റോം: റോമിലെ സാന്താ മരിയ മജ്ജോരെ പേപ്പല്‍ ബസിലിക്കയില്‍ നാളെ ഫ്രാന്‍സിസ് പാപ്പായെ അടക്കം ചെയ്യുന്ന കല്ലറ നിര്‍മിച്ചിരിക്കുന്നത് ഇറ്റലിയിലെ വടക്കുപടിഞ്ഞാറന്‍ മേഖലയിലെ ലിഗൂറിയയില്‍, അദ്ദേഹത്തിന്റെ അമ്മ റെജീനാ മരിയയുടെ മുത്തച്ഛന്‍ വിന്‍ചെന്‍സോ സീവൊറിയുടെ നാട്ടില്‍ നിന്നുള്ള വെണ്ണക്കല്ലുകൊണ്ടാണ്.
ഫ്രഞ്ച് അതിര്‍ത്തിക്കടുത്തുള്ള പീമോന്തെയുടെ താഴ് വാരത്ത്, ജനോവ നഗരത്തിനടുത്തായുള്ള ലിഗൂറിയായില്‍ തന്റെ പ്രപിതാമഹന്റെ ജന്മസ്ഥലത്തെ മലയില്‍ നിന്നുള്ള കല്ലാണ് തന്റെ കല്ലറ പണിയാനായി ഉപയോഗിക്കേണ്ടതെന്ന് പാപ്പാ നിര്‍ദേശിച്ചിരുന്നതായി സെന്റ് മേരി മേജര്‍ ബസിലിക്കയിലെ കോ-ആര്‍ച്ച്പ്രീസ്റ്റ് കര്‍ദിനാള്‍ റൊളാന്‍ഡസ് മക്രിക്കാസ് ടെലിവിഷന്‍ അഭിമുഖത്തില്‍ പറഞ്ഞു.
‘ഫ്രാന്‍ചിസ്‌കുസ്’ (ഫ്രാന്‍സിസിന്റെ ലത്തീന്‍ രൂപം, പാപ്പായുടെ കൈയൊപ്പും ഇതായിരുന്നു) എന്നുമാത്രം എഴുതി, പാപ്പായുടെ കുരിശുമാലയിലെ കുരിശിന്റെ പ്രതിരൂപവും മാത്രമാണ് കബറിടത്തിലെ ശിലാഫലകത്തില്‍ രേഖപ്പെടുത്തിയിട്ടുള്ളത്.
പാപ്പായുടെ അമ്മയുടെ മുത്തച്ഛന്‍ വിന്‍ചെന്‍സോ സീവൊറി 1800കളില്‍ ജനോവയില്‍ നിന്ന് മെഡിറ്ററേനിയന്‍ കടലിന്റെ ഭാഗമായ ലിഗൂറിയന്‍ കടലും അറ്റ്‌ലാന്റിക് സമുദ്രവും കടന്ന് കപ്പലില്‍ അര്‍ജന്റീനയിലേക്കു കുടിയേറിയതാണ്. ഫ്രാന്‍സിസ് പാപ്പായുടെ അമ്മ റെജീന മരിയ ജനിച്ചത് അര്‍ജന്റീനയിലാണ്. വിന്‍ചെന്‍സോ സീവൊറിയുടെ ഒരു സ്മാരകശില ലിഗൂറിയായിലെ കൊഗോര്‍നോ പട്ടണത്തിലുണ്ട്. ചാരയും പച്ചയും നീലയും ഇടകലര്‍ന്ന ‘രൂപാന്തരപ്പെടുന്ന പാറയുടെ’ ഒരു പാളിയാണത്. ഇതേ മാര്‍ബിളാണ് പാപ്പായുടെ കല്ലറയിലും ഉപയോഗിച്ചിരിക്കുന്നത്.
തന്റെ മുതുമുത്തച്ഛന്റെ ജന്മസ്ഥലത്തു നിന്നുള്ള മാര്‍ബിള്‍ ശില ഫ്രാന്‍സിസ് പാപ്പാ ആവശ്യപ്പെട്ടതറിഞ്ഞ് കൊഗോര്‍നോയിലെ വനിതാ മേയര്‍ എന്‍ റിക്ക സൊമറീവ അദ്ഭുതപ്പെട്ടു. പാപ്പായുടെ കസിന്‍ എണ്‍പത്തേഴുകാരിയായ ആഞ്ജല സീവൊറിയും അവരുടെ മകള്‍ ക്രിസ്റ്റീനയും കൊഗോര്‍നോയിലുണ്ട്. 2017 മേയില്‍ ജനോവയില്‍ വച്ച് പാപ്പാ സീവോറി കുടുംബാംഗങ്ങളുമായി കൂടിക്കാഴ്ച നടത്തിയിരുന്നു.
”സാധാരണക്കാരുടെ വെണ്ണക്കല്ലാണ് പാപ്പായുടെ കല്ലറയ്ക്കായി ആവശ്യപ്പെട്ടിരിക്കുന്നത്, അത് അത്രകണ്ട് കുലീനത്വമുള്ളതൊന്നുമല്ല,” പതിനെട്ട് മാര്‍ബിള്‍ ക്വാറികളുള്ള ലിഗൂറിയന്‍ മല ഉള്‍പ്പെടുന്ന സ്ലേറ്റ് ജില്ലയുടെ പ്രസിഡന്റ് ഫ്രാങ്കാ ഗര്‍ബൈനോ പറയുന്നു. സെന്റ് മേരി മേജര്‍ ബസിലിക്കയിലേക്കുള്ള മാര്‍ബിള്‍ പാളികള്‍ ഒരുക്കിയത് ലിഗൂറിയന്‍ മലയിലെ 12 കമ്പനികളിലൊന്നാണ്.
ഇനൊസന്റ് നാലാമന്‍, ഏഡ്രിയന്‍ അഞ്ചാമന്‍ എന്നീ പാപ്പാമാരുമായി ബന്ധപ്പെട്ട കൊഗോര്‍നോയ്ക്ക് ഫ്രാന്‍സിസ് പാപ്പായുമായും ബന്ധമുള്ള കാര്യം നഗരവാസികള്‍ ഇപ്പോള്‍ ആഘോഷിക്കുകയാണ്.
