കൊച്ചി: പള്ളുരുത്തി കേന്ദ്രമായി കന്യാസ്ത്രീകളുടെ മേല്‍നോട്ടത്തില്‍ മൂന്നു പതിറ്റാണ്ടായി പ്രവര്‍ത്തിക്കുന്ന സെൻ്റ് റീത്ത പബ്ലിക് സ്കൂൾ മതമൗലികവാദികളുടെ ഭീഷണിയുടെ പശ്ചാത്തലത്തില്‍ താത്ക്കാലികമായി അടച്ചു. സമത്വത്തിൻ്റെ പ്രതീകമായി കണക്കാക്കുന്ന സ്കൂൾ യൂണിഫോമിൽ ഒരു കുട്ടിയ്ക്ക് മാത്രമായി മത വസ്ത്രം വേണം എന്ന രക്ഷിതാക്കളുടെ പിടിവാശിയാണ് മാനേജ്മെന്റിനെ കൊടിയ സമ്മര്‍ദ്ധത്തിലേക്ക് നയിച്ചത്.
അഡ്മിഷന്‍ എടുത്തപ്പോള്‍ തന്നെ എല്ലാ കാര്യങ്ങളും പറഞ്ഞു മനസിലാക്കിയിരിന്നുവെന്നും അത് അംഗീകരിച്ച ശേഷമാണ് അഡ്മിഷന്‍ നല്‍കിയതെന്നും പ്രിന്‍സിപ്പല്‍ സിസ്റ്റര്‍ ഹെലീന ആന്‍സി വ്യക്തമാക്കി.
എന്നാല്‍ ഇത് മറികടന്നാണ് പുതിയ ആവശ്യവുമായി രംഗത്ത് വന്നിരിക്കുന്നത്. സ്കൂളിൻ്റെ ഡ്രസ് കോഡ് തീരുമാനിക്കാനുള്ള അവകാശം മാനേജ്മെൻ്റിനാണെന്ന് 2018 ൽ തന്നെ ഹൈക്കോടതി ഉത്തരവു പ്രകാരം വ്യക്തമാക്കിയിട്ടുള്ളതാണ്.
വിദ്യാഭ്യാസ സ്ഥാപനങ്ങളിലെ യൂണിഫോം എന്നത് കേവലം വസ്ത്രധാരണം മാത്രമല്ല, അത് സമത്വത്തിൻ്റെയും അച്ചടക്കത്തിൻ്റെയും പ്രതീകമാണ്. സാമ്പത്തിക-സാമൂഹിക വ്യത്യാസങ്ങൾ മാറ്റിവെച്ച് എല്ലാ വിദ്യാർത്ഥികളെയും ഒറ്റക്കെട്ടായി നിർത്താൻ ഇത് സഹായിക്കുന്നു. എല്ലാ മത വിഭാഗങ്ങളുടെയും മാനേജ്മെൻ്റിന് കീഴിലുള്ളതുൾപ്പെടെയുള്ള വിദ്യാലയങ്ങൾ അവരുടെ അച്ചടക്കത്തിൻ്റെ ഭാഗമായി ഈ രീതി കർശനമായി പാലിക്കാറുണ്ട്.
2018 ൽ തിരുവനന്തപുരം ക്രൈസ്റ്റ് നഗർ സീനിയർ പബ്ലിക് സ്കൂളിൽ സമാനമായ പ്രശ്നം ഉടലെടുത്തപ്പോൾ കോടതി വിധി സ്കൂളിന് അനുകൂലമായി ആയിരുന്നു. ഒരു പബ്ലിക് ഇൻസ്റ്റിട്യൂഷന്റെ പൊതു നന്മയ്ക്കു വേണ്ടിയുള്ള നിയമം ആ സ്ഥാപനത്തിന്റെ മൗലിക അവകാശം ആണെന്നും അതിന്റെ മുന്നിൽ ഒരു വ്യക്തിയുടെ മതപരമായ അവകാശം മൗലിക അവകാശമായി പരിഗണിക്കാൻ സാധിക്കില്ല എന്നും കോടതി വിധി പ്രസ്ഥാപിച്ചു.
പള്ളുരുത്തി സ്കൂളിന്റെ പിടിഎ എടുത്ത നിലപാടും ശ്രദ്ധേയമാണ്. പിടിഎ യുടെ കുറിപ്പ് ചുവടെ :
വിദ്യാഭ്യാസ സ്ഥാപനങ്ങളിലെ യൂണിഫോം എന്നത് കേവലം വസ്ത്രധാരണം മാത്രമല്ല, അത് സമത്വത്തിൻ്റെയും അച്ചടക്കത്തിൻ്റെയും പ്രതീകമാണ്. സാമ്പത്തിക-സാമൂഹിക വ്യത്യാസങ്ങൾ മാറ്റിവെച്ച് എല്ലാ വിദ്യാർത്ഥികളെയും ഒറ്റക്കെട്ടായി നിർത്താൻ ഇത് സഹായിക്കുന്നു. എല്ലാ മത വിഭാഗങ്ങളുടെയും മാനേജ്മെൻ്റിന് കീഴിലുള്ളതുൾപ്പെടെയുള്ള വിദ്യാലയങ്ങൾ അവരുടെ അച്ചടക്കത്തിൻ്റെ ഭാഗമായി ഈ രീതി കർശനമായി പാലിക്കാറുണ്ട്.
