ഷാജി ജോര്‍ജ്
299 അംഗങ്ങളാണ് ഇന്ത്യയുടെ ഭരണഘടന നിര്‍മ്മാണ സഭയില്‍ ഉണ്ടായിരുന്നത്. അതില്‍ ഒരു കത്തോലിക്ക വൈദികനും അംഗമായിരുന്നു; ഫാ. ജെറോം ഡിസൂസ. ഇന്ത്യയിലെ ആദിവാസികള്‍ക്കു നീതി ലഭിക്കാന്‍ നിലപാടെടുത്തതിന്റെ പേരില്‍ ഭരണാധികാരികള്‍ ജയിലില്‍ അടയ്ക്കുകയും തുടര്‍ന്ന് മരണമടയുകയും ചെയ്ത ഫാദര്‍ സ്റ്റാന്‍സ്വാമി അംഗമായിരുന്ന ഈശോസഭയിലെ അംഗം തന്നെയായിരുന്നു ഫാ. ജെറോം ഡിസൂസയും. ചിന്തകനും വിദ്യഭ്യാസവിചക്ഷണനും രാഷ്ട്രതന്ത്രജ്ഞനുമായിരുന്ന അദ്ദേഹത്തിന്റെ എഴുത്തും ജീവിതവും സമാഹരിച്ച് ഈശോസഭയുടെ സുവര്‍ണ്ണ ജൂബിലി വര്‍ഷത്തില്‍ 1972ല്‍ സ്പീച്ചസ് ആന്‍ഡ് റൈറ്റിങ്‌സ് ഓഫ് റവ. ഫാ. ജെറോം ഡിസൂസ എസ്.ജെ എന്ന ഗ്രന്ഥം പ്രസിദ്ധീകരിച്ചിട്ടുണ്ട്. പുസ്തകത്തെ കുറിച്ചല്ല എഴുത്തുകാരനെക്കുറിച്ചാണ് ഈ കുറിപ്പ്.
1897 ഓഗസ്റ്റ് 6-ന് മംഗലാപുരത്തിനടുത്ത് മുല്‍ക്കിയില്‍ ഫാദര്‍ ജെറോം ഡിസൂസ ജനിച്ചു. ജെറോം കുട്ടികളില്‍ ഏറ്റവും ജാഗ്രതയും ബുദ്ധിയുള്ളവനുമായിരുന്നു. സ്‌കൂളില്‍, അദ്ദേഹം പഠനകാര്യങ്ങളില്‍ ഒന്നാമനായിരുന്നില്ലെങ്കിലും, വളരെ ബുദ്ധിമാനും വലിയ വായനക്കാരനുമായിരുന്നു. കര്‍ശനമായ അച്ചടക്കത്തോട് അദ്ദേഹത്തിന് ശക്തമായ വെറുപ്പുണ്ടായിരുന്നു, അദ്ദേഹത്തിന്റെ രീതികളും പെരുമാറ്റവും പ്രവചനാതീതമായിരുന്നു. ബാലനായ ജെറോം എപ്പോഴും വികൃതിക്കും സാഹസത്തിനും തയ്യാറായിരുന്നു. അസാധാരണമാംവിധം സജീവവും സൗഹൃദപരവുമായിരുന്നു, ഒപ്പം സുഹൃത്തുക്കളെ ഉണ്ടാക്കാനുള്ള ശ്രദ്ധേയമായ കഴിവും അദ്ദേഹത്തിനുണ്ടായിരുന്നു. ഈ ഗുണങ്ങളെല്ലാം അദ്ദേഹത്തെ ഒരു നേതാവും എല്ലാവര്‍ക്കും പ്രിയങ്കരനുമാക്കി.
