പ്രഫ. ഷാജി ജോസഫ്
The Promised Land (Denmark/127 minutes/2023)
Director: Nikolaj Arcel
ജര്‍മ്മന്‍ സൈന്യത്തില്‍ 25 വര്‍ഷത്തെ സേവനത്തിന് ശേഷം തുച്ഛമായ പെന്‍ഷനുമായി ഡാനിഷ് ഉദ്യോഗസ്ഥനായ ക്യാപ്റ്റന്‍ ലുഡ്വിഗ് കഹ്ലെന്‍ (മാഡ്‌സ് മിക്കല്‍സെന്‍), തന്റെ ജന്മദേശമായ ഡെന്‍മാര്‍ക്കിലേക്ക് വരുന്നു. വടക്കന്‍ യൂറോപ്പില്‍ ഡെന്മാര്‍ക്കിന്റെയും ജര്‍മ്മനിയുടെയും അതിര്‍ത്തിയിലുള്ള ജുട്ട്‌ലാന്‍ഡ് ഉപദ്വീപില്‍ തീരെ ഫലഭൂയിഷ്ഠമല്ലാതെ തരിശായി കിടക്കുന്ന ഹീത്ത്‌സ് സമതലങ്ങളിലെ ഊഷര ഭൂമിയില്‍ കൃഷിചെയ്യാനും സമ്പന്നമായ ഒരു സമൂഹത്തെ സൃഷ്ടിക്കാനുമാണ് കഹ്ലെന്‍ എത്തുന്നത്. കഠിനമായ ഭൂപ്രകൃതിയും പ്രാദേശികമായ പ്രതിരോധങ്ങളും, രാഷ്ട്രീയ ഗൂഢാലോചനകളും ഉള്‍പ്പെടെയുള്ള ശക്തമായ വെല്ലുവിളികളെ അഭിമുഖീകരിക്കുന്നുണ്ട് എങ്കിലും അക്ഷീണമായ സ്ഥിരോത്സാഹത്തോടെ കഠിനമായ ഭൂപ്രകൃതിയെ അഭിവൃദ്ധി പ്രാപിക്കുന്ന ഒരു വാസസ്ഥലമാക്കി മാറ്റാന്‍ പരിശ്രമിക്കുന്നു അയാള്‍. ഈ ഉദ്യമത്തില്‍ വിജയിക്കാന്‍ കഴിയുമെങ്കില്‍ കുലീനമായ പദവി നല്‍കുമെന്നുള്ള ഡാനിഷ് രാജാവിന്റെ വാഗ്ദാനമാണ് അദ്ദേഹത്തെ മുന്നോട്ട് നയിക്കുന്നത്.
കഹ്ലന്റെ പ്രാരംഭ ശ്രമങ്ങള്‍ക്ക് പ്രാദേശിക ജനങ്ങളില്‍ നിന്നുള്ള സംശയവും ചെറുത്തുനില്‍പ്പും നേരിടേണ്ടിവരുന്നു, പ്രത്യേകിച്ച് ശക്തനായ ഭൂവുടമയായ ഫ്രെഡറിക് ഡി ഷിന്‍കെല്‍ (സൈമണ്‍ ബെന്നെബ്‌ജെര്‍ഗ്) കഹ്ലന്റെ പദ്ധതിയെ സ്വന്തം താല്‍പ്പര്യങ്ങള്‍ക്ക് ഭീഷണിയായി കാണുന്നു. ശത്രുതയ്ക്കിടയിലും, നിശ്ചയദാര്‍ഢ്യവും സഹിഷ്ണുതയും പ്രകടിപ്പിക്കുന്ന കാഹ്ലെന്‍ തളരാതെ തുടരുന്നു. മോശം മണ്ണ്, കഠിനമായ കാലാവസ്ഥ, പട്ടിണി എന്നീ എക്കാലത്തെയും വെല്ലുവിളികളെ അഭിമുഖീകരിച്ചു അയാള്‍ മുന്നോട്ട് പോകുന്നു. കഹ്ലന്റെ യാത്ര പൂര്‍ണ്ണമായും ഏകാന്തമല്ല. നിഗൂഢമായ ഭൂതകാലവും, ഇച്ഛാശക്തിയുമുള്ള സ്ത്രീയായ ആന്‍ ബാര്‍ബറയും (അമന്‍ഡ കോളിന്‍) അവളുടെ സഹോദരന്‍ എസ്പനും (ഗുസ്താവ് ലിന്‍ഡ്) അവനോടൊപ്പം ചേരുന്നു. അവരുടെ വരവ് കഹ്ലന് ആവശ്യമായ പിന്തുണ നല്‍കുന്നു. എന്നിരുന്നാലും, കഹ്ലന്റെ പദ്ധതി വിജയത്തിന്റെ ലക്ഷണങ്ങള്‍ കാണിക്കാന്‍ തുടങ്ങുമ്പോള്‍, എതിര്‍പ്പുകള്‍ ശക്തമാകുന്നു. നിയമപരമായ നീക്കങ്ങള്‍, അട്ടിമറികള്‍, അക്രമാസക്തമായ ഭീഷണിപ്പെടുത്തല്‍ എന്നിവയുള്‍പ്പെടെ കഹ്ലനെ തുരങ്കംവയ്ക്കാന്‍ എതിരാളികള്‍ വിവിധ തന്ത്രങ്ങള്‍ പ്രയോഗിക്കുന്നു.
