കണ്ണൂർ : ‘യുവത്വത്തിൻ്റെ കണ്ണുകളിലൂടെ കേരള സമൂഹത്തിൻ്റെ വികസനം’ എന്ന ആപ്തവാക്യവുമായി കെ.സി. വൈ. എം സംസ്ഥാന സമിതിയുടെ ആഭിമുഖ്യത്തിൽ ജാഥ ക്യാപ്റ്റനും സംസ്ഥാന പ്രസിഡണ്ടുമായ എബിൻ കണിവയലിൻ്റെ നേതൃത്വത്തിൽ കാസർഗോഡ് നിന്ന് തിരുവനന്തപുരം വരെ നടത്തുന്ന കേരള നവീകരണ യാത്രയ്ക്ക് കണ്ണൂരിൽ സ്വീകരണം നൽകി.
ലഹരിക്കെതിരെയുള്ള പോരാട്ടം, യുവജന മുന്നേറ്റം, വർദ്ധിച്ചു വരുന്ന ക്രൈസ്തവ പീഢനങ്ങൾക്കെതിരെ, മലയോര തീരദേശ – ദളിത് ജനതയുടെ അവകാശ സംരക്ഷണം, വർഗ്ഗീയതയ്ക്കെതിരെ ബഹുസ്വരതയുടെ ശബ്ദമാകുവാൻ, ഭരണഘടന അവകാശം ഉറപ്പാക്കുക എന്നിവയാണ് യാത്രയുടെ ലക്ഷ്യങ്ങൾ .
കേരള നവീകരണ യാത്രയ്ക്ക് കണ്ണൂർ പഴയ ബസ് സ്റ്റാൻ്റ് പരിസരത്ത് നൽകിയ സ്വീകരണ പരിപാടിയിൽ കെ.സി.വൈ.എം കണ്ണൂർ രൂപത പ്രസിഡണ്ട് എൻ.റോജൻ അധ്യക്ഷത വഹിച്ചു. കണ്ണൂർ മേയർ മുസ്ലിഹ് മ0ത്തിൽ ഉദ്ഘാടനം ചെയ്തു. കണ്ണൂർ രൂപത സഹായ മെത്രാൻ ഡെന്നീസ് കുറുപ്പശ്ശേരി അനുഗ്രഹ പ്രഭാഷണം നടത്തി. കെ.എൽ.സി എ സംസ്ഥാന ട്രഷറർ രതീഷ് ആൻ്റണി ,രൂപത പ്രസിഡണ്ട് ഗോഡ്സൺ ഡിക്രൂസ്,ഫാ.ജസ്റ്റിൻ എടത്തിൽ, ഫെബിന , ജെബി.പി.സന്തോഷ്, എന്നിവർ പ്രസംഗിച്ചു.
കണ്ണൂർ, കാസർഗോഡ് ജില്ലകളിലെ പര്യടനം പൂർത്തിയാക്കിയ കേരള നവീകരണ യാത്ര ശനിയാഴ്ച വയനാട് ജില്ലയിലെ ബത്തേരിയിൽ ആരംഭിക്കും. യാത്രയുടെ ഭാഗമായി വിവിധ രൂപതകളിൽ നിന്നും ശേഖരിക്കുന്ന നിർദ്ദേശങ്ങളും റിപ്പോർട്ടുകളുടെയും അടിസ്ഥാനത്തിൽ സമാപന ദിവസം കേരളം വികസന രേഖ തയ്യാറാക്കുകയും ബഹു. മുഖ്യമന്ത്രിക്കും മറ്റ് പ്രധാന രാഷ്ട്രീയ വ്യക്തികൾക്കും നൽകുകയും ചെയ്യുന്നു. വിവിധ രൂപത മെത്രാന്മാർ, സമൂഹത്തിൻ്റെ വിവിധ തുറകളിൽ നിന്നുള്ള പ്രമുഖ വ്യക്തിത്വങ്ങൾ തുടങ്ങിയവർ യാത്രയുടെ വിവിധ ഘട്ടങ്ങളിൽ അണിചേരും.
സംസ്ഥാന ഡയറക്ടർ ഫാ.ഡിറ്റോ കൂള, ജനറൽ സെക്രട്ടറി ജോബിൻ ജോസ്, സംസ്ഥാന സംസ്ഥാന ഭാരവാഹികളായ ജോഷ്ന എലിസബത്ത്, അനൂപ് ജെ.ആർ പാലിയോട്, ജിബി ഏലിയാസ്, ജീന ജോർജ്,ജോസ്മി മരിയ ജോസ്,സനു സാജൻ പടിയറയിൽ എന്നിവർ ജാഥയ്ക്ക് നേതൃത്വം നൽകി. 14 ജില്ലകളിലൂടെ 32 രൂപതകളിലായി കടന്നുപോകുന്ന നവീകരണ യാത്ര. സെപ്റ്റംബർ 7-ന് തിരുവനന്തപുരത്ത് സമാപിക്കും.