ജെറോമിന് ഭാഷകളില്‍ വലിയ അഭിരുചി ഉണ്ടായിരുന്നു. ചെറുപ്പത്തില്‍ കൊങ്കണി, മറാത്തി, തുളു, ഹിന്ദി, ഉറുദു, കന്നഡ, ഇംഗ്ലീഷ് എന്നീ ഏഴ് ഭാഷകള്‍ സംസാരിക്കാന്‍ അദ്ദേഹത്തിന് അറിയാമായിരുന്നു. പിന്നീട് തമിഴും നിരവധി യൂറോപ്യന്‍ ഭാഷകളും പഠിച്ചു. ഇംഗ്ലീഷ് കൂടാതെ, ഫ്രഞ്ച്, സ്പാനിഷ്, ഇറ്റാലിയന്‍, ജര്‍മ്മന്‍ ഭാഷകളിലുള്ള അദ്ദേഹത്തിന്റെ പ്രാവീണ്യം അദ്ദേഹത്തിന് നിരവധി വാതിലുകള്‍ തുറക്കുകയും ലോകത്തിന്റെ വിവിധ ഭാഗങ്ങളില്‍ ഇന്ത്യന്‍ സംസ്‌കാരം, ചരിത്രം, രാഷ്ട്രീയം എന്നിവയെക്കുറിച്ച് പ്രഭാഷണങ്ങളും സെമിനാറുകളും നടത്താന്‍ അദ്ദേഹത്തെ പലപ്പോഴും ക്ഷണിക്കുകയും ചെയ്തു.
ജെറോം ഡിസൂസ നാട്ടിലെ സ്‌കൂളില്‍ പഠനം പൂര്‍ത്തിയാക്കിയ ശേഷം സെക്കണ്ടറി സ്‌കൂള്‍ വിദ്യാഭ്യാസത്തിനായി മംഗലാപുരത്തെ സെന്റ് അലോഷ്യസ് കോളജിലേക്ക് പോയി. അവിടെ നിന്ന് തിരുച്ചിറപ്പള്ളിയിലെ സെന്റ് ജോസഫിലേക്കും ഒടുവില്‍ മദ്രാസിലെ (ഇപ്പോള്‍ ചെന്നൈ) പ്രസിഡന്‍സി കോളജിലും ചേര്‍ന്നു, അവിടെ ഇംഗ്ലീഷ് സാഹിത്യത്തില്‍ ഒന്നാം ക്ലാസോടെ ബിഎ (ഓണേഴ്‌സ്) പൂര്‍ത്തിയാക്കി. ബിരുദപഠനത്തിനു ശേഷം അദ്ദേഹം സെന്റ് ജോസഫില്‍ ലക്ചററായി. കോളജിലെ പുരോഹിതരുടെ മാതൃക, അദ്ദേഹത്തെ സന്ന്യാസജീവിതത്തിന് പ്രചോദിപ്പിച്ചു.
അത് പ്രബലപ്പെടുകയും ഉറച്ച തീരുമാനത്തോടെ സന്ന്യാസജീവിതം തിരഞ്ഞെടുക്കുകയും ചെയ്തു. 1921 മെയ് 27 ന് സൊസൈറ്റി ഓഫ് ജീസസ് (ഈശോ സഭ) നോവിഷ്യേറ്റില്‍ ചേര്‍ന്നു. നോവിഷ്യേറ്റ് അദ്ദേഹത്തിന് എളുപ്പമായിരുന്നില്ല. പ്രലോഭനങ്ങളോടും വിഷാദത്തോടും അദ്ദേഹം പോരാടി.
1926-ല്‍ ജെറോം തന്റെ നോവിഷ്യറ്റ് പൂര്‍ത്തിയാക്കി. തുടര്‍ന്ന് ദൈവശാസ്ത്ര പഠനത്തിനായി ബെല്‍ജിയത്തിലേക്ക് യാത്രയായി. നാലു വര്‍ഷത്തെ ദൈവശാസ്ത്ര പഠനം പൂര്‍ത്തിയാക്കി 1931 ഓഗസ്റ്റ് 30-ന് അദ്ദേഹം വൈദികനായി അഭിഷിക്തനായി.1933-ല്‍ തിരുച്ചിറപ്പള്ളിയിലെ സെന്റ് ജോസഫ് കോളജില്‍ പ്രൊഫസറായി ഫാ. ജെറോം ഡിസൂസ നിയമിതനായി. ഒരു വര്‍ഷം പിന്നിട്ടപ്പോള്‍ അദ്ദേഹം അതിന്റെ പ്രിന്‍സിപ്പലായി നിയമിക്കപ്പെട്ടു. സി രാജഗോപാലാചാരി, ജവഹര്‍ലാല്‍ നെഹ്റു തുടങ്ങിയ രാഷ്ട്രീയ വ്യക്തിത്വങ്ങളുമായി ഫാ. ജെറോമിന്റെ ബന്ധത്തിന്റെ തുടക്കം ഈ കാലഘട്ടത്തിലാണ്.
