വത്തിക്കാന്‍ : കാരുണ്യപ്രവർത്തികളിൽ മുഴുകിയും ദൈവമെന്ന സത്യത്തെക്കുറിച്ച് ധ്യാനിച്ചും ക്രിസ്തുവിലേക്കെത്താൻ ധ്യാനാത്മകസമൂഹമായ “അഗസ്റ്റീനിയൻ റീകളക്റ്റ്സ്” (Agostiniane Recollette) സന്ന്യാസിനിമാരെ ആഹ്വാനം ചെയ്‌ത്‌ ലിയോ പതിനാലാമൻ പാപ്പാ. ജൂബിലിവർഷത്തിന്റെ കൂടി പശ്ചാത്തലത്തിൽ വത്തിക്കാനിലെത്തിയ ഈ സന്ന്യാസിനീസമൂഹത്തിന്റെ പ്രതിനിധികൾക്ക് ഒക്ടോബർ 15 ബുധനാഴ്ച രാവിലെ വത്തിക്കാനിലെ പോൾ ആറാമൻ സമുച്ചയത്തിലുള്ള ഒരു ശാലയിൽ കൂടിക്കാഴ്ച അനുവദിച്ച വേളയിൽ, സ്പൈനിൽനിന്നുള്ള വില്ലനോവയിലെ വിശുദ്ധ തോമസ് എന്ന അഗസ്റ്റീനിയൻ സന്ന്യാസികൂടിയായ മെത്രാൻ, വിശുദ്ധ അഗസ്റ്റിന്റെ കൃതികളെക്കുറിച്ച് പരാമർശിച്ചുകൊണ്ട് നടത്തുന്ന ഉദ്ബോധനങ്ങൾ ഉദ്ധരിച്ചുകൊണ്ട് (ഒപ്പറ ഓമ്നിയ, II, 89), ക്രിസ്തുവാണ് നമ്മെ ആനന്ദം കൊണ്ട് നിറയ്ക്കുന്നതെന്ന് പാപ്പാ ഓർമ്മിപ്പിച്ചു.
കർത്താവുമായുള്ള കണ്ടുമുട്ടലിനായി തീർത്ഥാടകരെപ്പോലെ വിശ്വാസവഴിയെ നാം മുന്നോട്ട് പോകേണ്ടതുണ്ടെന്ന് ഓർമ്മിപ്പിച്ച പാപ്പാ, ഇതിന് പല മാർഗ്ഗങ്ങളുണ്ടെങ്കിലും അവയെ കരുണ, സത്യം എന്നീ രണ്ട് വഴികളിലേക്ക് ചുരുക്കാനാകുമെന്നും, അത്, ലാസറിന്റെ സഹോദരി മാർത്തയെപ്പോലെ കരുണയോടെയുള്ള സേവനപ്രവൃത്തികളിൽ മുഴുകിയും, യേശുവിന്റെ പാദാന്തികേ ഇരുന്ന മറിയത്തെപ്പോലെ സത്യത്തെക്കുറിച്ച് ധ്യാനിച്ചുകൊണ്ടുമാണെന്ന് ഉദ്‌ബോധിപ്പിച്ചു (ലൂക്ക 10, 38-41).
ദൈവത്തെയും മനുഷ്യരെയും സ്നേഹിച്ചുകൊണ്ടുള്ള ഒരു മാർഗ്ഗം ജീവിക്കാനാണ് സുവിശേഷവും പൗലോസ് അപ്പസ്തോലനും വിശുദ്ധ അഗസ്റ്റിനും നമ്മെ ഉദ്ബോധിപ്പിക്കുന്നതെന്ന് പാപ്പാ ഓർമ്മിപ്പിച്ചു. ദൈവത്തിലേക്കെത്തിയവരെല്ലാം ഈ മാർഗ്ഗത്തിലൂടെയാണ് കടന്നുപോയതെന്നും, എന്നാൽ സ്നേഹമെന്നത് ദൈവം നൽകുന്ന കൃപയാണെന്നും പാപ്പാ കൂട്ടിച്ചേർത്തു.
നമ്മുടെ പ്രവൃത്തികളുടെ അടിസ്ഥാനത്തിലാണ് നാം വിധിക്കപ്പെടുകയെങ്കിലും, ആ പ്രവൃത്തികളുടെ മൂല്യം ഹൃദയത്തിലെ സ്നേഹത്തിലാണ് അടങ്ങിയിരിക്കുന്നതെന്ന് വിശുദ്ധ അഗസ്റ്റിനെ പരാമർശിച്ചുകൊണ്ട് (ഒപ്പേറ ഓമ്നിയ, II, 247), പാപ്പാ ഓർമ്മിപ്പിച്ചു. കഷ്ടപ്പാടുകൾ ആത്മാവിൽ ഒരു ഭാരമായി മാത്രം നിലനിൽക്കുമെന്നും, എന്നാൽ സ്നേഹമുണ്ടെങ്കിൽ അവിടെ ബുദ്ധിമുട്ടുകൾ ഉണ്ടാകില്ലെന്നും പാപ്പാ (ഒപ്പേറ ഓമ്നിയ, II, 487), പ്രസ്താവിച്ചു.
അഗസ്റ്റീനിയൻ ആധ്യാത്മികത ജീവിക്കുന്ന അഗസ്റ്റീനിയൻ റീകളക്റ്റ്സ് എന്ന ധ്യാനാത്മകസന്ന്യാസിനീസഭ എന്ന ശാഖയ്ക്ക് സ്പൈനിൽനിന്നുള്ള മനുവേൽ ഫെർനാണ്ടെസ് എന്ന മെത്രാനാണ് രൂപം കൊടുത്തത്. 1688-ൽ മെക്സിക്കോയിലാണ് ഇത് ആരംഭിച്ചത്.
