കൊച്ചി: ക്രിസ്മസ്- പുതുവത്സര കച്ചവടത്തിൽ റെക്കോര്ഡ് വില്പ്പന നേടി സപ്ലൈകോ. ഡിസംബര് 22 മുതല് ജനുവരി ഒന്നുവരെയുള്ള 10 ദിവസം 36.06 കോടി രൂപയുടെ സബ്സിഡി സാധനങ്ങളുള്പ്പെടെ 82 കോടി രൂപയാണ് ആകെ വിറ്റുവരവുണ്ടായത്. പെട്രോള് പമ്പുകളിലെയും റീട്ടെയില് ഉള്പ്പെടെയുള്ള സപ്ലൈകോ വില്പ്പനശാലകളിലെയും ആറ് ജില്ലകളിലെ പ്രത്യേക ഫെയറുകളിലെയും വിറ്റുവരവാണിത്.
തിരുവനന്തപുരം പുത്തരിക്കണ്ടം നായനാര് പാര്ക്ക്, എറണാകുളം മറൈന്ഡ്രൈവ്, കൊല്ലം ആശ്രാമം മൈതാനം, കോട്ടയം തിരുനക്കര മൈതാനം, പത്തനംതിട്ട റോസ് മൗണ്ട് ഓഡിറ്റോറിയം, തൃശൂര് തേക്കിന്കാട് മൈതാനം എന്നിവിടങ്ങളിലായിരുന്നു പ്രത്യേക ഫെയറുകള്. ബ്രാന്ഡഡ് നിത്യോപയോഗ സാധനങ്ങള്ക്ക് അഞ്ച് മുതല് 50 ശതമാനംവരെ വിലക്കുറവിലായിരുന്നു വില്പ്പന.