ചോദ്യം ചെയ്യപ്പെടുന്ന ഉദ്ദേശ്യശുദ്ധി-
സമയബന്ധിതമായ മാറ്റം: സ്കൂളിൽ പ്രവേശനം നേടുന്ന സമയത്ത് സ്ഥാപനത്തിൻ്റെ എല്ലാ നിയമങ്ങളും വിദ്യാർത്ഥിയും രക്ഷിതാവും അംഗീകരിച്ചിരിക്കണം. പഠനവർഷം പകുതിയാകുമ്പോഴോ അതിന് ശേഷമോ ഉണ്ടാകുന്ന ഈ “പെട്ടെന്നുള്ള” ആവശ്യം, വ്യക്തിപരമായ വിശ്വാസപരമായ ബോധ്യം മുൻപ് ഇല്ലാതിരുന്നത് എന്തുകൊണ്ടാണെന്നോ, അതോ പുറത്തുനിന്നുള്ള സ്വാധീനം ഇതിനുപിന്നിൽ ഉണ്ടോയെന്നോ സംശയിക്കാൻ ഇടനൽകുന്നു.-
സ്ഥാപനപരമായ നിയമങ്ങൾ:
സ്കൂളിൻ്റെ അച്ചടക്കപരമായ അന്തരീക്ഷം നിലനിർത്തുന്നതിൽ യൂണിഫോം വലിയ പങ്ക് വഹിക്കുന്നു. ഏതെങ്കിലും ഒരു ഘട്ടത്തിൽ ഒരു വിദ്യാർത്ഥിക്ക് മാത്രം ഇളവ് അനുവദിച്ചാൽ, അത് മറ്റ് വിദ്യാർത്ഥികൾക്കും മറ്റ് ആവശ്യങ്ങൾ ഉന്നയിക്കാൻ പ്രേരണ നൽകുകയും, സ്കൂളിൻ്റെ പൊതുവായ അച്ചടക്ക സംവിധാനം തകരാറിലാകുകയും ചെയ്യും.-
വിശ്വാസപരമായ സ്വാതന്ത്ര്യവും സ്ഥാപനപരമായ ചിട്ടയും:
ഭരണഘടനാപരമായ മതസ്വാതന്ത്ര്യം നിലനിൽക്കുമ്പോൾ തന്നെ, വിദ്യാഭ്യാസ സ്ഥാപനങ്ങളിൽ അച്ചടക്കവും യൂണിഫോമിറ്റിയും ഉറപ്പാക്കാൻ ന്യായമായ നിയന്ത്രണങ്ങൾ ഏർപ്പെടുത്താൻ മാനേജ്മെൻ്റിന് അവകാശമുണ്ട്. ഈ ആവശ്യം വ്യക്തിയുടെ വിശ്വാസപരമായ സ്വാതന്ത്ര്യത്തെയാണോ അതോ സ്ഥാപിത നിയമങ്ങളോടുള്ള വെല്ലുവിളിയെയാണോ പ്രതിനിധീകരിക്കുന്നത് എന്ന് വ്യക്തമാക്കേണ്ടതുണ്ട്.
സ്കൂളിൽ ഒരുമിച്ചിരുന്ന് പഠിക്കുന്ന എല്ലാ കുട്ടികൾക്കും ഒരുപോലെ ബാധകമാകുന്ന യൂണിഫോം നിയമം പാലിക്കുന്നതിൽ വീഴ്ച വരുത്തുമ്പോൾ, അതിൻ്റെ ഉദ്ദേശ്യശുദ്ധി സ്ഥാപനത്തിൻ്റെ അച്ചടക്കത്തിന് മുൻഗണന നൽകുന്നവരുടെ ഭാഗത്തുനിന്ന് ചോദ്യം ചെയ്യപ്പെടുന്നത് സ്വാഭാവികമാണ്.
ഈ വിഷയം, വിശ്വാസം, നിയമം, വിദ്യാഭ്യാസം എന്നീ മൂന്ന് ഘടകങ്ങളെ സന്തുലിതമായി സംരക്ഷിക്കേണ്ടതിൻ്റെ പ്രാധാന്യം അടിവരയിടുന്നു.
(ജോഷി കൈതവളപ്പിൽ, പ്രസിഡൻറ്, പിടിഎ, സെൻ്റ് .റീത്താസ് പബ്ലിക് സ്കൂൾ. പള്ളുരുത്തി)
