മുനമ്പം നിരാഹാര സമരം അവസാനിക്കുന്നു; മന്ത്രി രാജീവ് സമരപ്പന്തലിലെത്തും

അന്തിമ വിജയം നേടുന്നതുവരെ പിന്തുണക്കുമെന്ന് KRLCC രാഷ്ട്രീയ കാര്യസമിതി കൺവീനർ ജോസഫ് ജൂഡ്

കൊച്ചി: മുനമ്പം നിരാഹാര സമരം താൽക്കാലികമായി അവസാനിപ്പിക്കുന്നു . ഭൂസംരക്ഷണ സമിതിയാണ് ഇക്കാര്യം തീരുമാനിച്ചത് . കേസിൽ അന്തിമ വിധി വരുന്നതു വരെ ഭൂ നികുതി അടയ്ക്കാൻ ഹൈക്കോടതി ഉത്തരവ് പുറപ്പെടുവിച്ചിരുന്നു . ഈ സാഹചര്യത്തിലാണ് ഭൂസംരക്ഷണസമിതി കോർ ഗ്രൂപ്പ് യോഗം ചേർന്ന് സമരം അവസാനിപ്പിക്കാൻ തീരുമാനിച്ചത്.

കേരളത്തിൽ എല്ലാ ഭൂമിക്കും 1961 ലെ കേരള ഭൂനികുതി നിയമപ്രകാരം അടിസ്ഥാന ഭൂനികുതി ഏർപ്പെടുത്തിയിട്ടുണ്ട്. സർക്കാരിലേക്ക് ഈ നികുതി എല്ലാ വർഷവും ഭൂമിയുടെ ഉടമസ്ഥനോ കൈവശം വച്ചിരിക്കുന്ന വ്യക്തിയോ നല്കേണ്ടതാണ്. ഭൂമിയുടെ മേൽ വ്യക്തിക്കുള്ള ഉടമസ്ഥാവകാശം / കൈവശാവകാശം കാലാകാലങ്ങളിൽ മാറുന്നതിന് അനുസൃതമായി ഭൂനികുതി പിരിച്ചെടുക്കുന്നതിനായി ഈ നികുതി അടയ്ക്കേണ്ട ബാധ്യത ആർക്കാണെന്നും ആരിൽ നിന്നാണ് ഈ ഭൂനികുതി പിരിച്ചെടുക്കേണ്ടതെന്നും റവന്യൂ റിക്കാർഡുകളിൽ രേഖപ്പെടുത്തുന്ന നടപടിയാണ് പോക്കുവരവ്. 1966 ലെ ട്രാൻസ്ഫർ ഓഫ് രജിസ്ട്രി റൂൾസ് പ്രകാരമാണ്. കേരളത്തിൽ പോക്കുവരവ് നടത്തുന്നത്.

മുനമ്പത്തെ ഭൂമി ഉടമസ്ഥയുള്ളവർക്കും കൈവശം വച്ചിരിക്കുന്നവർക്കും പോക്കുവരവ് രേഖപെടുത്തിയിട്ടുള്ള ഭൂമിയായിരിക്കും കൈവശമുള്ളത്. ഈ ഭൂമിയുടെ നികുതി സ്വീകരിക്കരുതെന്നായിരുതെന്നായിരുന്നു കോടതി പുറപെടുവിച്ചിരുന്ന ഉത്തരവ്. ഈ ഉത്തരവാണ് കോടതി നീക്കുകയും ഭൂനികുതി സ്വീകരിക്കാനുള്ള നടപടികൾ സർക്കാർ സ്വീകരിച്ചിരിക്കുന്നതും. ഈ ഭൂമി മറ്റൊരാൾക്ക് നിയമാനുസൃതം കൈമാറ്റം ചെയ്യപ്പെട്ടാൽ മാത്രമെ ഇനിയൊരു പൊക്കുവരവിന്റെ ആവശ്യം വരുന്നുള്ളു.

