വൈപ്പിൻ: ഫോർട്ട് കൊച്ചി–വൈപ്പിൻ ജലപാതയിലെ യാത്രാദുരിതത്തിന് പരിഹാരമാകുമെന്ന് പ്രതീക്ഷിച്ച മൂന്നാമത്തെ റോ-റോ ജങ്കാർ സർവീസ് ആരംഭിക്കാത്തത് യാത്രക്കാരെ ദുരിതത്തിലാക്കുന്നു. സേതു സാഗർ–3 എന്ന ജങ്കാറിന്റെ നിർമാണം പൂർത്തിയാക്കി ഉദ്ഘാടനം കഴിഞ്ഞ് മൂന്ന് മാസം പിന്നിട്ടിട്ടും സർവീസ് ആരംഭിക്കാൻ കൊച്ചി കോർപ്പറേഷൻ നടപടിയെടുത്തിട്ടില്ല.
നിലവിലുള്ള രണ്ട് ജങ്കാറുകളെ ആശ്രയിച്ചാണ് ഫോർട്ട് കൊച്ചി, മട്ടാഞ്ചേരി, വൈപ്പിൻ, പള്ളുരുത്തി, തോപ്പുംപടി, ഇടക്കൊച്ചി, അരൂർ തുടങ്ങിയ പ്രദേശങ്ങളിലേക്ക് ദിവസേന യാത്ര ചെയ്യുന്നവർ കടത്തുകടക്കുന്നത്. ജോലിക്കും മറ്റ് ആവശ്യങ്ങൾക്കുമായി യാത്ര ചെയ്യുന്നവരും മത്സ്യവാഹനങ്ങളുമുൾപ്പെടെ നിരവധി പേരുടെ ആശ്രയമാണ് ഈ ജലഗതാഗത സംവിധാനം.
എന്നാൽ നിലവിലുള്ള ജങ്കാറുകൾ ഇടയ്ക്കിടെ തകരാറിലാകുന്നത് യാത്രക്കാരുടെ ദുരിതം വർധിപ്പിക്കുന്നു. സർവീസ് മുടങ്ങുമ്പോൾ മണിക്കൂറുകളോളം കാത്തുനിൽക്കേണ്ടി വരുന്നതും റോഡ് മാർഗമുള്ള യാത്രയിൽ ഗതാഗതക്കുരുക്ക് നേരിടേണ്ടിവരുന്നതും പതിവാണ്. ഈ സാഹചര്യത്തിലാണ് സർവീസ് തടസ്സമില്ലാതെ നടത്തുന്നതിനായി മൂന്നാമത്തെ ജങ്കാർ നിർമിച്ചത്. നിലവിലുള്ള ഏതെങ്കിലും ജങ്കാറിന് തകരാർ സംഭവിച്ചാൽ പകരം സേതു സാഗർ–3 ഉപയോഗിച്ച് സർവീസ് തുടരാമെന്നതായിരുന്നു ലക്ഷ്യം. ജൂലൈ 12ന് മുഖ്യമന്ത്രി ഉദ്ഘാടനം ചെയ്ത ജങ്കാർ പിന്നീട് കൊച്ചിൻ ഷിപ്പ്യാർഡിലേക്ക് മാറ്റിയെങ്കിലും സർവീസ് ആരംഭിച്ചിട്ടില്ല. പുതിയ ജങ്കാർ സർവീസിന് ഇറക്കുന്നതിലെ കാലതാമസത്തിന് അധികൃതർ വ്യക്തമായ വിശദീകരണം നൽകണമെന്നും അടിയന്തരമായി സർവീസ് ആരംഭിക്കണമെന്നുമാണ് യാത്രക്കാരുടെ ആവശ്യം. ജങ്കാർ സർവീസുകൾ മുടങ്ങാതിരിക്കാൻ നടപടി സ്വീകരിച്ചില്ലെങ്കിൽ ഫോർട്ട് കൊച്ചി–വൈപ്പിൻ യാത്രാദുരിതത്തിന് പരിഹാരമുണ്ടാകില്ലെന്നും അവർ ചൂണ്ടിക്കാട്ടുന്നു.
