ഫാ. ആന്റണി റാഫേല് കൊമരംചാത്ത്
ഒരു പുഞ്ചിരി കൊണ്ടും കരുതല് നിറഞ്ഞൊരു വാക്കു കൊണ്ടും മനുഷ്യന് പ്രത്യാശ നല്കുന്നവരാണ് ഡോക്ടര്മാര്. ദൈവത്തിന്റെ പ്രതിരൂപങ്ങളായി നാം അവരെ കാണുന്നത് അതുകൊണ്ടാണ്. ജീവന് കാത്തുസൂക്ഷിക്കാന് സ്വന്തം സുഖങ്ങള് മാറ്റിവെച്ച് രാത്രിയെന്നോ പകലെന്നോ ഇല്ലാതെ അധ്വാനിക്കുന്ന പ്രിയപ്പെട്ട ഡോക്ടര്മാര്ക്കായി സമര്പ്പിച്ച സുദിനമാണ് ദേശീയ ഡോക്ടേഴ്സ് ദിനം. ജീവന്റെ വിലയറിഞ്ഞ്, മരണത്തിന്റെ നിഴലില് നിന്ന് മനുഷ്യനെ ജീവിതത്തിലേക്ക് തിരികെ കൊണ്ടുവരുന്ന ഓരോ ആരോഗ്യപ്രവര്ത്തകന്റെയും നിസ്തുലമായ സേവനങ്ങളെ നന്ദിയോടെ സ്മരിക്കാനുള്ള അവസരമാണിത്. ഒരു തൊഴില് എന്നതിനപ്പുറം, സമര്പ്പണത്തിന്റെയും ത്യാഗത്തിന്റെയും ഉദാത്തമായ മാതൃകയാണ് ആതുരരംഗം.
ഒരു രോഗിക്ക് മരുന്നിനേക്കാള് വേഗത്തില് രോഗശാന്തി നല്കുന്നത് ഡോക്ടറുടെ സ്നേഹത്തോടെയുള്ള പെരുമാറ്റമാണ്. ശാരീരികമായ അസുഖങ്ങള്ക്കുള്ള മരുന്ന് കുറിച്ച് നല്കുന്നതിനൊപ്പം രോഗിയുടെ മനസ്സിന് ആശ്വാസം പകരാനും അവര്ക്ക് കഴിയുന്നു. അത് മനുഷ്യത്വത്തിന്റെ ഏറ്റവും മനോഹരമായ മുഖമാണ്. രോഗിക്ക് നല്കുന്ന മാനസികമായ പിന്തുണ ചികിത്സയുടെ പകുതി വിജയമാണെന്ന് ലോകം എക്കാലത്തും അംഗീകരിച്ചിട്ടുള്ള സത്യമാണ്. ഇതിനെക്കുറിച്ച് പ്രശസ്ത ഫ്രഞ്ച് എഴുത്തുകാരന് വോള്ട്ടയര് പറഞ്ഞിട്ടുണ്ട്: ‘രോഗിയെ പ്രകൃതി സുഖപ്പെടുത്തുമ്പോള്, അവരെ മാനസികമായി സന്തോഷിപ്പിക്കുക എന്നതാണ് വൈദ്യശാസ്ത്രത്തിന്റെ കല.’
ഒരു രോഗിയുടെ വേദന പൂര്ണ്ണമായി മനസ്സിലാക്കാനും അതില് പങ്കുചേരാനും കഴിയുമ്പോഴാണ് ഒരു ഡോക്ടര് യഥാര്ത്ഥത്തില് ജനപ്രിയനാകുന്നത്. സ്റ്റെതസ്കോപ്പിലൂടെ അവര് കേള്ക്കുന്നത് വെറും ഹൃദയമിടിപ്പ് മാത്രമല്ല, മറിച്ച് ആ മനുഷ്യന്റെ ആശങ്കകളും പ്രതീക്ഷകളുമാണ്. ഒടുവില് രോഗം ഭേദമായി നിറഞ്ഞ പുഞ്ചിരിയോടെ അവര് പടിയിറങ്ങിപ്പോകുമ്പോള് ആ മുഖത്തുണ്ടാകുന്ന സംതൃപ്തിയാണ് ഒരു ഡോക്ടര്ക്ക് ലഭിക്കുന്ന ഏറ്റവും വലിയ പ്രതിഫലം. ആ സന്തോഷം നല്കുന്ന ഊര്ജ്ജമാണ് പലപ്പോഴും ഉറക്കമില്ലാത്ത രാത്രികളെയും കഠിനമായ ജോലിഭാരത്തെയും മറികടക്കാന് അവര്ക്ക് കരുത്താകുന്നത്.
നാം കടന്നുപോയ പ്രതിസന്ധി ഘട്ടങ്ങളിലെല്ലാം സ്വന്തം ജീവന് പോലും നോക്കാതെ അവര് നമുക്കായി കാവലിരുന്നു. സമീപകാലത്ത് ലോകം നേരിട്ട മഹാമാരികളുടെയും പ്രകൃതിദുരന്തങ്ങളുടെയും സമയത്ത് സ്വന്തം കുടുംബത്തെയും സുരക്ഷിതത്വത്തെയും മറന്ന് പിപിഇ കിറ്റുകള്ക്കുള്ളില് ശ്വാസം മുട്ടി മണിക്കൂറുകളോളം അവര് കര്മ്മനിരതരായി. രോഗികളോടുള്ള അവരുടെ കാരുണ്യമാണ് ഈ ലോകത്തെ കൂടുതല് മനോഹരമാക്കുന്നത്. ഡോക്ടര് ഒലിവര് വെന്ഡല് ഹോംസിന്റെ ഈ വരികള് എത്ര ലളിതവും സത്യവുമാണ്: ‘ചിലപ്പോള് രോഗം ഭേദമാക്കുക, പലപ്പോഴും ആശ്വാസം നല്കുക, എപ്പോഴും സ്നേഹത്തോടെ പരിചരിക്കുക.’