നികുതി സ്വീകരിക്കപ്പെടുന്നതോടെ ഭൂമിയിൽ മേലുള്ള റവന്യൂ അവകാശം അംഗീകരിക്കപ്പെട്ടിരിക്കുകയാണ്.
വഖഫ് ട്രിബൂണലിന്റെയും ഹൈക്കോടതിയുടെയും പരിഗണനയിലിരിക്കുന്ന കേസുകളിലും സുപ്രീം കോടതി പരിഗണിക്കുന്ന കേസിലും തീർപ്പുകൾ ഉണ്ടായാലെ ഭൂമി കൈമാറ്റം ചെയ്യുന്നതിനുള്ള അവകാശം മുനമ്പം നിവാസികൾക്ക് ലഭ്യമാകുകയുള്ളു. അതിനായുള്ള ശ്രമങ്ങൾ മുനമ്പം ജനത ഒരുമിച്ച് തുടരേണ്ടിയിരിക്കുന്നു.

ഐതിഹാസികമായ അവരുടെ പ്രക്ഷോഭത്തിന്റെ ആദ്യഘട്ടം മുതൽ കെആർഎൽസിസിയും കെഎൽസിഎയും മറ്റ് അല്മായസംഘടനകളും ആവശ്യമായ പിന്തുണ മുനമ്പം ഭൂസംരക്ഷണ സമിതിക്ക് നല്കിയിരുന്നു. തുടർന്നും അവരുടെ പ്രക്ഷോഭം അന്തിമ വിജയം നേടുന്നതുവരെ തുടരുമെന്ന് രാഷ്ട്രീയ കാര്യസമിതി കൺവീനർ ജോസഫ് ജൂഡ് അറിയിച്ചു.

മന്ത്രി പി രാജീവ് ഞായറാഴ്ച ഉച്ചയ്ക്ക് 2.30 ന് സമരപ്പന്തലിലെത്തി നാരങ്ങ നീരു നൽകി നിരാഹാര സമരം അവസാനിപ്പിക്കും.

വൈപ്പിൻ എംഎൽഎ കെ എൻ ഉണ്ണികൃഷ്ണൻ മന്ത്രിയെ അനുഗമിക്കും. സ്ഥലം പോക്കുവരവ് ചെയ്യുന്നതിന് തടസ്സമുണ്ടാകില്ലെന്നും ഇതിനായി കുഴുപ്പിള്ളി വില്ലേജിൽ ഹെൽപ്പ് ഡെസ്‌ക് തുറക്കുമെന്നും നിയമമന്ത്രി പി രാജീവ് ഉറപ്പ് നൽകിയെന്ന് ഭൂ സംരക്ഷണസമിതി ഭാരവാഹികൾ പറഞ്ഞു. ഇതോടെയാണ് നിരാഹാര സമരം അവസാനിപ്പിക്കാൻ തീരുമാനിച്ചത്.

ഞായറാഴ്ചയോടെ സമരം 414-ാം ദിവസമാകും. കഴിഞ്ഞ ദിവസമാണ് മുനമ്പത്ത് താമസിക്കുന്നവരുടെ ഭൂനികുതി സ്വീകരിക്കാൻ സംസ്ഥാന സർക്കാരിന് ഹൈക്കോടതി അനുമതി നൽകിയത്. വെള്ളിയാഴ്ച ചേർന്ന ഭൂസംരക്ഷണ സമിതിയുടെ കോർ കമ്മിറ്റി യോഗത്തിൽ ഫാ. ആന്റണി സേവ്യർ തറയിൽ, ജോസഫ് റോക്കി പാലക്കൽ, ജോസഫ് ബെന്നി കുറുപ്പശേരി, മുരുകൻ കാതികുളത്ത്, രഘു കടുവങ്കശ്ശേരി, ഉണ്ണി പള്ളത്താംകുളങ്ങര തുടങ്ങിയവർ പങ്കെടുത്തു.