1938 ഏപ്രിലില്‍ ഫാ.ജെറോം ഡിസൂസയെ കോളജിന്റെ റെക്ടറായി തിരഞ്ഞെടുത്തു. അഗാധമായ പാണ്ഡിത്യവും, ഭരണപരമായ മിടുക്കും, മാനുഷിക സ്വഭാവത്തെക്കുറിച്ചുള്ള ആഴത്തിലുള്ള ഉള്‍ക്കാഴ്ചയും, സഹാനുഭൂതിയും, ധീരമായ കാഴ്ചപ്പാടും, ചാലകശക്തിയും ഉള്ള ആളാണെന്ന് അദ്ദേഹം സ്വയം തെളിയിച്ചു. 1942-ല്‍ ഫാ.ജെറോമിനെ ചെന്നൈയിലെ ലയോള കോളജിലേക്ക് മാറ്റി. റെക്ടറായും പ്രിന്‍സിപ്പലായും അദ്ദേഹം ചുമതലയേറ്റു, ഇത്തരമൊരു ഉത്തരവാദിത്തം ലഭിച്ച ആദ്യത്തെ ഇന്ത്യക്കാരനാണ്. ലയോളയിലെ നിരവധി ചുമതലകള്‍ കൂടാതെ, പൊതുകാര്യങ്ങളിലും അദ്ദേഹം എര്‍പ്പെട്ടു. ഫാ.ജെറോം യുദ്ധാനന്തര പുനര്‍നിര്‍മ്മാണ സമിതിയില്‍ അംഗമായി, പ്രത്യേകിച്ച് വിദ്യാഭ്യാസത്തിന്റെ ആസൂത്രണത്തില്‍. 1946-ല്‍ മദ്രാസ് സര്‍വ്വകലാശാല അദ്ദേഹത്തെ ദശാംശ പരിശോധനാസമിതിയില്‍ നിയമിച്ചു.
തുടര്‍ന്ന് ഇന്ത്യന്‍ ഭരണഘടന രൂപീകരിക്കേണ്ട ഭരണഘടനാ നിര്‍മ്മാണ സഭയില്‍ ഫാ. ജെറോം അംഗമായി. അന്നത്തെ ഇന്ത്യന്‍ നാഷണല്‍ കോണ്‍ഗ്രസിന്റെ പ്രസിഡന്റായിരുന്ന രാജഗോപാലാചാരി അദ്ദേഹത്തിന്റെ പേര് മദ്രാസ് നിയമസഭയിലേക്ക് നിര്‍ദ്ദേശിക്കുകയും ഇന്ത്യയുടെ കോണ്‍സ്റ്റിറ്റിയൂഷന്‍ അസംബ്ലിയില്‍ മദ്രാസ് പ്രവശ്യയെ പ്രതിനിധീകരിക്കാന്‍ തിരഞ്ഞെടുക്കുകയും ചെയ്തു. അത് അതുല്യമായ ഒരു ദൗത്യമായിരുന്നു. 1946 മുതല്‍ 1949 വരെ അദ്ദേഹം പ്രവര്‍ത്തിച്ചു. ഭരണഘടന രൂപീകരിച്ചയുടന്‍ ഭരണഘടന നിര്‍മ്മാണസഭ, പ്രൊവിന്‍ഷ്യല്‍ പാര്‍ലമെന്റായി തുടര്‍ന്നെങ്കിലും അദ്ദേഹം രാജിവച്ചു.
1947 ജനുവരിയിലെ അസംബ്ലിയുടെ രണ്ടാം സിറ്റിംഗില്‍, ഒരു സംയോജിത രാഷ്ട്രം കെട്ടിപ്പടുക്കുന്നതിനുള്ള അനിവാര്യമായ ആവശ്യകതയ്ക്കൊപ്പം ഒരു ന്യൂനപക്ഷ സമുദായത്തിന്റെ അവകാശങ്ങള്‍ ശ്രദ്ധാപൂര്‍വ്വം സന്തുലിതമാക്കുന്നതിന് ഫാ. ജെറോം ശക്തമായ വാദങ്ങള്‍ ഉയര്‍ത്തി. മൗലികാവകാശ സ്വാതന്ത്ര്യം ഉറപ്പുനല്‍കുന്ന ആര്‍ട്ടിക്കിള്‍ 25 ന്റെ ചര്‍ച്ചയിലും പാസാക്കലിലും അദ്ദേഹം ഒരു പ്രധാന പങ്ക് വഹിച്ചു.