വിളനാശവും, വ്യക്തിപരമായ നഷ്ടങ്ങളും, വര്‍ദ്ധിച്ചുവരുന്ന ഭീഷണികളുമുള്‍പ്പെടെ നിരവധി തിരിച്ചടികള്‍ ഉണ്ടായിട്ടും, കഹ്ലന്റെ ദൃഢനിശ്ചയം ഒരിക്കലും കുലുങ്ങുന്നില്ല. ഒരുകാലത്ത് തരിശായി കിടന്നിരുന്ന ഭൂമിയെ വളര്‍ന്നുവരുന്ന വാസസ്ഥലമാക്കി മാറ്റിക്കൊണ്ട് അദ്ദേഹവും പിന്തുണക്കാരും വിശ്രമമില്ലാതെ പ്രവര്‍ത്തിക്കുന്നു. അവരുടെ ശ്രമങ്ങള്‍ കൂടുതല്‍ കുടിയേറ്റക്കാരെ ആകര്‍ഷിക്കുന്നു, ഒരു പുതിയ തുടക്കത്തിന്റെ വാഗ്ദാനവും അവരുടെ മുന്‍ ജീവിതത്തിന്റെ അടിച്ചമര്‍ത്തല്‍ സാഹചര്യങ്ങളില്‍ നിന്ന് രക്ഷപ്പെടാനുള്ള അവസരവുമാണ് പുതിയ കുടിയേറ്റക്കാരുടെ ഊര്‍ജ്ജം.
ഏറ്റുമുട്ടലില്‍ എല്ലാം നശിച്ചേക്കാം സ്വജീവനും നഷ്ടപ്പെട്ടേക്കാം. കഹ്ലന്റെ നിശ്ചയദാര്‍ഢ്യം അതിന്റെ പരിധിക്കുള്ളില്‍ പരീക്ഷിക്കപ്പെടുന്നു. അമിതമായ പ്രതിബന്ധങ്ങളെ അഭിമുഖീകരിക്കുമ്പോള്‍, തന്റെ സ്വപ്നം ഉപേക്ഷിക്കണമോ അതോ നവോന്മേഷത്തോടെ പോരാടണമോ എന്ന് അയാള്‍ക്ക് തീരുമാനമെടുക്കേണ്ടിവരുന്നു. കഠിനാധ്വാനം ചെയ്ത് നേടിയ വിജയത്തിന്റെ ബോധത്തോടെയും തന്നോടൊപ്പം സ്വപ്നം കാണാന്‍ ധൈര്യപ്പെട്ടവര്‍ക്ക് ശോഭനമായ ഭാവിയുടെ വാഗ്ദാനത്തോടെയുമാണ് കഹ്ലന്റെ യാത്ര അവസാനിക്കുന്നത്.
‘എ റോയല്‍ അഫയര്‍’ എന്ന തന്റെ മുന്‍ചിത്രത്തിലൂടെ പ്രശസ്തനായ സംവിധായകന്‍ നിക്കോളാജ് ആര്‍സെല്‍, വിശദമായ, സൂക്ഷ്മമായ കണ്ണുകളോടെയും ആ കാലഘട്ടത്തെക്കുറിച്ചുള്ള ആഴത്തിലുള്ള ധാരണയോഡും കൂടിയാണ് ചിത്രത്തെ സമീപിക്കുന്നത്. ജുട്ട്‌ലാന്‍ഡ് ഹീത്തിന്റെ വിശാലമായ ഭൂമികയുടെ സൗന്ദര്യവും കാഠിന്യവും പകര്‍ത്തുന്ന ചിത്രത്തിന്റെ ദൃശ്യപരമായ കഥപറച്ചില്‍ ഒരു മികച്ച സവിശേഷതയാണ്. റാസ്മസ് വിഡെബെക്കിന്റെ ഛായാഗ്രഹണം അസാധാരണമാണ്, വിശാലവും വഴങ്ങാത്തതുമായ ലാന്‍ഡ്‌സ്‌കേപ്പിനെ ഊന്നിപ്പറയാന്‍ വൈഡ് ഷോട്ടുകളും കഥാപാത്രങ്ങലെ അടുത്തറിയാന്‍ അടുപ്പമുള്ള ക്ലോസപ്പുകളും ഉപയോഗിക്കുന്നു. സെറ്റ് ഡിസൈനിലെയും വസ്ത്രധാരണത്തിലെയും സൂക്ഷ്മമായ ശ്രദ്ധ കാഴ്ചക്കാരെ പതിനെട്ടാം നൂറ്റാണ്ടിന്റെ പശ്ചാത്തലത്തിലേക്ക് എളുപ്പത്തില്‍ കൂട്ടിക്കൊണ്ടുപോകുന്നു.
