കൊച്ചി: കേരളത്തിലെ ലത്തീന്‍ കത്തോലിക്കരുടെ ഉന്നത നയരൂപീകരണ ഏകോപന സമിതിയായ കേരള റീജ്യണ്‍ ലാറ്റിന്‍ കാത്തലിക് കൗണ്‍സിലിന്‍റെ (കെആര്‍എല്‍സിസി) 45-ാം ജനറല്‍ അസംബ്ലി ജൂലൈ 11 മുതല്‍ 13 വരെ ഇടക്കൊച്ചി ആല്‍ഫാ പാസ്റ്ററല്‍ സെന്‍ററില്‍ നടക്കും.
11 ന് വെള്ളിയാഴ്ച രാവിലെ 09:45ന് കെആര്‍എല്‍സിസി പ്രസിഡന്‍റ് ആര്‍ച്ച്ബിഷപ് ഡോ. വര്‍ഗീസ് ചക്കാലക്കല്‍ ആമുഖസന്ദേശം നല്‍കും. കേരള സര്‍വ്വകലാശാല സെനറ്റ് അംഗം ഡോ. ജോസഫ് ആന്‍റണി മുഖ്യപ്രഭാഷണം നടത്തും. 11:30 ന് സമ്മേളനത്തില്‍ അവലംബിക്കുന്ന ആത്മീയ സംഭാഷണ രീതിശാസ്ത്രത്തെക്കുറിച്ചു കെആര്‍എല്‍സിസി ജനറല്‍ സെക്രട്ടറി ഡോ. ജിജു ജോര്‍ജ് അറക്കത്തറ വിശദീകരിക്കും.
ഉച്ചയ്ക്ക് 12:00 ന് ഉദ്ഘാടന സമ്മേളനത്തില്‍ ആര്‍ച്ച്ബിഷപ് ഡോ. വര്‍ഗീസ് ചക്കാലക്കല്‍ അധ്യക്ഷനായിരിക്കും. കേന്ദ്ര ഫിഷറീസ് ന്യൂനപക്ഷക്ഷേമ മന്ത്രി ജോര്‍ജ് കുര്യന്‍ ഉദ്ഘാടനം ചെയ്യും. കൊച്ചി രൂപത അപ്പസ്തോലിക് അഡ്മിനിസ്ട്രേറ്റര്‍ ബിഷപ് ഡോ. ജെയിംസ് റാഫേല്‍ ആനാപറമ്പില്‍ അനുഗ്രഹപ്രഭാഷണം നടത്തും. നെയ്യാറ്റിന്‍കര രൂപത സഹമെത്രാന്‍ ഡോ. സെല്‍വരാജന്‍ ഡി.യെ ചടങ്ങില്‍ ആദരിക്കും. ഹൈബി ഈഡന്‍ എംപി, കെ.ജെ.മാക്സി എംഎല്‍എ കെആര്‍എല്‍സിസി വൈസ് പ്രസിഡന്‍റ് ജോസഫ് ജൂഡ്, സെക്രട്ടറി പാട്രിക് മൈക്കിള്‍ എന്നിവര്‍ പ്രസംഗിക്കും.
ഉച്ചയ്ക്കു ശേഷം 2:30ന് അല്‍മായരുടെ പങ്കാളിത്തം സഭയിലും സമൂഹത്തിലും എന്ന വിഷയത്തില്‍ ഫാ. ബെന്നി പൂത്തറയിലും വിദ്യാഭ്യാസവും സാമൂഹിക മുന്നേറ്റവും എന്ന വിഷയത്തില്‍ തോമസ് കെ.സ്റ്റീഫനും പഠനരേഖകള്‍ അവതരിപ്പിക്കും. മെറ്റില്‍ഡ മൈക്കിള്‍ മോഡറേറ്ററായിരിക്കും. വൈകിട്ട് 6:00 ന് തദ്ദേശസ്വയംഭരണ തിരഞ്ഞെടുപ്പ് മുന്നൊരുക്കങ്ങള്‍ സംബന്ധിച്ച് ചര്‍ച്ച. കെഎല്‍സിഎ സംസ്ഥാന പ്രസിഡന്‍റ് അഡ്വ. ഷെറി ജെ. തോമസ് മോഡറേറ്ററായിരിക്കും. രാത്രി 8.45ന് കമ്മീഷന് സെക്രട്ടറിമാരുടെയും രാഷ്ട്രീയകാര്യ സമിതിയുടെയും യോഗം ചേരും.
