെജ് വസ്തുക്കള് കൈമാറിയ നടപടി നിയമപരമായി സാധുതയുള്ളതാണ് കെആര്എല്സിസി ചൂണ്ടിക്കാട്ടി.
വഖഫ് ബോര്ഡിന്റെ തീരുമാനം നിയമപരമല്ലാത്തതും അധാര്മ്മികവുമാണെന്ന് കെആര്എല്സിസി വ്യക്തമാക്കി. കെആര്എല്സിസി വൈസ് പ്രസിഡന്്റ് ജോസഫ് ജൂഡ്, ജനറല് സെക്രട്ടറി ഫാ. ഡോ. ജിജു ജോര്ജ് അറക്കത്തറ, മുന് ജനറല് സെക്രട്ടറി ഫാ. തോമസ് തറയില് എന്നിവരാണ് കമ്മീഷന് ഓഫീസിലെത്തി നിവേദനം സമര്പ്പിച്ചത്.