മൗലികാവകാശം, മനസ്സാക്ഷിയുടെ സ്വാതന്ത്ര്യം, സ്വതന്ത്രമായി മതം സ്വീകരിക്കാനും ആചരിക്കാനും പ്രചരിപ്പിക്കാനുമുള്ള അവകാശം, ന്യൂനപക്ഷ അവകാശങ്ങള്‍ തുടങ്ങിയവ ഭരണഘടനയില്‍ ഉള്‍പ്പെടുത്തുന്നതില്‍ അദ്ദേഹം ഒരു പ്രധാന സംഭാവന നല്‍കി. 1949-ല്‍ പ്രധാനമന്ത്രി ജവഹര്‍ലാല്‍ നെഹ്റു, ഐക്യരാഷ്ട്രസഭയുടെ ജനറല്‍ അസംബ്ലിയിലെ ഇന്ത്യന്‍ പ്രതിനിധി സംഘത്തിലെ അഞ്ച് അംഗങ്ങളില്‍ ഒരാളായി ഫാ.ജെറോമിനെ നാമനിര്‍ദ്ദേശം ചെയ്തു.
ഐക്യരാഷ്ട്രസഭയുടെ നാല് സെഷനുകളില്‍ അദ്ദേഹം പങ്കെടുത്തു: ആദ്യത്തേത് 1949-ലും, രണ്ടാമത്തേത് 1951-1952-ലും, മൂന്നാമത്തേത് 1955-ലും നാലാമത്തേത് 1957-ലും. വിദ്യാഭ്യാസ കാര്യങ്ങളില്‍ പലപ്പോഴും അദ്ദേഹത്തോട് കൂടിയാലോചിച്ചിരുന്ന നെഹ്റുവിന്റെ വിശ്വാസവും ആദരവും ഫാ. ജെറോം നേടി.
1951-ല്‍ അദ്ദേഹം സേവ്യര്‍ ബോര്‍ഡ് ഓഫ് ഹയര്‍ എജ്യുക്കേഷന്‍ ഇന്ത്യയില്‍ സ്ഥാപിച്ചു, ഇന്ത്യയിലെ എല്ലാ കത്തോലിക്കാ ഉന്നത വിദ്യാഭ്യാസ സ്ഥാപനങ്ങളുടെയും ഏക സംഘടന. അതിന്റെ ദേശീയ ഓഫീസ് സ്ഥിതി ചെയ്യുന്നത് ബാംഗ്ലൂരിലാണ്. അതേ വര്‍ഷം തന്നെ ഇന്ത്യയിലെ സാമൂഹിക പ്രശ്‌നങ്ങള്‍ പഠിക്കാന്‍ പൂനെയില്‍ ഒരു സോഷ്യല്‍ ഇന്‍സ്റ്റിറ്റ്യൂട്ട് സ്ഥാപിക്കാന്‍ ഫാ. ജനറല്‍ അദ്ദേഹത്തോട് ആവശ്യപ്പെട്ടു. ഗവേഷണത്തിനും സാമൂഹ്യ പ്രവര്‍ത്തന പരിശീലനത്തിനുമായി പൂനെയിലെ സോഷ്യല്‍ ഇന്‍സ്റ്റിറ്റ്യൂട്ട് സ്ഥാപിതമായി.
സാമൂഹിക വിഷയങ്ങള്‍ ചര്‍ച്ച ചെയ്യുന്ന ‘സോഷ്യല്‍ ആക്ഷന്‍’ എന്ന പേരിലുള്ള ജേര്‍ണലും അവിടെ നിന്ന് ആരംഭിച്ചു. ഇപ്പോള്‍ സോഷ്യല്‍ ഇന്‍സ്റ്റിറ്റ്യൂട്ട് ഡല്‍ഹിയിലെ ലോധി റോഡില്‍ പ്രവര്‍ത്തിക്കുന്നു.
1957 ജനുവരിയില്‍, സൊസൈറ്റി ഓഫ് ജീസസിന്റെ 30-ാമത് ജനറല്‍ കോണ്‍ഗ്രിഗേഷന്‍ ഫാ.ജെറോമിനെ ജനറല്‍ അസിസ്റ്റന്‍സ് ഫാദറായി തിരഞ്ഞെടുത്തു. ഏഷ്യന്‍ കാര്യങ്ങളുടെ സുപ്പീരിയര്‍ ജനറലിന്റെ അസിസ്റ്റന്റും ഉപദേശകനുമായി അദ്ദേഹം റോമില്‍ തുടര്‍ന്നു. ഈ നിയമനം 1968 വരെ നീണ്ടുനിന്നു. റോമിലെ അദ്ദേഹത്തിന്റെ ജീവിതത്തിനിടയില്‍ സഭയിലെ മഹത്തായ വ്യക്തികളുമായി സമ്പര്‍ക്കം പുലര്‍ത്തി.
