വത്തിക്കാൻ : ബെൽജിയത്തിലെ ബ്രസല്സിലുള്ള കത്തീഡ്രൽ ദേവാലയത്തിന്റെ എണ്ണൂറാം വാർഷികാഘോഷങ്ങൾക്കുള്ള പൊന്തിഫിക്കൽ പ്രതിനിധിയായി വത്തിക്കാൻ സ്റ്റേറ്റ് സെക്രെട്ടറി കർദ്ദിനാൾ കർദ്ദിനാൾ പിയെത്രോ പരൊളീൻ നിയമിക്കപ്പെട്ടുവെന്ന് പരിശുദ്ധ സിംഹാസനം വ്യക്തമാക്കി.
2026 ജനുവരി 11-നായിരിക്കും കത്തീഡ്രലിന്റെ എണ്ണൂറാം സ്ഥാപനവർഷിക ആഘോഷങ്ങൾ നടക്കുക. ആന്നേ ദിവസം മലിനെസ്-ബ്രസ്സൽസ് അതിരൂപതാദ്ധ്യക്ഷൻ ആർച്ച്ബിഷപ് ല്യൂക്ക് തേർലിൻഡന്റെ മുഖ്യ കാർമ്മികത്വത്തിൽ അർപ്പിക്കപ്പെടുന്ന വിശുദ്ധ ബലിയിൽ കർദ്ദിനാൾ പരൊളീനും സംബന്ധിക്കും.
ബെൽജിയത്തെ രാജകുടുംബവും, എല്ലാ മെത്രാന്മാരും ചടങ്ങുകളിൽ സംബന്ധിക്കുമെന്നാണ് കരുതപ്പെടുന്നത്. ജനുവരി 11-ന് നടക്കുന്ന ചടങ്ങുകൾക്ക് പുറമെ, വർഷം മുഴുവൻ, സംഗീതക്കച്ചേരികളും, കോൺഫറൻസുകളും, കത്തീഡ്രലിന്റെ ചരിത്രം വ്യക്തമാക്കുന്ന കാലപ്രദർശനവും തുടങ്ങി, വിവിധ നിരവധി സാംസ്കാരിക, ആധ്യാത്മിക ചടങ്ങുകൾ ഈ വാർഷികവുമായി ബന്ധപ്പെട്ട് ഒരുക്കിയിട്ടുണ്ട്.
ബർബാന്തെയുടെ ഡ്യൂക്ക് ആയിരുന്ന എൻറിക്കോ രണ്ടാമന്റെ തീരുമാനപ്രകാരം, 1226-ലാണ് ഈ കത്തീഡ്രൽ ദേവാലയം പണിചെയ്യപ്പെട്ടത്. വിശുദ്ധ മൈക്കിൾ, വിശുദ്ധ ഗുദുല എന്നിവർക്കാണ് ഈ ദേവാലയം സമർപ്പിക്കപ്പെട്ടിരിക്കുന്നത്.