യന്ത്രങ്ങള്ക്കും സാങ്കേതികവിദ്യകള്ക്കും മനുഷ്യജീവിതത്തില് വലിയ സ്ഥാനമുള്ള ഇന്നത്തെ കാലത്തും, ഒരു ഡോക്ടറുടെ സ്പര്ശനത്തിന് പകരമാകാന് മറ്റൊന്നിനും കഴിയില്ല. കമ്പ്യൂട്ടറുകള്ക്കോ കൃത്രിമബുദ്ധിക്കോ നല്കാതിരിക്കാന് കഴിയാത്ത ഒന്നാണ് മനുഷ്യസഹജമായ ആര്ദ്രത. രോഗിയുടെ കണ്ണുകളിലെ ഭയം വായിച്ചെടുക്കാനും, അവരുടെ കൈകള് ചേര്ത്തുപിടിച്ച് ‘ഭയപ്പെടേണ്ട, ഞാനുണ്ട് കൂടെ’ എന്ന് ഉറപ്പുനല്കാനും ഒരു മനുഷ്യന് മാത്രമേ സാധിക്കൂ. ആതുരസേവനം യാന്ത്രികമായ ഒരു പ്രക്രിയയല്ലെന്നും, അത് മനസ്സുകള് തമ്മിലുള്ള ആഴമേറിയ ഒരു ബന്ധമാണെന്നും ഓരോ നല്ല ഡോക്ടറും നമ്മെ ഓര്മ്മിപ്പിക്കുന്നു.
ഒരു നല്ല ഡോക്ടര് രോഗത്തെ മാത്രമല്ല, ആ രോഗം മൂലം വിഷമിക്കുന്ന മനുഷ്യന്റെ മനസ്സിനെ കൂടിയാണ് ചികിത്സിക്കുന്നത്. രോഗാവസ്ഥ നല്കുന്ന മാനസിക തകര്ച്ചയില് നിന്ന് ഒരു കുടുംബത്തെ മുഴുവന് സാധാരണ ജീവിതത്തിലേക്ക് നയിക്കാന് അവരുടെ കൗണ്സിലിംഗിനും സ്നേഹസംഭാഷണങ്ങള്ക്കും സാധിക്കാറുണ്ട്. വൈദ്യശാസ്ത്രത്തിന്റെ പിതാവായ ഹിപ്പോക്രാറ്റസ് പറഞ്ഞതുപോലെ: ‘എവിടെയാണോ വൈദ്യശാസ്ത്രത്തോടുള്ള സ്നേഹമുള്ളത്, അവിടെ മനുഷ്യത്വത്തോടുള്ള സ്നേഹവുമുണ്ട്.’
ആധുനിക കാലത്ത് ചികില്സാ രംഗം ഏറെ പുരോഗമിച്ചെങ്കിലും, ഡോക്ടര്മാരും രോഗികളും തമ്മിലുള്ള ആത്മബന്ധത്തിന് യാതൊരു മാറ്റവും വന്നിട്ടില്ല. ഒരു കുഞ്ഞിന്റെ ജനനം മുതല് പ്രായമായവരുടെ പരിചരണം വരെ നീളുന്ന ജീവിതത്തിന്റെ എല്ലാ ഘട്ടങ്ങളിലും ഒരു കാവലാളായി ഡോക്ടര്മാരുടെ സാന്നിധ്യമുണ്ട്. അര്പ്പണബോധമുള്ള ഒരു ഡോക്ടറുടെ സാന്നിധ്യം തന്നെ രോഗിക്ക് പകുതി ആശ്വാസം നല്കുന്നു എന്നത് തര്ക്കമില്ലാത്ത കാര്യമാണ്.
നന്ദിയോടെയും ആദരവോടെയും അല്ലാതെ നമുക്ക് അവരെ ഓര്ക്കാന് കഴിയില്ല. മറ്റുള്ളവരുടെ കണ്ണീരൊപ്പാന് സ്വന്തം കണ്ണീരും തളര്ച്ചയും മറന്നു പ്രവര്ത്തിക്കുന്ന ഈ വലിയ മനുഷ്യര് സമൂഹത്തിന്റെ യഥാര്ത്ഥ കാവല്ക്കാരാണ്. അവധിക്കാലങ്ങളോ ആഘോഷങ്ങളോ ഇല്ലാതെ, അടിയന്തര സാഹചര്യങ്ങളില് എപ്പോഴും സന്നദ്ധരായിരിക്കുന്ന അവരുടെ ജീവിതം വലിയൊരു സന്ദേശമാണ്. നമ്മുടെ പ്രിയപ്പെട്ടവര്ക്കായി അവര് കാത്തുസൂക്ഷിക്കുന്ന ഈ കരുതലിന് പകരമായി അവര്ക്ക് നല്കാന് നമുക്കുള്ളത് ഒന്നുമാത്രം ഹൃദയം നിറഞ്ഞ ആദരവും സ്നേഹവും പ്രാര്ഥനയും.
നമുക്ക് വെളിച്ചവും ആശ്വാസവും നല്കുന്ന എല്ലാ പ്രിയപ്പെട്ട ഡോക്ടര്മാര്ക്കും ഹൃദയം നിറഞ്ഞ ആശംസകള്! നിങ്ങളുടെ സ്നേഹവും കരുതലും എന്നും പെയ്തൊഴിയാതിരിക്കട്ടെ, നിങ്ങളുടെ കൈകള് സമൂഹത്തിന് എന്നും കാരുണ്യത്തിന്റെ ഉറവിടമാകട്ടെ.
