ലണ്ടൻ: യേശുവിലും മാതാവിലുമുള്ള തന്റെ വിശ്വാസം പരസ്യമായി പ്രഘോഷിച്ച് ലോക ഹെവിവെയ്റ്റ് ബോക്സിങ് ചാമ്പ്യൻ ഒലെക്സാണ്ടർ ഉസൈക്ക്. ലണ്ടനിൽ നടന്ന ബോക്സിങ് ഹെവിവെയ്റ്റ് ചാമ്പ്യൻഷിപ്പിൽ വിജയ കിരീടം ചൂടിയതിന് പിന്നാലെയാണ് യേശു ക്രിസ്തു എന്റെ ജീവനാണ് പരിശുദ്ധ കന്യകാ മറിയം എന്റെ അമ്മയും എന്ന് ഉക്രെയ്ൻ സ്വദേശിയായ ഒലെക്സാണ്ടർ ഉസൈക്ക് പറഞ്ഞത്.
ബോക്സിങിലെ നേട്ടങ്ങളൊക്കെ താൽക്കാലികമാണെന്നും എന്നാൽ യഥാർത്ഥ ഭാവി സ്വർഗത്തിലാണെന്നും അദേഹം പറഞ്ഞു. എല്ലാ ദിവസവും രാവിലെയും രാത്രിയും പ്രാർത്ഥിക്കാറുണ്ടെന്നും സഭയുടെ പാരമ്പര്യമനുസരിച്ചുള്ള ഉപവാസം അനുഷ്ഠിക്കാറുണ്ടെന്നും ഉസൈക്ക് കൂട്ടിച്ചേർത്തു.
ഉസൈക്കിന് ഇതുവരെ സ്വന്തമാക്കാൻ സാധിക്കാതിരുന്ന ഏക ചാമ്പ്യൻഷിപ്പായ ഐബിഎഫ് ബെൽറ്റ് കൂടെ സ്വന്തമാക്കിയതോടെ ബോക്സിങിലെ കായിക ഇതിഹാസം എന്ന നിലയിൽ അദ്ദേഹത്തിന്റെ പദവി സ്ഥിരീകരിക്കപ്പെട്ടിരിക്കുകയാണ്. വിവാഹിതനും നാല് കുട്ടികളുടെ പിതാവുമായ ഉസൈക്ക് പൗരസ്ത്യ ഓർത്തഡോക്സ് സഭാ വിശ്വാസിയാണ്.