ശനിയാഴ്ച രാവിലെ 9:00 ന് കുടിയേറ്റവും പ്രവാസജീവിതവും എന്ന വിഷയത്തില്‍ ഫാ. നോയല്‍ കുരിശിങ്കലും കുട്ടികള്‍-സഭയുടെ ഭാവിയും പ്രതീക്ഷയും എന്ന വിഷയത്തില്‍ ഫാ. അരുണ്‍ തൈപ്പറമ്പിലും പഠനരേഖകള്‍ അവതരിപ്പിക്കും. പാട്രിക് മൈക്കിള്‍ മോഡറേറ്ററായിരിക്കും. ഉച്ചയ്ക്ക് 12:00 ന് ഗ്രൂപ്പ് റിപ്പോര്‍ട്ട് അവതരണത്തില്‍ പി.ആര്‍. കുഞ്ഞച്ചന്‍ മോഡറേറ്ററായിരിക്കും.
ഉച്ചയ്ക്കു ശേഷം 2:30ന് സ്ത്രീകള്‍- സഭയിലും സമൂഹത്തിലും എന്ന വിഷയത്തില്‍ സിസ്റ്റര്‍ നിരഞ്ജന സിഎസ്എസ്റ്റിയും നീതി-സമാധാനം-വികസനം എന്ന വിഷയത്തില്‍ ഡോ. ബിജു വിന്‍്സെന്‍റും പഠനരേഖകള്‍ അവതരിപ്പിക്കും. പ്രബലദാസ് മോഡറേറ്ററായിരിക്കും.
വൈകിട്ട് 6:00 ന് ഗ്രൂപ്പ് റിപ്പോര്‍ട്ട് അവതരണം. ജോയ് റ്റി.എഫ് മോഡറേറ്ററായിരിക്കും. വൈകിട്ട് 6:30ന് കെആര്‍എല്‍സിബിസി കമ്മീഷനുകളുടെ വീഡിയോ റിപ്പോര്‍ട്ട് ഫാ. സ്റ്റീഫന് തോമസ് ചാലക്കര അവതരിപ്പിക്കും.
രാത്രി 8:45ന് ഓപ്പണ്‍ ഫോറത്തില്‍ സംഘടനാവിഷയങ്ങളും പൊതുപ്രശ്നങ്ങളും ചര്‍ച്ച ചെയ്യും.
ജൂലൈ 13 ന് രാവിലെ 9:00ന് ഗ്രൂപ്പ് റിപ്പോര്‍ട്ട് അവതരണത്തില്‍ ജെസി ജെയിംസ് മോഡറേറ്ററായിരിക്കും. 10:00 ന് ജോസഫ് ജൂഡ് സാമൂഹ്യ രാഷ്ട്രീയപ്രമേയം അവതരിപ്പിക്കും. തുടര്‍ന്ന് 44-ാമത് ജനറല്‍ അസംബ്ലിയുടെ റിപ്പോര്‍ട്ട് പ്രബലദാസും കെആര്‍എല്‍സിസി പ്രവര്‍ത്തനറിപ്പോര്‍ട്ട് റവ. ഡോ. ജിജു ജോര്‍ജ് അറക്കത്തറയും അവതരിപ്പിക്കും. ബിജു ജോസി സാമ്പത്തിക റിപ്പോര്‍ട്ടും അഡ്വ. ഷെറി ജെ.തോമസ് രാഷ്ട്രീയകാര്യസമിതി റിപ്പോര്‍ട്ടും അവതരിപ്പിക്കും.
12:00 ന് സമാപനസമ്മേളനത്തില്‍ സ്കോളര്‍ഷിപ്പുകള്‍ വിതരണം ചെയ്യും. തുടര്‍ന്ന് ഉച്ച കഴിഞ്ഞ് 2:30ന് വാര്‍ത്താസമ്മേളനം. ജനറല്‍ അസംബ്ലിയില്‍ കേരള ലത്തീന്‍ സഭയിലെ ബിഷപ്പുമാരും എല്ലാ രൂപതകളിലേയും അല്‍മായ പ്രതിനിധികളും സന്ന്യാസസഭകളുടെ പ്രതിനിധികളും സംബന്ധിക്കും.