ലുഡ്വിഗ് കഹ്ലന് എന്ന കഥാപാത്രമായി മാഡ്‌സ് മിക്കല്‍സണ്‍ ശക്തമായ പ്രകടനം കാഴ്ചവെയ്ക്കുന്നു. കഹ്ലന്റെ പോരാട്ടങ്ങളെയും വിജയങ്ങളെയും ആഴത്തില്‍ സ്വാധീനിക്കുന്ന തരത്തില്‍ അദ്ദേഹത്തിന്റെ കടുത്ത നിശ്ചയദാര്‍ഢ്യവും ശക്തമായ പ്രതിരോധവും ഉള്‍ക്കൊള്ളുന്ന റോള്‍ പൂര്‍ണ്ണമായും വിജയിച്ചിട്ടുണ്ട്. അഭിനയത്തിന്റെ കാര്യത്തില്‍ സിനിമയുടെ മറ്റൊരു വലിയ ഹൈലൈറ്റ് ആണ് ആന്‍ ബാര്‍ബറ എന്ന കഥാപാത്രത്തെ അവതരിപ്പിക്കുന്ന, ജീവിതത്തില്‍ വേണ്ടത്ര കഷ്ടപ്പാടുകള്‍ അനുഭവിക്കുകയും കഹ്ലന്റെ സംരംഭത്തെ ഒരു പുതിയ അവസരമായി കാണുകയും ചെയ്യുന്ന അമാന്‍ഡ കോളിന്‍. ആന്‍ ബാര്‍ബറയായി അമന്‍ഡ കോളിന്‍ തിളങ്ങുന്നു, കഹ്ലന്റെ കഥാപാത്രത്തിന് ശക്തവും, ബഹുമുഖവുമായ ബാലന്‍സ് നല്‍കുന്നു ആ കഥാപാത്രം.
മറികടക്കാനാകാത്ത പ്രതിബന്ധങ്ങള്‍ക്കിടയിലും അതിജീവനത്തിനായുള്ള മനുഷ്യ പ്രയത്‌നത്തിന്റെ കഥയാണ് പതിനെട്ടാം നൂറ്റാണ്ടിലെ ഡെന്‍മാര്‍ക്കിന്റെ സാമൂഹിക-രാഷ്ട്രീയ ചലനാത്മകത വിവരിക്കുന്ന ഈ സിനിമ. ആകര്‍ഷകമായ കഥയും കഥാപാത്രങ്ങളുടെ ശക്തമായ പ്രകടനങ്ങളും സൂക്ഷ്മമായ സംവിധാനവും സിനിമയെ വേറിട്ട തലത്തിലുള്ള കാഴ്ചാനുഭവമാക്കി മാറ്റുന്നു.
2023 ലെ വെനീസ് ഇന്റര്‍നാഷണല്‍ ഫിലിം ഫെസ്റ്റിവലില്‍ ഗോള്‍ഡന്‍ ലയണിനായി മത്സരിച്ച ചിത്രം തൊണ്ണൂറ്റി ആറാമത് അക്കാദമി അവാര്‍ഡില്‍ മികച്ച ഇന്റര്‍നാഷണല്‍ ഫീച്ചര്‍ ഫിലിമിനുള്ള ഡാനിഷ് എന്‍ട്രിയായി തിരഞ്ഞെടുക്കപ്പെട്ടു. ലോകത്തെ വിവിധ ഫിലിം ഫെസ്റ്റിവലുകളില്‍നിന്നും ഇരുപത്തൊന്നു വിജയവും പതിനഞ്ച് നോമിനേഷനുകളും ലഭിച്ചു ഈ ചിത്രത്തിന്.
നിക്കോളജ് ആര്‍സെലിന്റെ ഏറ്റവും മികച്ച ചിത്രങ്ങളിലൊന്നായ ‘എ റോയല്‍ അഫയറിലെ’ പ്രധാന കഥാപാത്രങ്ങളിലൊന്നായ മാഡ്‌സ് മിക്കെല്‍സണുമായി വീണ്ടുമുള്ള കൂട്ടുകെട്ടിലാണ് ‘ദി പ്രോമിസ്ഡ് ലാന്‍ഡ്’ പിറക്കുന്നത്. മാഡ്‌സ് മിക്കെല്‍സണും നിക്കോളജ് ആര്‍സെലും വീണ്ടും ചേരുന്നു എന്ന പ്രത്യേകതകൂടി ഈ സിനിമക്കുണ്ട്. ശക്തമായ പ്രകടനങ്ങള്‍ കൊണ്ട് കാഴ്ചക്കാരനെ രണ്ട് മണിക്കൂര്‍ പിടിച്ചിരുത്തുന്ന ഒരു മികച്ച ചരിത്ര ഫിക്ഷനാണ് ഈ സിനിമ.
