മനാഗ്വ: ലാറ്റിൻ അമേരിക്കൻ രാജ്യമായ നിക്കരാഗ്വേയിലെ ഏകാധിപത്യ ഭരണകൂടത്തിന്റെ കത്തോലിക്ക വിരുദ്ധത ഒരിടവേളയ്ക്കു ശേഷം വീണ്ടും തുടർക്കഥയാകുന്നു. കുട്ടികൾ താമസിച്ചു പഠിച്ചിരുന്ന വിശുദ്ധ യൗസേപ്പിതാവിൻറെ സന്ന്യാസിനി സമൂഹത്തിൻറെ പേരിലുള്ള കെട്ടിടം സർക്കാർ പിടിച്ചെടുത്തു. 1915 മുതൽ പ്രവർത്തന നിരതമായി സജീവമായി സേവനം ചെയ്യുന്ന ജോസഫൈൻ സന്യാസിനി സമൂഹത്തിന്റെ കീഴിലുള്ള കോളേജാണ് പിടിച്ചെടുത്തിരിക്കുന്നത്.
2018 മുതൽ, പ്രസിഡന്റ് ഡാനിയേൽ ഒർട്ടേഗയുടെ നേതൃത്വത്തിൽ ഉള്ള സ്വേശ്ചാധിപത്യ ഭരണമാണ് നിക്കരാഗ്വേയിൽ നിലവിൽ ullathu. സാൻഡിനിസ്റ്റ സർക്കാരിന്റെ രാഷ്ട്രീയ എതിരാളികളെ നിശബ്ദരാക്കുകയോ ജയിലിലടയ്ക്കുകയോ നാടുകടത്തുകയോ പൗരത്വം നഷ്ടപ്പെടുത്തുകയോ ചെയ്യുന്നു, അതേസമയം ലക്ഷക്കണക്കിന് നിക്കരാഗ്വക്കാർ രാജ്യം വിട്ട് പലായനം ചെയ്തിട്ടുമുണ്ട്.
കത്തോലിക്കരും പ്രത്യേകിച്ച് പുരോഹിതന്മാരും ഭരണകൂടത്തിന്റെ പ്രധാന ലക്ഷ്യമായി മാറിയിരിക്കുന്നു. ലോകമെമ്പാടുമുള്ള മതസ്വാതന്ത്ര്യത്തെ സംരക്ഷിക്കുന്നതിനും പ്രോത്സാഹിപ്പിക്കുന്നതിനുമായി 25 വർഷത്തിലേറെയായി അന്താരാഷ്ട്ര സ്ഥാപനങ്ങളുമായി സഹകരിച്ച് പ്രവർത്തിക്കുന്ന യൂറോപ്യൻ സെന്റർ ഫോർ ലോ ആൻഡ് ജസ്റ്റിസ് (ECLJ), നിക്കരാഗ്വയിലെ ക്രിസ്ത്യാനികൾക്കെതിരായ പീഡനത്തെ അപലപിച്ചുകൊണ്ട് ഒരു റിപ്പോർട്ട് പ്രസിദ്ധീകരിക്കുകയുണ്ടായി.
2018 മുതൽ കത്തോലിക്കാ സഭയ്‌ക്കെതിരായ 870-ലധികം ആക്രമണങ്ങൾ രേഖപ്പെടുത്തിയിട്ടുണ്ട്. ശാരീരിക ആക്രമണങ്ങൾ, ആരാധനാലയങ്ങൾ നിർബന്ധിതമായി അടച്ചുപൂട്ടൽ, പുരോഹിതന്മാരെ ഏകപക്ഷീയമായി തടങ്കലിൽ വയ്ക്കൽ, മതപരമായ സ്വത്തുക്കൾ കണ്ടുകെട്ടൽ എന്നിവ ഇതിൽ ഉൾപ്പെടുന്നു.
മറ്റഗൽപ ബിഷപ്പായ മോൺസിഞ്ഞോർ റോളാൻഡോ അൽവാരെസിന്റെ കേസ് ഭരണകൂടത്തിന്റെ ക്രിസ്ത്യൻ വിരുദ്ധത വ്യക്തമാക്കുന്നു. 2022 ഓഗസ്റ്റിൽ ജയിലിലടയ്ക്കപ്പെട്ട അദ്ദേഹത്തെ നാടുകടത്താൻ വിസമ്മതിച്ചതിനെത്തുടർന്ന് 26 വർഷം തടവിന് ശിക്ഷിച്ചു. 2024 ജനുവരിയിൽ മോചിപ്പിക്കപ്പെട്ട അദ്ദേഹത്തിനു പൗരത്വം നഷ്ടപ്പെടുത്തി, 17 മാസത്തെ തടങ്കലിൽ വയ്ക്കലിന് ശേഷം വത്തിക്കാനിലേക്ക് നാടുകടത്തി. അടിച്ചമർത്തലിനെതിരായ ക്രിസ്തീയ പ്രതിരോധത്തിന്റെ നേർ സാക്ഷ്യമായി അദ്ദേഹം തുടരുന്നു. 245-ലധികം പുരോഹിതന്മാരെ ഇതിനകം നാടുകടത്തിയിട്ടുണ്ട്, മറ്റുള്ളവരെ ഏകപക്ഷീയമായി ജയിലിൽ അടച്ചിരിക്കുന്നു, വിശ്വാസികൾക്ക് അവരുടെ വൈദികരെ നഷ്ടപ്പെടുത്തുന്നു.
ശാരീരിക അക്രമത്തിന് പുറമേ, ഒർട്ടേഗയുടെ ഭരണകൂടം ഒരു സാംസ്കാരികവും ആത്മീയവുമായ യുദ്ധം നടത്തുകയാണ്. 2023 ഓഗസ്റ്റിൽ, ജെസ്യൂട്ട് നടത്തുന്ന മധ്യ അമേരിക്ക സർവകലാശാലയും സാന്താ മരിയ ഡി ലാ പാസ് ആശ്രമവും സർക്കാർ കണ്ടുകെട്ടി. വിശുദ്ധവാര ഘോഷയാത്രകൾ പോലുള്ള മതപരമായ പരിപാടികൾ വൻതോതിൽ നിരോധിച്ചു. 2022 നും 2024 നും ഇടയിൽ, 5,000 ത്തിലധികം ഘോഷയാത്രകൾ അധികാരികൾ റദ്ദാക്കി. ഇത് രാജ്യത്തു നിന്ന് ക്രിസ്ത്യൻ പാരമ്പര്യങ്ങൾ തുടച്ചുനീക്കാനുള്ള സർക്കാരിന്റെ ദൃഢനിശ്ചയത്തെ വ്യക്തമാക്കുന്നു.