കൂടാതെ സൂക്ഷ്മമായ നയതന്ത്ര ചര്‍ച്ചകളിലും ഏര്‍പ്പെട്ടു. ഇന്ത്യയിലെ ബിഷപ്പുമാരുടെ നിയമനത്തില്‍ പോര്‍ച്ചുഗലിന് അനാവശ്യമായ അഭിപ്രായങ്ങള്‍ നല്‍കിയ പോര്‍ച്ചുഗീസ് പാദ്രവാദോ സമ്പ്രദായം അവസാനിപ്പിക്കാന്‍ അദ്ദേഹം വത്തിക്കാനുമായി ചര്‍ച്ച നടത്തി. ഫ്രഞ്ച് ഗവണ്‍മെന്റുമായുള്ള ചര്‍ച്ചകളിലും അദ്ദേഹം ഏര്‍പ്പെട്ടിരുന്നു. ഫ്രഞ്ച് കൊളോണിയല്‍ സെറ്റില്‍മെന്റുകളായ പോണ്ടിച്ചേരി, ചന്ദനഗര്‍ (ചന്ദര്‍നാഗോര്‍) എന്നിവ സ്വതന്ത്ര ഇന്ത്യയിലേക്ക് സമാധാനപരമായി കൈമാറുന്നതിലേക്ക് ആ ചര്‍ച്ചകള്‍ നയിച്ചു.
വത്തിക്കാന്‍ ഫാ, ജെറോമിനെ സന്ന്യസ്ത സഭകള്‍ക്കായുള്ള എക്ലെസിയാസ്റ്റിക്കല്‍ കമ്മീഷന്‍ അംഗം, വിശ്വാസ തിരുസംഘത്തിന്റെ കണ്‍സള്‍ട്ടന്റ്, പൊന്തിഫിക്കല്‍ മിഷന്‍ കമ്മീഷന്‍ അംഗം എന്നീ ചുമതലകളില്‍ നിയമിച്ചു. ഇത് പരിശുദ്ധ പാപ്പ, കര്‍ദ്ദിനാള്‍മാര്‍, ലോകത്തിലെ വിവിധ രാജ്യങ്ങളില്‍ നിന്നുള്ള മെത്രാന്മാര്‍, സന്യസ്ത സഭകളിലെ ശ്രേഷ്ഠര്‍ എന്നിവരോടൊക്കെ നിരന്തരം ഇടപഴകി ജീവിക്കാന്‍ അദ്ദേഹത്തിന് അവസരം ഒരുക്കി. 1968 ഇന്ത്യയിലേക്ക് മടങ്ങിയെത്തി അദ്ദേഹം എഴുത്തിലും പുസ്തക രചനയിലും മുഴുകി. 1977 ഓഗസ്റ്റ് 12ന് അദ്ദേഹം നിത്യസമ്മാനത്തിനായി വിളിക്കപ്പെട്ടു. പിന്നെ പതിവുപോലെ ലോകം അദ്ദേഹത്തെ മറന്നു.
രണ്ടു പതിറ്റാണ്ടുകള്‍ക്കുശേഷം ഫാ. ജെറോം ഡിസൂസയുടെ ജന്മശതാബ്ദിയില്‍ ഭാരത സര്‍ക്കാര്‍ അദ്ദേഹത്തിന്റെ സ്മരണാര്‍ഥം ഒരു തപാല്‍ സ്റ്റാമ്പ് പുറത്തിറക്കി. ഇപ്പോള്‍ 145 കോടി ജനങ്ങളുടെ ഹൃദയഭൂമിയായ ഇന്ത്യയുടെ ഭരണഘടനയില്‍ ഒപ്പുവെച്ച ഈ വൈദികനെ, ഫാ.ജെറോം ഡിസൂസയെ എങ്ങനെ മറക്കാനാവും.
ആദരപൂര്‍വ്വം തല കുനിക്കുന്നു.
